༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༢༤ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་འཕར་བདེ་སྐྱིད་སྒྲོལ་དཀར་ལགས་དང་། ཚབ་གསར་དྲུང་ཆེ་བྱམས་པ་ཕུན་ཚོགས་ལགས་རྣམ་གཉིས་དབར་རྩིས་སྤྲོད་རྩིས་ལེན་ལེགས་པར་གྲུབ་མཚམས་དྲུང་ཆེ་གསར་པ་བྱམས་པ་ཕུན་ཚོགས་ལགས་ཀྱིས་འཕྲོད་བསྟེན་ལས་ཁུངས་ཀྱི་དྲུང་ཡིག་ཆེན་མོའི་ལས་འཁུར་འགོ་འཛུགས་གནང་ཡོད།
དེ་ཡང་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་འཕར་བདེ་སྐྱིད་སྒྲོལ་དཀར་ལགས་དང་། དྲུང་ཆེ་གསར་པ་བྱམས་པ་ཕུན་ཚོགས་ལགས། སྤྲོད་དཔང་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་བཅས་ལྷན་འཛོམས་ཀྱིས་ཐོག་མར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་སྙན་དར་སྒྲོན་འབུལ་ཞུས་གྲུབ་བསྟུན་འཕྲོད་བསྟེན་ལས་ཁུངས་ཀྱི་དྲུང་འཕར་བདེ་སྐྱིད་སྒྲོལ་དཀར་ལགས་ཀྱིས་དྲུང་ཆེ་གསར་པ་བྱམས་པ་ཕུན་ཚོགས་ལགས་ལ་ཞབས་སྟེགས་རྩིས་སྤྲོད་དང་འབྲེལ་མགུལ་དར་གཡོགས་གནང་།
དེ་ནས་འཕྲོད་བསྟེན་ལས་ཁུངས་ཀྱི་ལས་བྱེད་ཡོངས་ནས་དྲུང་ཆེ་གསར་པ་བྱམས་པ་ཕུན་ཚོགས་ལགས་སུ་འཚམས་འདྲིའི་མགུལ་དར་ཕུལ་གྲུབ་མཚམས་རྟེན་འབྱུང་གསོལ་ཇ་དང་འབྲས་སིལ་ཕུལ་ཡོད།
བྱམས་པ་ཕུན་ཚོགས་ལགས་ནི། ཕྱི་ལོ་ ༢༠༠༧ ཟླ་བ་ ༡༡ ཚེས་ ༡ ནས་དྲུང་གཞོན་གནས་རིམ་ཐོག་ཚོད་ལྟར་བསྐོ་གཞག་གིས་ནང་སྲིད་ལས་ཁུངས་ཀྱི་དྲུང་གཞོན་གནས་རིམ་དུ་ལས་འགན་བཀོད་སྒྲིག་གནང་། ཕྱི་ལོ་ ༢༠༠༨ ཟླ་བ་ ༠༦ ཚེས་ ༡༦ ནས་ལས་བྱེད་ངོ་མར་བསྐོ་གཞག་གིས་ལས་འགན་རང་འཇགས། ཕྱི་ལོ་ ༢༠༠༨ ཟླ་བ་ ༠༧ ཚེས་ ༢༥ ནས་ཧོན་སུར་རབ་རྒྱས་གླིང་ས་གནས་འགོ་འཛིན་དུ་གནས་སྤོས། ཕྱི་ལོ་ ༢༠༡༢ ཟླ་བ་ ༠༧ ཚེས་ ༠༤ ནས་ཟུང་དྲུང་དུ་གནས་སྤར་གྱིས་བདེ་སྐྱིད་སླར་གསོའི་ས་གནས་འགོ་འཛིན་དུ་གནས་སྤོས། ཕྱི་ལོ་༢༠༡༤ ཟླ་བ་ ༠༩ ཚེས་ ༡༠ ནས་སྡེ་ར་ལྡུན་ས་གནས་འགོ་འཛིན་དུ་གནས་སྤོས། ཕྱི་ལོ་ ༢༠༡༦ ཟླ་བ་ ༠༦ ཚེས་ ༢༢ ནས་ནང་སྲིད་ལས་ཁུངས་སུ་གནས་སྤོས། ཕྱི་ལོ་ ༢༠༡༦ ཟླ་བ་ ༠༧ ཚེས་ ༢༥ ནས་འཕྲོད་བསྟེན་ལས་ཁུངས་སུ་གནས་སྤོས། ཕྱི་ལོ་ ༢༠༡༩ ཟླ་བ་ ༠༥ ཚེས་ ༠༤ ནས་དྲུང་འཕར་གནས་རིམ་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༣ ནས་ནང་སྲིད་ལས་ཁུངས་ཀྱི་དྲུང་འཕར་དུ་གནས་སྤོས། ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༧ ནས་དྲུང་ཡིག་ཆེན་མོར་གནས་སྤར། ཕྱི་ལོ་ ༢༠༢༤ ཟླ་བ་ ༠༧ ཚེས་ ༢༤ ཉིན་ནས་འཕྲོད་བསྟེན་ལས་ཁུངས་ཀྱི་དྲུང་ཡིག་ཆེན་མོར་བསྐོ་གཞག་གནང་བ་བཅས། །
