༄༅། །སྦེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། པེ་རི་སིའི་འབྲེལ་མཐུད་པ་ཐུབ་བསྟན་ཚེ་རིང་ལགས། ཕ་རན་སིའི་བོད་རིགས་ཚོགས་པའི་ཚོགས་གཙོ་པདྨ་རིན་ཆེན་ལགས་དང་ཚོགས་ཟུར་བསྟན་འཛིན་སྤེན་པ་ལགས་བཅས་ལས་གྲུབ་པའི་བོད་མིའི་སྐུ་ཚབ་ཚོགས་ཆུང་ཞིག་ཕ་རན་སིར་འཚོག་བཞིན་པའི་ཨོ་ལོམ་པིག་རྩེད་འགྲན་ཆེན་མོའི་དབུ་འབྱེད་མཛད་སྒོར་མགྲོན་འབོད་གནང་དོན་ལྟར་ཆེད་ཕེབས་གནང་ཡོད།
སྤྱིར་རྒྱལ་སྤྱིའི་ཨོ་ལོམ་པིག་རྩེད་འགྲན་ཆེན་མོའི་ནང་བོད་མཉམ་ཞུགས་བྱ་རྒྱུ་མེད་ནའང་། བོད་མིའི་སྐུ་ཚབ་སྐུ་མགྲོན་དུ་མགྲོན་འབོད་གནང་བ་དེ་ནི་བོད་དོན་སྐོར་དྲིལ་བསྒྲགས་བྱ་རྒྱུའི་གོ་སྐབས་བཟང་པོ་ཞིག་ཡིན་པ་རེད། ཕ་རན་སིར་མཚོན་ན་བོད་དོན་རྒྱབ་སྐྱོར་ཚོགས་པ་མང་ཤོས་ཡོད་པའི་རྒྱལ་ཁབ་ཅིག་ཡིན་པ་མ་ཟད། ད་ལྟའི་ཆར་བཙན་བྱོལ་བོད་མིའི་གྲངས་འབོར་མང་གྲས་ཡོད་པའི་སྤྱི་ཚོགས་ཤིག་ཀྱང་ཡིན།
དབུ་འབྱེད་མཛད་སྒོའི་སྐབས་བོད་མིའི་སྐུ་ཚབ་རྣམས་ནས་ལག་ཏུ་བོད་ཀྱི་རྒྱལ་དར་བཟུང་སྟེ། བོད་དོན་དྲིལ་བསྒྲགས་དང་འབྲེལ། ཕ་རན་སི་མི་མང་ལྷན་དུ་ལོ་རྒྱུས་རང་བཞིན་ལྡན་པའི་རྩེད་འགྲན་ཆེན་མོའི་དགའ་སྟོན་ལ་མཉམ་རོལ་ཞུས་ཡོད་པ་བཅས།། 
