༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༠ ཉིན་ཨེམ་སི་ཊར་ཌེམ་དུ་ནེ་དར་ལེནྜ་བོད་རིགས་ཚོགས་པ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཡོད། སྐབས་དེར་བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་དང་། སྤྱི་འཐུས་ཐུབ་བསྟན་རྒྱ་མཚོ་ལགས་རྣམ་གཉིས་སྐུ་མགྲོན་གཙོ་བོར་ཕེབས་ཡོད།
གོང་ཚེས་ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་གདན་འདྲེན་ཞུས་གྲུབ་མཚམས་རྟེན་འབྲེལ་མཚོན་བྱེད་གསོལ་ཇ་དང་འབྲས་སིལ་འདེགས་འབུལ་ཞུས་རྗེས་༸གོང་ས་མཆོག་གི་ཞབས་པུས་བདེ་ཐང་སླད་སྨོན་ལམ་གསུང་འདོན་གནང་ཡོད།
དེ་ནས་ནེ་དར་ལེནྜ་བོད་རིགས་ཚོགས་པའི་ཚོགས་གཙོ་ནོར་བུ་ཚེ་རིང་ལགས་ཀྱིས་ཕེབས་བསུའི་གསུང་བཤད་དང་ཆབས་ཅིག ནེ་དར་ལེནྜ་བོད་རིགས་ཚོགས་པའི་དགོས་དམིགས་དང་ལས་གཞི་ཁག་སྐོར་ངོ་སྤྲོད་གནང་། དེ་བཞིན་བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་དང་། སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་དང་འཛམ་གླིང་མི་མང་ལ་བཀའ་དྲིན་ཆེ་ཚུལ་དང་། བོད་མིའི་སྒྲིག་འཛུགས་ཀྱིས་གྲུབ་འབྲས། ད་ལྟའི་བོད་ནང་གི་ཆབ་སྲིད་གནས་སྟངས། བོད་ཀྱི་སྐད་ཡིག་དང་རིག་གཞུང་སྲུང་སྐྱོབ། བོད་མིའི་དཔྱ་ཁྲལ་ལག་དེབ་ཀྱི་གནད་དོན་བཅས་ཀྱི་སྐོར་གསུང་བཤད་གནང་རྗེས། སྦེལ་ཇམ་སྐུ་ཚབ་དོན་ཁང་གི་རྩིས་པ་བསྟན་འཛིན་ནོར་ལྡན་ལགས་ཀྱིས་ནེ་དར་ལེནྜ་བོད་མི་རྣམས་ཀྱི་དཔྱ་ཁྲལ་བསྡུ་རུབ་གནང་ཡོད།
དེ་ནས་སྐུ་མགྲོན་གཙོ་བོ་བོད་མི་མང་སྤྱི་འཐུས་རྣམ་གཉིས་ཀྱིས་གངས་ལྗོངས་རིག་མཛོད་གཟའ་འཇུག་སློབ་གྲྭའི་དང་བླངས་དགེ་རྒན་རྣམས་ལ་མཇལ་དར་དང་ཕྱག་འཁྱེར་གནང་། དུས་ཆེན་དེ་བཞིན་ཉིན་གཉིས་རིང་སྲུང་བརྩི་ཞུས་ཡོད་པ་དང་སྐབས་དེར་མི་མང་ ༦༠༠ ལྷག་གིས་མཉམ་ཞུགས་གནང་ཡོད། །
