༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༥ ཉིན་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དྷ་ས་ས་གནས་འགོ་འཛིན་ལས་ཁུངས་ཀྱི་ཚོགས་ཁང་ནང་ཆབ་སྲིད་བཙོན་ཟུར་བྱ་དོར་ཕུན་ཚོགས་དབང་ཕྱུག་ཆེད་རྗེས་དྲན་སྨོན་ལམ་ལ་བཅར་ཡོད་པ་རེད།
དེ་ཡང་ཆབ་སྲིད་བཙོན་ཟུར་བྱ་དོར་ཕུན་ཚོགས་དབང་ཕྱུག་ལགས་ནི། ཕྱི་ལོ་ ༡༩༧༣ ལོར་ལྷོ་ཁ་འཕྱོངས་རྒྱས་སུ་སྐྱེས་ཞིང་། ཕྱི་ལོ་ ༡༩༩༤ ཟླ་ ༥ ཚེས་ ༡༣ ཉིན་ཁོང་གིས་སློབ་གྲྭའི་སྦྱར་པང་སྟེང་ཆབ་སྲིད་དང་འབྲེལ་བའི་ཡིག་ཆ་སྦྱར་བ་དང་། དེ་རྗེས་ཕྱི་ལོ་ ༡༩༩༤ ཟླ་ ༦ ཚེས་ ༣ ཙམ་ལ་སླར་ཡང་སློབ་གྲྭའི་སྦྱར་པང་ཐོག་ཆབ་སྲིད་དང་འབྲེལ་བའི་གཞས་ཚིག་དང་འབོད་སྒྲ་སྦྱར།
དེ་ནས་ཕྱི་ལོ་ ༡༩༩༤ ཟླ་ ༦ ཚེས་ ༤ ཉིན་ཁོང་དང་རོགས་པ་འགས་སྣེ་གདོང་ཟམ་པའི་སྟེང་ཆབ་སྲིད་ཀྱི་ཡིག་ཆ་བཀྲམས་པ་བཅས་ལ་བརྟེན་ནས་ཕྱི་ལོ་ ༡༩༩༤ ཟླ་ ༦ ཚེས་ ༡༥ ཉིན་ཁོང་འཛིན་བཟུང་གིས་ཟླ་ ༧ ཚེས་ ༡༡ ཉིན་ལྷོ་ཁ་རྩེད་ཐང་ཁྲིམས་ཁང་ཟེར་བས་ལོ་ལྔའི་བཙོན་འཇུག་ཁྲིམས་ཐག་བཅད་དེ་གྲྭ་བཞི་བཙོན་ཁང་དུ་བཙོན་བཅུག་བྱས་ནས་མཐར་ཕྱི་ལོ་ ༡༩༩༩ ཟླ་ ༦ ཚེས་ ༡༦ ཉིན་གློད་བཀྲོལ་བཏང་ཡོད་འདུག
ཕྱི་ལོ་ ༢༠༠༠ ཟླ་ ༡༢ ཚེས་ ༨ ཉིན་བཞུགས་སྒར་དུ་བཙན་བྱོལ་ལ་འབྱོར་ཞིང་། ཕྱི་ལོ་ ༢༠༠༤ ལོར་བོད་ཀྱི་དགུ་བཅུ་གསུམ་གྱི་ལས་འགུལ་ཚོགས་པའི་དྲུང་ཆེ་གནང་། མཐར་ཕྱི་ལོ་ ༢༠༢༤ ཟླ་ ༦ ཚེས་ ༢༠ ཕྱི་དྲོ་བྱང་ཨ་རིར་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་ཡོད་པ་བཅས། །
