༄༅། །འདི་གར་ཀུལླུ་མ་ནཱ་ལི་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། རྡོ་སྦི་དཔལ་རབ་གླིང་བཀའ་འགྱུར་བསྟན་འགྱུར་ཚོགས་ཆུང་དང་། དཔལ་རབ་གླིང་མི་མང་སྤྱི་མགྲིན་ནས་ཇི་ལྟར་གསོལ་བ་ཕུར་ཚུགས་སུ་འདེབས་པ་བཞིན་ཕྱག་ཆེན་བསྟན་པའི་སྲོག་ཤིང་བཀའ་བརྒྱུད་བསྟན་པའི་གསལ་བྱེད་བྱམས་མགོན་རྡོ་རྗེ་འཆང་ཀྭན་ཏིང་ཏཱའི་སི་ཏུ་སྐུ་ཕྲེང་བཅུ་གཉིས་པ་པདྨ་དོན་ཡོད་གྲུབ་པ་རིན་པོ་ཆེ་མཆོག་ས་གནས་སུ་གདན་ཞུས་ཀྱིས་ཁ་འཐོར་ས་ཁག་དྲུག་གི་བོད་མི་ཙམ་མིན་པར་ཧི་མ་ལ་ཡའི་ནང་པའི་དད་ལྡན་མང་ཚོགས་སུམ་སྟོང་ལྷག་ཙམ་ལ་མགོན་པོ་ཚེ་དཔག་མེད་ཀྱི་ཚེ་དབང་ཚེ་སྒྲུབ་དང་སྨན་བླའི་རྗེ་གནང་བཅས་གནང་ཡོད། དེ་ཡང་ཕྱི་ལོ་༢༠༢༤ ཟླ་བ་ ༠༧ ཚེས་༢༡ ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ་རིན་པོ་ཆེ་མཆོག་དཔལ་སྤུངས་ཡེ་ཤེས་རབ་རྒྱས་གླིང་བཙུན་དགོན་ནས་རྡོ་སྦི་དཔལ་རབ་གླིང་བོད་མི་གཞིས་ཆགས་སུ་ཞབས་སོར་བདེ་བར་འཁོད་མཚམས་དད་ལྡན་ཆོས་ཞུ་བ་སེར་སྐྱ་མི་མང་ཡོངས་ལ་ཚེ་འདི་ཕྱི་གཉིས་ལ་ཕན་པའི་བླང་དོར་བཀའ་སློབ་ཟབ་ཅིང་རྒྱས་པ་གནང་རྗེས་མི་མང་ཡོངས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉེ་ཆར་ཞབས་པུས་སྨན་བཅོས་ལེགས་འགྲུབ་བྱུང་བའི་གཏམ་བཟང་གནས་ཚུལ་དང་། ད་ཆ་མགོན་པོ་མཆོག་ཞབས་པུས་མགྱོགས་མྱུར་སངས་དྲག་ཡོང་བའི་ཐུགས་སྨོན་དང་འབྲེལ་སེར་སྐྱ་མི་མང་ཡོངས་ལ་སྨན་བླའི་རྗེ་གནང་གནང་ཡོད། 

སྐབས་དེར་རིན་པོ་ཆེ་མཆོག་གིས་ཚེ་དབང་གི་དགོས་དམིགས་དང་ཚེ་དབང་ཞུ་སྐབས་རང་ངོས་ནས་ཀུན་སློང་ཇི་ལྟར་འཁུར་དགོས་པའི་ལམ་སྟོན་གནང་མཚམས་ཚེ་དབང་ཚེ་སྒྲུབ་ཀྱི་ཆོ་ག་དངོས་སུ་དབུ་འཛུགས་ཞུ་གནང་ཡོད།  ཉིན་དེར་བསོད་ནམས་དང་བཀྲ་ཤིས་རྟེན་འབྲེལ་མཚོན་སླད་རྡོ་སྦི་དཔལ་རབ་གླིང་གཞིས་མི་དང་མ་ན་ལི་སཾ་བྷོ་ཊ་ཉིན་སློབ་ནས་གཞས་སྣ་འཁྲབ་སྟོན་གཟིགས་འབུལ་ཞུས་ཡོད།

མཐའ་དོན་བཀའ་འགྱུར་བསྟན་འགྱུར་ཚོགས་ཆུང་དང་དཔལ་རབ་གླིང་བརྒྱ་དཔོན་དང་མི་མང་ཐུན་མོང་གི་གོ་སྒྲིག་འོག་དད་ལྡན་ཆོས་ཞུ་བ་ཡོངས་ལ་དཀར་ཟས་དགུང་ཚིགས་ཞིག་འདེགས་འབུལ་ཞུས་ཡོད། །