༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༢༨ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག བཙན་བྱོལ་བོད་མིའི་འདུས་སྡོད་གཞིས་ཆགས་ཁག་ཏུ་འཛམ་གླིང་མཆིན་ནད་དུག་ཐབས་ཀྱི་ཉིན་མོ་སྲུང་བརྩི་ཞུས་ཡོད།
དེ་ཡང་འདི་ལོའི་འཛམ་གླིང་མཆིན་ནད་དུག་ཐབས་ཀྱི་ཉིན་མོའི་བརྗོད་སྙིང་དུ་བརྟག་དཔྱད། སྨན་བཅོས། སྔོན་ཁབ་བརྒྱབ་སྟེ་མཆིན་ནད་དུག་ཐབས་ལ་གདོང་ལེན་བྱ་རྒྱུ་གཙོ་གནད་དུ་བཟུང་ཡོད་པ་ལྟར། འཕྲོད་བསྟེན་ལས་ཁུངས་ཀྱི་གོ་སྒྲིག་འོག བོད་མིའི་གཞིས་ཆགས་སོ་སོར་རྩེད་རིགས། སྒོར་གཞས། གཏམ་བཤད། བརྙན་ཐུང་། གྱང་སྦྱར་སོགས་ཀྱི་ལམ་ནས་ནད་གཞི་གོ་རྟོགས་ཀྱི་ལས་འགུལ་སྤེལ་ཡོད་པ་མ་ཟད། འགྲོ་ཕན་བོད་ཀྱི་སྨན་རྩིས་ཁང་དང་། བདེ་ལེགས་སྨན་ཁང་གི་སྨན་པ་ཆེད་མངགས་གདན་ཞུས་ཀྱིས་བོད་ཀྱི་གསོ་བ་རིག་པ་དང་། དེང་རབས་སྨན་དཔྱད་ལམ་ནས་མཆིན་ནད་དུག་ཐབས་སྔོན་འགོག་དང་། རྟག་དཔྱད། སྨན་བཅོས་བྱ་ཕྱོགས་སྐོར་གླེང་མོལ་གོ་སྒྲིག་ཞུས་ཡོད་པ་དང་། བགྲོ་གླེང་དེ་ཉིད་ཕྱི་དྲིལ་བོད་ཀྱི་བརྙན་འཕྲིན་བརྒྱུད་རྒྱང་བསྒྲགས་གནང་ཡོད་པ་རེད།
སྤྱིར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ངོས་ནས་ལོ་འཁོར་མོར་བོད་མི་རྣམས་ལ་མཆིན་ནད་དུག་ཐབས་བརྟག་དཔྱད་དང་། སྨན་བཅོས། སྔོན་འགོག་ཁབ་ཀྱི་མཐུན་རྐྱེན་སྦྱོར་མུས་ཡིན་པ་རེད། འཛམ་གླིང་འཕྲོད་བསྟེན་ལྷན་ཚོགས་ཀྱི་སྙན་ཐོ་ལྟར་ན། ད་ལྟའི་ཆར་རྒྱ་གར་ནང་མཆིན་ནད་དུག་ཐབས་ཁ་པ་ཡོད་པའི་མི་འབོར་ས་ཡ་བཞི་བཅུ་ལྷག་ཡོད་པ་གསུངས་ཡོད་པ་བཅས།། 
