༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༢༥ ཉིན་སྤྲོད་དཔང་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དབུ་བཞུགས་ཐོག་ཆོས་རིག་ལས་ཁུངས་ཀྱི་དྲུང་ཆེ་གསར་པ་དང་དྲུང་འཕར་དབར་རྩིས་སྤྲོད་རྩིས་ལེན་གྱི་མཛད་སྒོ་སྟབས་བདེ་ཞིག་ཚོགས་ཡོད།
དེ་ཡང་ཐོག་མར་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་ཆོས་རིག་ལས་ཁུངས་སུ་སྤྲོད་དཔང་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་། དྲུང་ཆེ་གསར་པ་བདུད་འདུལ་རྡོ་རྗེ་ལགས། དྲུང་འཕར་ཀུན་དགའ་རྒྱལ་མཚན་ལགས་བཅས་ལྷན་འཛོམས་ཀྱིས་ཕེབས་བསུའི་རྟེན་འབྲེལ་མཚོན་ཆེད་གསོལ་ཇ་ཞལ་ཏོག་འདེགས་འབུལ་ཞུས་རྗེས་སྤྲོད་དཔང་དང་། དྲུང་ཆེ་གསར་པ། དྲུང་འཕར་བཅས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་སྐུ་ཕྱག་དང་སྙན་དར་བསྒྲོན་ཏེ་རྩིས་སྤྲོད་རྩིས་ལེན་གནང་། དེ་ནས་ཆོས་རིག་དྲུང་འཕར་ནས་དྲུང་ཆེ་གསར་པར་ཞབས་སྟེགས་རྩིས་སྤྲོད་གནང་རྗེས་དྲུང་ཆེ་གསར་པར་མཇལ་དར་ཕུལ།
ཕྱེད་ཡོལ་ཆུ་ཚོད་ ༣ པར་ཆོས་རིག་ཚོགས་ཁང་དུ་སྤྲོད་དཔང་དབུ་བཞུགས་ཐོག ཆོས་རིག་དྲུང་ཆེ་དང་ལས་བྱེད་ཚང་འཛོམས་ཀྱིས་རྟེན་འབྲེལ་གསོལ་ཇ་དང་གྲོ་མ་འབྲས་སིལ་འདེགས་འབུལ་ཞུས། དེ་ནས་དྲུང་འཕར་ནས་དྲུང་ཆེ་གསར་པར་ཆོས་རིག་ལས་ཐམ་རྩིས་སྤྲོད་དང་རྟེན་འབྲེལ་མཚོན་བྱེད་མཇལ་དར་ཕུལ། དེ་རྗེས་སྤྲོད་དཔང་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་དྲུང་ཆེ་གསར་པར་རྟེན་འབྲེལ་མཚོན་བྱེད་མཇལ་དར་ཕུལ། དེ་ནས་ཆོས་རིག་ལས་བྱེད་ཡོངས་ནས་དྲུང་ཆེ་ལ་གསར་མཇལ་རྟེན་འབྲེལ་གྱི་མཇལ་དར་ཕུལ།
དེ་ནས་སྤྲོད་དཔང་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་། ཆོས་རིག་དྲུང་འཕར་ཀུན་དགའ་རྒྱལ་མཚན་ལགས། ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་བཅས་ནས་རིམ་པས་གསུང་བཤད་གནང་སྟེ་དྲུང་ཆེ་གསར་པའི་རྟེན་འབྲེལ་མཛད་སྒོ་བདེ་ལེགས་ངང་གྲོལ། 
