༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༢༩ རེས་གཟའ་ཟླ་བའི་ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་རྒྱ་ནག་གཞུང་ནས་བོད་ནང་གི་སྙན་གྲགས་ཅན་གྱི་རྭ་རྒྱ་ཤེས་རིག་ནོར་བུའི་སློབ་གླིང་བཙན་དབང་གིས་སྒོ་བརྒྱབ་པའི་གནད་དོན་ཁྲོད། རྭ་རྒྱ་ཤེས་རིག་ནོར་བུའི་སློབ་གླིང་བཙན་དབང་གིས་སྒོ་བརྒྱབ་པའི་རྒྱུ་རྐྱེན་དང་ཤུགས་རྐྱེན་ཞེས་པའི་བརྗོད་གཞིའི་ཐོག་དཔྱད་གླེང་ཞིག་འཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་དུ་བོད་མི་མང་སྤྱི་འཐུས་ཁག་ཅིག་དང་། བགྲོ་གླེང་དེའི་གསུང་བཤད་པ་བོད་མི་མང་སྤྱི་འཐུས་དང་བོད་ཀྱི་དུས་བབས་གསར་ཁང་གི་སྤྱི་ཁྱབ་རྩོམ་སྒྲིག་པ་པདྨ་མཚོ་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་ཕྱི་འབྲེལ་དྲུང་འཕར་བསྟན་འཛིན་ལེགས་བཤད་ལགས། ཤེས་རིག་ལས་ཁུངས་ཀྱི་དྲུང་འཕར་བསྟན་འཛིན་པདྨ་ལགས། རྭ་རྒྱ་ཤེས་རིག་ནོར་གླིང་གི་སློབ་ཟུར་དང་བོད་གནས་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཞོན་སྐལ་བཟང་སྒྲོལ་མ་ལགས། བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས། རྒྱལ་སྤྱིའི་བོད་དོན་འབྲེལ་མཐུད་ཁང་གི་བློ་བཟང་དབྱངས་མཚོ་ལགས། གཞན་ཡང བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་དང་། ཟུར་ཉན་པ། གསར་འགོད་པ་བཅས་ཚང་འཛོམས་ཀྱི་ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས་གསུང་བཤད་པ་རྣམས་ངོ་སྤྲོད་དང་འབྲེལ རྒྱ་ནག་གཞུང་ནས་རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་བཙན་དབང་གིས་སྒོ་བརྒྱབ་པའི་དཔྱད་གླེང་ཚོགས་འདུ་འདི་འདྲ་ཞིག་ཚོགས་པའི་དགོས་དོན་ལྔ་ཡོད། དང་པོ་རྒྱ་གཞུང་གི་ད་བར་བཙན་དབང་གིས་བོད་ནང་གི་སློབ་གྲྭ་མང་པོ་སྒོ་བརྒྱབ་པ་ལ་བོད་མི་ཡོངས་ནས་ངོ་རྒོལ་དང་། གཉིས་པ། བོད་ནང་ལ་ཞུགས་པའི་བོད་མི་ས་ཡ་དྲུག་ལ་གདུང་སེམས་མཉམ་སྐྱེ་ཞུ་བ། གསུམ་པ། རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་གིས་བོད་ཀྱི་སློབ་གསོ་ཐད་ལ་ཞབས་ཞུ་རླབས་ཆེ་སྒྲུབ་པ་ལ་ཡིད་རང་དང་གུས་བཀུར་ཞུ་བ། བཞི་པ། རྒྱ་གཞུང་གི་བོད་ནང་གི་རིག་གནས་སློབ་གསོའི་མ་ལག་དུ་མ་ཞིག་ཐབས་སྣ་ཚོགས་ཐོག་ནས་རྩ་མེད་བཏང་བཞིན་ཡོད་པའི་གསལ་སྟོན། ལྔ་པ། བོད་ཀྱི་རིག་གནས་ནི་བོད་པ་ཙམ་ལ་མ་ཡིན་པར། རྒྱ་ནག་དང་གོ་ལ་སྤྱིའི་གཅེས་ནོར་ཡིན་པས་བོད་ཀྱི་རིག་གནས་གཙོ་བཟུང་གི་སློབ་གླིང་དེ་འདྲ་སྒོ་བརྒྱབ་ན་རང་གཞན་ཀུན་ལ་གནོད་རྐྱེན་ཡིན་པའི་སྐོར་གསུངས་རྗེས་བོད་མི་མང་སྤྱི་འཐུས་དང་བོད་ཀྱི་དུས་བབས་གསར་ཁང་གི་སྤྱི་ཁྱབ་རྩོམ་སྒྲིག་པ་པདྨ་མཚོ་ལགས་ཀྱིས་རྭ་རྒྱ་ཤེས་རིག་ནོར་གླིང་གི་སློབ་གསོའི་བྱ་བཞག་ལ་འཕྲད་པའི་དཀའ་ངལ་ཞེས་པའི་བརྗོད་གཞིའི་ཐོག་གསུང་བཤད་གནང་བ་དང་འབྲེལ། བོད་ཀྱི་སྲིད་བྱུས་ཉམས་ཞིབ་ཁང་ནས་བགྲོ་གླེང་འདི་ལྟ་བུ་གོ་སྒྲིག་གནང་བ་ནི་བོད་ནང་གི་བོད་མི་རྣམས་ལ་གདུང་སེམས་མཉམ་སྐྱེ་དང་ནུས་པ་མཉམ་སྤུངས་མཚོན་གྱི་ཡོད་པ་གསུངས། དེ་མཚུངས་ཁོང་མོས་རྭ་རྒྱ་ཤེས་རིག་ནོར་གླིང་སློབ་གྲྭ་བཙན་དབང་གིས་སྒོ་བརྒྱབ་པའི་གནས་ཚུལ་ཐོག་མར་ཐོས་པའི་བརྒྱུད་རིམ་དང་། སློབ་གྲྭ་དེ་ཐོག་མར་རྒན་འཇིགས་མེད་རྒྱལ་མཚན་ལགས་ཀྱིས་འགོ་བཙུགས་ཚུལ་བཅས་ལོ་རྒྱུས་མདོར་བསྡུས་ཤིག་ངོ་སྤྲོད་གནང་།
དེ་ནས་རྭ་རྒྱ་ཤེས་རིག་ནོར་གླིང་གི་སློབ་ཟུར་དང་བོད་གནས་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས་ཀྱིས་རྭ་རྒྱ་སློབ་གླིང་དུ་སློབ་སྦྱོང་བྱས་པའི་མྱོང་ཚོར་དང་སློབ་གླིང་གི་ཁོར་ཡུག་སྐོར་ངོ་སྤྲོད་དང་སྦྲགས། རྒན་འཇིགས་མེད་རྒྱལ་མཚན་ལགས་ནི་གོ་ས་མཐོ་བ་དང་དཔལ་འབྱོར་གྱི་ནུས་པ་ལྡན་པའི་མི་སྣ་ཞིག་མ་ཡིན་པར་འབྲོག་ས་ནས་ཡིན་པའི་གྲྭ་པ་དཀྱུས་མ་ཞིག་ཡིན་པ་དང་། ཁོང་གིས་བོད་ཀྱི་སྐད་ཡིག་ལ་ཤ་ཚ་ཆེ་བས་སྐུ་ངལ་རབ་དང་རིམ་པ་མང་པོའི་འོག་སློབ་གླིང་དེ་བཙུགས་ཐུབ་ཡོད་པ་མ་ཟད། རྒན་འཇིགས་མེད་རྒྱལ་མཚན་ལགས་ཀྱིས་དུས་རྒྱུན་དུ་བོད་མི་རིགས་འཚོ་གནས་ཐུབ་པར་བོད་ཀྱི་སྐད་དང་ཡི་གེ་ངེས་པར་དུ་རྒྱུན་གནས་ཐུབ་དགོས་ཞེས་གསུང་གི་ཡོད་པ་འགྲེལ་བརྗོད་གནང་།
