༄༅། །བོད་རང་དབང་བདེན་པའི་ལས་འགུལ་གྱི་ས་གནས་ཚོགས་ཆུང་གི་སྒྲིག་གཞི་དོན་ཚན་དྲུག་པའི་ནང་གསེས་ ༡ དགོངས་དོན་ལྟར། ཕྱི་ལོ་ ༢༠༢༤ ཟླ་བ་ ༦ ཚེས་ ༡ ནས་བོད་རང་དབང་བདེན་པའི་ལས་འགུལ་ས་གནས་ཚོགས་ཆུང་ཁག་གི་ཚོགས་མི་འོས་འདེམས་ཀྱིས་ལས་འཁུར་འགོ་འཛུགས་ཟིན་པར་དཔལ་འབྱོར་ལས་ཁུངས་ཀྱི་དང་བླངས་དཔྱ་དངུལ་ཚན་པའི་ལས་དོ་བཟོད་པ་རྒྱ་མཚོ་ལགས་དང་གྲངས་ཐོ་ཚན་པའི་སྡེ་འགན་བསྟན་འཛིན་སྐལ་བཟང་ལགས་གཉིས་ནས་ཕྱི་ལོ་ ༢༠༢༤ ཟླ་བ་ ༦ ཚེས་ ༢༧ དང་ ༢༨ ཉིན་གྲངས་གཉིས་རིང་བདེ་སྐྱིད་གླིང་པོ་ཏཱ་ལ་ཚོགས་ཁང་དུ་ཨུ་ཌར་ཁན་མངའ་སྡེ་དང་། ཧི་མ་ཅལ་སིར་མོར་རྫོངས། ལྡི་ལི། ཝ་ར་ན་སི་བཅས་ཀྱི་ས་གནས་རང་བདེན་ཚོགས་ཆུང་ཁག་ ༡༡ ཡི་ཚོགས་མི་གྲངས་ ༢༣ རྣམས་ལ་བཙན་བྱོལ་བོད་མིའི་དང་བླངས་དཔྱ་དངུལ་དང་བསྡུ་དངུལ་གཞན་དག་གི་འབུལ་འབབ་ཁྲིམས་ཡིག་ལྟར་དཔྱ་དངུལ་བསྡུ་བཞེས་གནང་ཕྱོགས་དང་། རྩིས་ཁྲ་འབུལ་ཕྱོགས། རྒྱུན་གྲོན། ཚོགས་ཆུང་གི་ཡིག་ཆ་བདག་ཉར། དཔྱ་དེབ་གསར་བཟོ་དང་ནོར་བཅོས། བོར་བརླག་སོགས་ཀྱི་གོ་རྟོགས་ཟབ་སྦྱོང་འབུལ་ཡོད།
ཉིན་དང་པོའི་དབུ་འབྱེད་མཛད་སྒོའི་སྐབས་སྡེ་ར་སྡུན་ས་གནས་འགོ་འཛིན་དོན་གྲུབ་རྒྱལ་པོ་ལགས་ནས་ཟབ་སྦྱོང་དང་འབྲེལ་བའི་ངོ་སྤྲོད་གསུང་བཤད་གནང་བ་དང་། དེ་རྗེས་གྲངས་ཐོ་ཚན་པ་ནས་དཔྱ་དེབ་གསར་བཟོ་དང་ནོར་བཅོས། བོར་བརླག་བཅས་ཀྱི་རྩ་འཛིན་ལམ་སྟོན་དང་འགེངས་ཤོག་བཀང་རྒྱུའི་ཐད་འགྲེལ་བརྗོད་གཟབ་རྒྱས་གནང་ཡོད་པ་དང་། དེ་བཞིན་དང་བླངས་དཔྱ་དངུལ་ཚན་པ་ནས་ཚོགས་བཅར་བ་རྣམས་ལ་བཙན་བྱོལ་བོད་མིའི་དང་བླངས་དཔྱ་དངུལ་དང་བསྡུ་དངུལ་གཞན་དག་གི་འབུལ་འབབ་ཁྲིམས་ཡིག བོད་རང་དབང་བདེན་པའི་ལས་འགུལ་ས་གནས་ཚོགས་ཆུང་གི་སྒྲིག་གཞི། རྒྱུན་གྲོན་རྩིས་ཁྲ་བཟོ་ཉར་དང་སྔོན་རྩིས་འཆར་འབུལ་ཞུ་ཕྱོགས། དཔྱ་དངུལ་བྱུང་འཛིན་བཟོ་འདོན་གནང་ཕྱོགས། འགེངས་ཤོག་ག་པ་དང་ང་པ་འགེངས་ཕྱོགས། རྩིས་ཞིབ་སྙན་ཐོ་དང་ལན་འདེབས། རྒྱབ་ལྗོངས་དན་རྟགས་འབུལ་ཕྱོགས། རྩིས་དང་འབྲེལ་བའི་ཡིག་ཆ་བདག་ཉར་དགོས་པ་ཁག་འགྲེལ་བརྗོད་གནང་རྗེས་ཚོགས་བཅར་བའི་དོགས་འདྲི་ཁག་ལ་ལན་འདེབས་གསལ་བཤད་གནང་ཡོད་པ་བཅས།།
