༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༢ ཉིན་ཨ་རིའི་སྲིད་འཛིན་ཇོ་བྷའི་ཊེན་མཆོག་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་རྗེས་ཁྲིམས་ཡིག་དེ་ཉིད་ཨ་རིའི་གཞུང་འབྲེལ་སྲིད་བྱུས་སུ་གྱུར་ཡོད་པ་རེད།
དེ་ཡང་ཁྲིམས་ཡིག་འདིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་མགོན་པོ་མཆོག་གི་སྐུ་ཚབ། ཡང་ན། མང་གཙོའི་ལམ་ནས་འོས་འདེམས་བྱུང་བའི་བོད་མིའི་དབུ་ཁྲིད་དབར་སྔོན་འགྲོའི་ཆ་རྐྱེན་གང་ཡང་མེད་པར་དོན་དམ་གྱི་གྲོས་མོལ་ཡོང་ཐབས་དང་། ཡང་ན། བོད་ཀྱི་གནད་དོན་ཐོག་གྲོས་མོལ་ཡོང་རྒྱུའི་གོ་སྐབས་ཡར་རྒྱས་གཏང་རྒྱུའི་ཐབས་ལམ་འཚོལ་རྒྱུ་ཡིན་པ་མ་ཟད། ད་དུང་རྒྱལ་ཁབ་གཞན་དང་མཉམ་འབྲེལ་གྱིས་བོད་ཀྱི་གནད་དོན་ཐག་གཅོད་གྲོས་མོལ་ཡོང་བར་འབད་རྩོལ་བྱ་རྒྱུ་ཡིན་པ་རེད།
ཁྲིམས་ཡིག་དེའི་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་། རྒྱ་ནག་དམར་ཤོག་ཚོགས་པས་བོད་ནི་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཚུལ་བཤད་པ་དེ། ལོ་རྒྱུས་ཀྱི་ཐོག་ནས་བདེན་པ་མིན་པ་གསལ་སྟོན་བྱས་ཡོད་པ་མ་ཟད། ད་དུང་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་། རྒྱ་ནག་དམར་ཤོག་ཚོགས་པས་བོད་ཀྱི་ལོ་རྒྱུས་ཀྱི་རྒྱབ་ལྗོངས་དང་། མི་རིགས། དགའ་ལྡན་ཕོ་བྲང་སྒྲིག་འཛུགས་ཐེ་བའི་བོད་སྒྲིག་འཛུགས་གཞན་སོགས་ཀྱི་སྐོར་འཁྱོག་བཤད་རྫུན་གཏམ་སྤེལ་དང་སྤེལ་བཞིན་པ་རྣམས་ལ་ཨ་རིའི་གཞུང་གི་ཕྱི་འབྲེལ་ལས་དོན་བརྒྱུད་གདོང་ལེན་ཁ་གཏད་གཅོག་རྒྱུ་ཡིན་པ་གསལ་ཡོད།
ཨ་རིའི་གཞུང་གིས་བོད་དོན་དང་འབྲེལ་བའི་སྲིད་བྱུས་སྲ་བརྟན་དུ་གཏོང་བའི་གལ་ཆེའི་ཁྲིམས་ཡིག་འདི་ནི། ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག་དང་། ཕྱི་ལོ་ ༢༠༡༨ ལོའི་བོད་ནང་ཕར་འགྲོ་ཚུར་འོང་གི་ཁྲིམས་ཡིག་སོགས་ཀྱི་རྗེས་སུ་གཏན་འབེབས་གནང་བའི་གལ་ཆེའི་ཁྲིམས་ཡིག་ཅིག་ཆགས་ཡོད། དེ་ཡང་ཁྲིམས་ཡིག་དེ་ཉིད་འདི་ལོའི་ཟླ་བ་གསུམ་པའི་འགོ་སྟོད་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༥ པའི་ཉིན། རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་ཁྲོད་བོད་མིར་རྒྱབ་སྐྱོར་བསྐྱར་ནན་གནང་སླད་ཨ་རིའི་གྲོས་ཚོགས་སུ་སྲིད་དོན་ཚོགས་པ་ཟུང་སྦྲེལ་གྱི་རྒྱབ་སྐྱོར་འོག་ངོ་སྤྲོད་གནང་ཡོད།