དེ་བཞིན་ཞི་བདེ་ཟླ་བ་ལགས་ཀྱིས་སློབ་གླིང་དེའི་ནང་སློབ་ཕྲུག་ཅིག་གི་བྱེད་སྒོ་རྣམ་གཞག་དང་འབྲེལ་རང་ཉིད་ཐོག་མར་བོད་ཡིག་ལ་དོ་སྣང་མེད་པ་དང་། ཕྱིས་སུ་རྒན་འཇིགས་མེད་རྒྱལ་མཚན་ལགས་ཀྱི་སློབ་གསོ་ལམ་སྟོན་ལ་བརྟེན་ནས་ཕྱི་ལོ་ ༡༩༩༨ ལོར་སློབ་གླིང་དེར་འཛུལ་ཞུགས་གནང་ཚུལ་གྱི་བརྒྱུད་རིམ་སོགས་གསུངས།
དེ་རྗེས་བགྲོ་གླེང་དེར་དམིགས་བསལ་མགྲོན་འབོད་གནང་བ་བོད་མི་མང་སྤྱི་འཐུས་དགེ་བཤེས་ཨ་ཀྲུག་ཚེ་བརྟན་ལགས་ཀྱིས་བགྲོ་གླེང་དང་འབྲེལ་ཏེ་བོད་ཕྱི་ནང་གཉིས་ལ་ཡོད་པའི་བོད་མི་རྣམས་ལ་སློབ་གྲྭ་དེ་གལ་ཆེ་ཚུལ་དང་། རྒྱ་ནག་གཞུང་གིས་དེ་ཉེན་ཁ་ཞིག་ཏུ་ངོས་འཛིན་བྱས་ཏེ་བཙན་དབང་གིས་སྒོ་བརྒྱབ་ཏུ་བཅུག་པ་ཡིན་ཞེས་གསུངས། དེ་བཞིན་ཁོང་གིས་རྭ་རྒྱ་འཇིགས་མེད་རྒྱལ་མཚན་ལགས་ནི་པཎ་ཆེན་རིན་པོ་ཆེའི་སློབ་མ་ཞིག་ཡིན་པ་དང་། ཁོང་ཉིད་ནས་རང་གི་ཨ་མའི་རྒྱན་ཆ་སོགས་བཙོང་ནས་སློབ་གྲྭ་གསར་འཛུགས་གནང་ཞིང་། ཁོང་གི་ཀུན་སློང་བཟང་པོ་དེཪ་གཟིགས་ནས་དགེ་སློང་ཁག་ཅིག་གིས་གླ་མེད་ཐོག་རོགས་རམ་བྱས་ཡོད་པའི་སྐོར་འགྲེལ་བརྗོད་གནང་བའི་ཐོག རྭ་རྒྱ་ཤེས་རིག་སློབ་གླིང་དེ་ཉིད་བོད་ཀྱི་སྐད་ཡིག་ཙམ་མིན་པར་ཚད་མ་རིག་པ་དང་། དེང་དུས་ཀྱི་ཤེས་ཡོན་སོགས་གནའ་དེང་ཟུང་སྦྲེལ་གྱི་ཤེས་ཡོན་བསྟི་གནས་ཤིག་ཡིན་པ་གསུངས།
དེ་མཚུངས་བོད་མི་མང་སྤྱི་འཐུས་ཨ་ཀྲོང་རིན་ཆེན་རྒྱལ་མཚན་ལགས་ཀྱིས་དཔྱད་གླེང་འཚོག་དགོས་པའི་དམིགས་ཡུལ་དང་འབྲེལ་ཏེ། བོད་ཀྱི་མི་རིགས་ལ་ལྷག་བསམ་དང་སེམས་ཤུགས་ཡོད་ཚེ་གྲྭ་པ་དཀྱུས་མ་ཞིག་གིས་ཀྱང་མི་རིགས་ཆེད་བྱས་རྗེས་ཆེན་པོ་ཞིག་སྒྲུབ་ཐུབ་ཀྱི་ཡོད་པ་མ་ཟད། ལོ་རྒྱུས་ཐོག་མི་སྒེར་ཞིག་གིས་སློབ་གླིང་འདི་ལྟ་བུ་བཙུགས་གནང་བ་ཐེངས་དང་པོ་ཡིན་ཞིང་། ལྷག་པར་བཙན་བྱོལ་དུ་ཡོད་པའི་བོད་མི་རྣམས་ནས་དམིགས་དཔེ་བླངས་ཏེ་འགན་འཁུར་བའི་ཐོག་སྐད་ཡིག་སྲུང་སྐྱོབ་བྱ་དགོས་གལ་ཆེ་བའི་སྐོར་གསུངས་གྲུབ་མཚམས་བོད་མི་མང་སྤྱི་འཐུས་དགེ་བཤེས་གངས་རི་ལགས་ཀྱིས་སྤྱིར་རྒྱ་ནག་གཞུང་གིས་རྭ་རྒྱ་ཤེས་རིག་ནོར་གླིང་སློབ་གྲྭ་བཙན་དབང་གིས་སྒོ་བརྒྱབ་བཅུག་པ་དེ་དངོས་ཡོད་ཀྱི་བློ་ཕམ་གྱི་གནས་ཤིག་ཡིན། གང་ཡིན་ཟེར་ན་བོད་ཀྱི་མི་རིགས་དང་རིག་གཞུང་ལ་ཕན་ཚེ་དེར་རྒྱ་ནག་གཞུང་གིས་རྩ་མེད་བཟོ་རྒྱུ་ནི་ཆོས་ཉིད་ཡིན་པ་མ་ཟད། མུ་མཐུད་ནས་དེ་ལྟ་བུའི་བྱུས་ངན་གྱི་བྱ་བཞག་བྱ་ངེས་ཡིན་པས་བསམ་བློའི་ནང་གྲ་སྒྲིག་དགོས་གལ་ཡིན་པ་གསུངས།
