༄༅། །ཕྱི་ལོ་ ༢༠༢༢ ཟླ་བ་ ༧ ཚེས་ ༡༢ ཉིན་གྱི་སྔ་དྲོ་ ༡༠ ཐོག་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་འོག་ནས་འདས་གྲོངས་སུ་གྱུར་བའི་ཉིན་མོ་དང་བསྟུན། ཁོང་གི་ཚ་མོ་ཉི་མ་ལྷ་མོའི་བདེན་དོན་གླེང་བའི་གཏམ་ཞེས་པའི་དཔེ་དེབ་དབུ་འབྱེད་ཀྱི་མཛད་སྒོ་ཚོགས་ཡོད་པ་དང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཞབས་ཞུ་ཚོགས་པའི་ཚོགས་གཙོ་དགེ་བཤེས་ཚེ་རིང་རྡོ་རྗེ་ལགས། རྩོམ་པ་པོ་རྡོ་རྗེ་རིན་ཆེན་ལགས་སོགས་ཕེབས་ཡོད་པ་རེད།
དེ་ཡང་མཛད་སྒོའི་ཐོག་མར་སྐུ་མགྲོན་གཙོ་བོ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་སྐུ་པར་མདུན་མར་མེ་ཞལ་ཕྱེ་གནང་གྲུབ་མཚམས་རྒྱ་ནག་གཞུང་གི་མནར་གཅོད་འོག་སྐུ་སྲོག་ཤོར་པ་དང་། སྡུག་གྱོང་མྱངས་དང་མྱོང་བཞིན་པའི་རྒྱལ་གཅེས་པ་རྣམས་ཀྱི་ཆེད་གདུང་སེམས་མཉམ་སྐྱེད་ཀྱི་མྱ་ངན་ངག་བཅད་སྐར་མ་གཅིག་རིང་ཞུས།
དེ་རྗེས་སྐུ་མགྲོན་གཙོ་བོ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ཉི་མ་ལྷ་མོའི་བདེན་དོན་གླེང་བའི་གཏམ་ཞེས་པའི་དཔེ་དེབ་དབུ་འབྱེད་གནང་གྲུབ་མཚམས་དཔེ་དེབ་ཀྱི་གནས་ཚུལ་ཞིབ་འབྲི་པ་སློབ་དགེ་རྡོ་རྗེ་རིན་ཆེན་ལགས་ཀྱིས་ངོ་སྤྲོད་གནང་རྗེས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཚ་མོ་ཉི་མ་ལྷ་མོས་དྲ་ལམ་བརྒྱུད་དཔེ་དེབ་དབུ་འབྱེད་དང་འབྲེལ་བའི་གསུང་བཤད་གནང་ཡོད།
སྐབས་དེར་སྐུ་མགྲོན་གཙོ་བོ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། དེ་རིང་གི་ཉིན་མོ་འདི་བརྒྱུད་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་གཙོས་པའི་རྒྱལ་གཅེས་པ་རྣམས་ལ་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་གུས་འདུད་དང་། ཁོང་རྣམ་པའི་སྐུ་ལས་བསྐྱོན་དང་སྐྱོན་བཞིན་པ་དེ་དག་སྙིང་ལ་བཅངས་བའི་ཐོག་དོན་དངོས་སུ་ཆུད་ཟོས་སུ་མ་འགྲོ་བའི་ལས་འགན་ནི་ང་ཚོ་ཚང་མར་ཡོད། ད་ལྟ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་འཚོ་བཞུགས་ཡོད་པའི་བསྐལ་བཟང་གི་དུས་སྐབས་འདིར་བོད་མི་ཡོངས་ནས་མཐུན་སྒྲིལ་རྡོག་རྩ་གཅིག་སྒྲིལ་གྱིས་རང་ཉིད་ཀྱི་རྒྱལ་ཁབ་ཀྱི་རྩ་དོན་སླད་ནུས་པ་མཉམ་སྤུངས་བྱ་རྒྱུ་གལ་ཆེན་པོ་ཡིན། ཞེས་སོགས་ཀྱི་གསུང་བཤད་གནང་ཡོད་པ་བཅས།།
