༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༧ ཚེས་ ༡༥ ནས་ ༢༧ བར་བཙན་བྱོལ་བོད་མིའི་ཤེས་ཡོན་ལྷན་ཚོགས་དང་ཤེས་ཡོན་སློབ་སྟོན་ཚོགས་ཆུང་གི་ཚོགས་མི་དཔལ་ཁང་སློབ་གཉེར་ཁང་གི་སློབ་སྤྱི་སྤྱི་ཟུར་དཔལ་ཁང་ཉི་མ་དོན་གྲུབ་ལགས་ལྡེ་ར་ལྡུན་ཁུལ་དུ་ཡོད་པའི་བོད་པའི་སློབ་གྲྭ་ཁག་ལ་གཟིགས་སྐོར་ཕེབས་ཡོད།
དེ་ཡང་ཟླ་བ་ ༧ ཚེས་ ༡༥ ཉིན་སེ་ལ་ཀུའི་བོད་ཁྱིམ་སློབ་གྲྭ་དང་། ཚེས་ ༡༦ ཉིན་སེ་ལ་ཀུའི་བོད་ཁྱིམ་ལས་རིགས་སྦྱོང་བརྡར་ལྟེ་གནས་ཁང་། ཚེས་ ༡༧ ཉིན་ཧ་པུར་སྃབྷོ་ཊ་སློབ་གྲྭ། ཚེས་ ༡༨ ཉིན་བདེ་སྐྱིད་གླིང་བོད་ཁྱིམ་སློབ་གྲྭ། ཚེས་ ༢༠ ནས་ ༢༢ བར་མ་སུ་རི་བོད་ཁྱིམ་སློབ་གྲྭ། ཚེས་ ༢༣ ཉིན་མ་སུ་རི་སྃབྷོ་ཊ་སློབ་གྲྭ། ཚེས་ ༢༦ ཉིན་གྷོ་རི་མ་ཕཱི་བོད་ཁྱིམ་སློབ་གྲྭ། ཚེས་ ༢༧ ཉིན་རཱཇ་པུར་བོད་ཁྱིམ་སློབ་གྲྭ་བཅས་ལ་གཟིགས་སྐོར་དང་། འབྲེལ་ཡོད་དགེ་ལས་སློབ་ཕྲུག་དང་ཕ་མ་བཅས་ལ་ལམ་སྟོན་གསུང་བཤད་གནང་ཡོད།
གཟིགས་སྐོར་སྐབས་ཁོང་གིས་སློབ་གྲྭ་ཁག་གི་ནང་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་དང་འབྲེལ་བའི་ལས་དོན་ཇི་སྤེལ་ལ་གཟིགས་ཞིབ་དང་། སློབ་ཁག་ནང་ཆོས་ལུགས་ལ་མ་བརྟེན་པའི་བཟང་སྤྱོད་དང་འབྲེལ་བའི་ཚོགས་ཐེངས་དང་ལས་གཞི་ཇི་སྤེལ་ལ་གཟིགས་ཞིབ། སློབ་ཁག་ཏུ་ཤེས་རིག་ལས་ཁུངས་ནས་འགྲེམས་སྤེལ་ཞུས་པའི་ཀློག་དེབ་རིགས་བེད་སྤྱོད་ཇི་ལྟར་གནང་ཕྱོགས་དང་སྦྲགས། སློབ་གྲྭའི་དཔེ་མཛོད་དང་། འཛིན་ཁང་། ཚན་རིག་བརྟག་དཔྱད་ཁང་། ཉལ་ཁང་། གསོལ་ཚིགས་ཁང་བཅས་སྤྱི་ཡོངས་ཀྱི་གནས་སྟངས་ལ་གཟིགས་ཞིབ་དང་། འཛིན་ཁང་འགའ་ཤས་ཀྱི་སློབ་ཁྲིད་ལའང་རྟོག་ཞིབ་གནང་ཡོད།
ཐེངས་འདིའི་གཟིགས་སྐོར་མཛད་རིམ་ལེགས་གྲུབ་ཡོང་བར་འབྲེལ་ཡོད་སློབ་སྡེ་ཁག་གི་སྤྱི་ཁྱབ་ཡིག་ཚང་གཙོས། སློབ་གྲྭ་ཁག་གི་སློབ་སྤྱིའམ་དགེ་ཆེ་དང་འབྲེལ་ཡོད་ལས་བྱེད་ཡོངས་ནས་མཐུན་འགྱུར་གང་ལེགས་གནང་ཡོད་པ་མ་ཟད། གཟིགས་སྐོར་མཛད་རིམ་གྱི་འགྲོ་གྲོན་ཡོངས་རྫོགས་ཌེ་ནི་ཌ་རོགས་ཚོགས་ནས་མཐུན་འགྱུར་གནང་ཡོད། །