དེ་རྗེས་བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་ཕྱི་འབྲེལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་རྒྱ་གཞུང་ནས་བོད་ཀྱི་སློབ་གྲྭ་ཁག་སྒོ་བརྒྱབ་པ་དང་། བོད་ཀྱི་ཆོས་དང་རིག་གཞུང་། མི་རིགས་བཅས་རྩ་མེད་བཟོ་ཐབས་སུ་གཏན་སྡོད་སློབ་གྲྭ་ཁག་ཏུ་བཙན་འཇུག་བྱེད་བཞིན་པའི་སྲིད་བྱུས་ངན་པ་དེར་བོད་མིའི་སྒྲིག་འཛུགས་ངོས་ནས་མཐའ་ཅིག་ཏུ་ངོ་རྒོལ་ཡོད་པ་གསུངས། དེ་བཞིན་ཤེས་རིག་དྲུང་འཕར་བསྟན་འཛིན་པདྨ་ལགས་དང་། བོད་ཀྱི་བུད་མེད་ལྷན་ཚོགས་ཀྱི་ཚོགས་གཞོན་སྐལ་བཟང་སྒྲོལ་མ་ལགས། བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས། བོད་དོན་འབྲེལ་མཐུད་ཁང་གི་བློ་བཟང་དབྱངས་མཚོ་ལགས་བཅས་ཀྱིས་རིམ་བཞིན་བརྗོད་གཞི་དང་འབྲེལ་བའི་ཐོག་དགོངས་ཚུལ་གནང་ཡོད།
མཐར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་རྭ་རྒྱ་སློབ་གླིང་སྒོ་བརྒྱབ་པའི་དོན་རྐྱེན་ལས་བོད་ཡིག་སློབ་གསོའི་མ་འོངས་འཕེལ་ཕྱོགས་ཞེས་པའི་བརྗོད་གཞིའི་ཐོག་གསུང་བཤད་གནང་། ཁོང་གིས་ད་ལྟའི་གནས་སྟངས་ལ་གཞིར་བཞག་པའི་ཐོག་མ་འོངས་མུ་མཐུད་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་བཟོ་རྒྱུ་དང་། བོད་དེ་རྒྱ་ཡུལ་དུ་བསྒྱུར་ཐབས་བྱ་རྒྱུ་ཡིན་པ་གསལ་པོ་རེད། མི་རིགས་ཤིག་རྒྱུན་གནས་པར་མི་རིགས་དེའི་སྐད་ཡིག་དང་རིག་གཞུང་གལ་གནད་ཆེན་པོ་ཡིན་པ་དེ་རྒྱ་གཞུང་གིས་ཤེས་ཀྱི་ཡོད་པས་མི་རིགས་བཙན་བསྒྱུར་གྱི་སྲིད་བྱུས་ལག་བསྟར་བྱེད་བཞིན་ཡོད་པས། བཙན་བྱོལ་བོད་མི་རྣམས་ནས་དེར་སེམས་ཁྲལ་བྱེད་དགོས་པ་གང་ཞིག ཕྱོགས་གཞན་ནས་བོད་ནང་གི་བོད་མི་རྣམས་ལ་བལྟས་ན་སེམས་ཤུགས་སྐྱེ་འོས་པ་ཞིག་ཀྱང་ཡིན་ཞེས་སོགས་གསུངས་རྗེས་གསུང་བཤད་པ་རྣམས་ནས་དྲི་བ་ཁག་ཅིག་ལ་ལན་འདེབས་གསལ་བཤད་གནང་ཡོད་པ་བཅས།།