བདུད་འདུལ་རྡོ་རྗེ་ལགས་ནི། ཕྱི་ལོ་ ༡༩༨༠ ཕྱི་ཟླ་ ༣ ཚེས་ ༡༠ ཉིན་ལ་བྱང་ས་སྨད་དུ་ཕ་དང་ཟུར་ངག་དབང་ཐོགས་མེད་དང་མ་དཀོན་མཆོག་སྒྲོལ་མ་གཉིས་ལ་སྐྱེས་ཤིང་། སྔོན་འགྲོ་ཀ་པ་ནས་འཛིན་རིམ་བཅུ་པ་བར་ལ་དྭགས་བོད་ཁྱིམ་སློབ་གྲྭ་དང་། སྦེལ་ཀོབ་བོད་ཁྱིམ་དུ་ཚོང་ལས་ཐོག་འཛིན་རིམ་བཅུ་གཉིས་ཐོན། དེ་ནས་ཨན་ད་ར་ལོ་ཡོ་ལ་མཐོ་སློབ་ (Andhra Loyola College) ནས་ཚོང་ལས་ཐོག་བསླབ་པ་མཐར་སོན།
ཕྱི་ལོ་ ༢༠༠༡ ཟླ་བ་ ༧ ནས་ལོ་གསུམ་རིང་དཔལ་འབྱོར་རང་ཁོངས་ལས་བྱེད་ངོ་བོར་གངས་སྐྱིད་ལས་བྱེད་གསོལ་ཚང་གི་རྩིས་པའི་ལས་ཁུར་ཞུས། དེ་ནས་ཕྱི་ལོ་ ༢༠༠༥ ནས་ ༢༠༠༧ བར་ཆོད་གན་ཐོག་ལ་དྭགས་ལྷོ་བྱང་བོད་མིའི་མཉམ་འབྲེལ་དྲུང་ཆེ་ལས་ཁུར་ཞུས། ཕྱི་ལོ་ ༢༠༠༨ ཟླ་བ་ ༥ ཚེས་ ༡ ནས་གཞུང་ཞབས་ལ་གསར་འདེམས་གནང་ནས་སྤྱི་ཁྱབ་རྩིས་ཞིབ་ལས་ཁང་གི་དྲུང་གཞོན་གྱི་ལས་ཁུར་ཞུས། དེ་ནས་ཕྱི་ལོ་ ༢༠༠༩ ཟླ་བ་ ༡༡ ཚེས་ ༡༠ ནས་བལ་ཡུལ་རྩིས་ཞིབ་ཡན་ལག་ལས་ཁང་གི་འགན་འཛིན་ལས་རོགས་དང་། ཕྱི་ལོ་ ༢༠༡༠ ཟླ་བ་ ༧ ཚེས་ ༡ ནས་འགན་འཛིན་གྱི་ལས་ཁུར། ཕྱི་ལོ་ ༢༠༡༢ ཟླ་བ་ ༡༢ ཚེས་ ༡༢ ནས་བལ་ཡུལ་དོན་ཁང་གི་དྲུང་ཆེ་དང་བལ་ཡུལ་རྒྱལ་ས་དང་འཕགས་ཤིང་། གློ་ཚེ་རོགས་བཅས་ཀྱི་ས་གནས་འགོ་འཛིན་དང་། ཀཐ་མན་གྲུ་འོས་བསྡུའི་འགན་འཛིན་གཅིག་ལྕོགས་ཀྱི་ལས་ཁུར་ཞུས།
ཕྱི་ལོ་ ༢༠༡༣ ཟླ་བ་ ༡༠ ཚེས་ ༢༩ ནས་སྒང་ཏོག་ས་གནས་འགོ་འཛིན་གྱི་ལས་ཁུར་དང་། ཕྱི་ལོ་ ༢༠༡༦ ཟླ་བ་ ༦ ཚེས་ ༢༩ ནས་ནང་སྲིད་རྩིས་དཔོན་གྱི་ལས་འགན། ཕྱི་ལོ་ ༢༠༢༠ ཟླ་བ་ ༠༢ ཚེས་ ༠༡ ནས་ཆོས་རིག་ལས་ཁུངས་ཀྱི་དྲུང་འཕར་གྱི་ལས་ཁུར། ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༦ ནས་དཔལ་འབྱོར་ལས་ཁུངས་ཀྱི་དྲུང་འཕར་གྱི་ལས་ཁུར། ཕྱི་ལོ་ ༢༠༢༣ ཟླ་བ་ ༠༩ ཚེས་ ༠༤ ནས་བདེ་སྲུང་ལས་ཁུངས་ཀྱི་དྲུང་འཕར་དང་། ཕྱི་ལོ་ ༢༠༢༣ ཟླ་ ༩ ཚེས་ ༢༦ ནས་ཕྱི་ལོ་ ༢༠༢༤ ཟླ་ ༧ ཚེས་ ༢༤ བར་སྣེ་ལེན་ཁང་གི་འགན་འཛིན་གཅིག་ལྕོགས་ལས་ཁུར་བཅས་ཞུས་པའི་ལོ་རྒྱུས་སྙིང་བསྡུས་སུ།།