ཨ་རིའི་སྲིད་འཛིན་ཇོ་བྷའི་ཊེན་མཆོག་གིས་ཁྲིམས་ཡིག་ལ་མཚན་རྟགས་བཀོད་གྲུབ་རྗེས་གཞུང་འབྲེལ་བསྒྲགས་གཏམ་སྤེལ་བའི་ནང་། དེ་རིང་ངས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་མིང་རྟགས་བཀོད་ཡོད། བོད་མིའི་འགྲོ་བ་མིའི་ཐོབ་ཐང་གོང་འཕེལ་དུ་གཏོང་བ་དང་། ཁོ་ཚོའི་ཐུན་མོང་མ་ཡིན་པའི་སྐད་ཡིག་དང་། རིག་གཞུང་། ཆོས་ལུགས་ཀྱི་ཤུལ་བཞག་རྒྱུན་འཛིན་བྱེད་པའི་འབད་བརྩོན་ལ་གྲོས་ཚོགས་ཀྱི་སྲིད་དོན་ཚོགས་པ་ཟུང་སྦྲེལ་གྱིས་རྒྱབ་སྐྱོར་གནང་བ་གཅིག་མཚུངས་ངས་ཀྱང་རྒྱབ་སྐྱོར་ཞུ་གི་ཡོད། ངའི་སྲིད་གཞུང་གིས་བོད་རྒྱའི་དཀའ་རྙོག་ཞི་འགྲིག་ཡོང་ཐབས་སུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་༸གོང་ས་ཏཱ་ལའི་བླ་མའམ་ཁོང་གི་སྐུ་ཚབ་ལྷན་སླར་ཡང་ཐད་ཀའི་གྲོས་མོལ་བྱེད་དགོས་པའི་རེ་སྐུལ་མུ་མཐུད་བྱེད་ཀྱི་ཡོད། ཅེས་གསུངས་ཡོད།
ཨ་རིའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བའི་གནས་ཚུལ་ཐོན་པའི་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ཚོགས་དྲྭ་ལམ་ (X) བརྒྱུད། སྲིད་འཛིན་ཇོ་བྷའི་ཌེན་མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་དེ་ཁྲིམས་སུ་བསྒྱུར་ཡོད་པ་གོ་ཐོས་བྱུང་བས་ང་རང་དགའ་ཚོར་ཆེན་པོ་བྱུང་།
ང་རང་ད་ལྟ་ལ་དྭགས་བྱང་ཐང་བོད་མིའི་གཞིས་ཆགས་ཁག་ཏུ་ལྟ་སྐོར་དུ་བསྐྱོད་བཞིན་པའི་ཉིན་མཐའ་མར་ས་མཚམས་བརྒལ་ནས་བོད་ལ་རྒྱང་ལྟ་བྱེད་བཞིན་གསར་འགྱུར་འདི་གོ་དུས་རེ་བ་གསར་པ་ཞིག་རྙེད་བྱུང་། ཨ་རིའི་གཞུང་གིས་བོད་ཀྱི་ལོ་རྒྱུས་ཀྱི་གནས་བབ་ཐོག་ལངས་ཕྱོགས་སྲ་བརྟན་དུ་གཏོང་བའི་གོམ་པ་གལ་ཆེན་ཞིག་སྤོས་ཏེ། རྒྱལ་སྤྱིའི་ཁྲིམས་ལུགས་གཞིར་བཞག་གི་འཚེ་མེད་ཞི་བའི་ཐབས་ལམ་བརྒྱུད་ནས་བོད་རྒྱའི་དཀའ་རྙོག་དེ་གྲོས་མོལ་གྱིས་གཏན་དུ་སེལ་བའི་ཆོད་སེམས་བརྟན་པོ་ཞིག་བཟུང་བར་ངས་སྲིད་འཛིན་མཆོག་ལ་སྙིང་ནས་ཐུགས་རྗེ་ཆེ་ཞུ། དེ་བཞིན་ཨ་རིའི་གྲོས་ཚོགས་དང་གྲོས་ཚོགས་ནང་གི་ང་ཚོའི་གྲོགས་པོ་ཚོར་ང་ཚོས་སྙིང་ནས་ཐུགས་རྗེ་ཆེ་ཞུ་རྒྱུ་ཡིན། བོད་མི་སྤྱི་དང་ལྷག་པར་བཙན་བཟུང་འོག་ཡོད་པའི་གཞིས་ལུས་རྒྱ་ཆེ་མི་མང་ལ་དེ་རིང་གི་རྒྱལ་ཁ་འདིས་སེམས་ནང་རེ་བ་དང་སེམས་ཤུགས་གསར་པ་ཞིག་བསྐྲུན་ཡོད། ཅེས་གསུངས་ཡོད། །
