༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༡ ཉིན་སྔ་དྲོ་ཆུ་ཚོད་ ༡༡ ཐོག་བོད་ཀྱི་ཟློས་གར་ཚོགས་པའི་གར་གླུའི་རིག་རྩལ་ཁང་དུ་བོད་ཀྱི་ཟློས་གར་ཚོགས་པའི་གོ་སྒྲིག་འོག་ཕྱི་རྒྱལ་ཡུལ་གྲུ་ཁག་ཏུ་གཏན་སྡོད་བོད་རིགས་ན་གཞོན་དམིགས་པའི་དབྱར་དུས་བོད་ཀྱི་ཟློས་གར་སྒྱུ་རྩལ་སྦྱོང་བརྡར་ཟབ་སྦྱོང་ཐེངས་གཉིས་པ་དབུ་འཛུགས་ཀྱི་མཛད་སྒོ་བསྐྱངས་གནང་ཡོད་པ་བཞིན། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་ཟུང་དྲུང་བསྟན་འཛིན་སྒྲོལ་དཀར་ལགས་ཆེད་ཕེབས་གནང་ཡོད།
མཛད་སྒོའི་ཐོག་མར་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་ནས་སྤྱི་ནོར༸གོང་ས་༸སྐྱབས་མགོན་ཆེན་པོའི་སྐུ་དཔར་མཐོང་གྲོལ་རིན་པོ་ཆེར་མཇལ་དར་དང་མར་མེ་ཞལ་ཕྱེ་གནང་རྗེས་རྟེན་འབྲེལ་གསོལ་ཇ་དང་འབྲས་སིལ་འདེགས་འབུལ་ཞུས། དེ་རྗེས་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ནས་སྐུ་མགྲོན་གཙོ་བོ་མཆོག་གིས་གཙོས་བོད་ཀྱི་ཟློས་གར་སྒྱུ་རྩལ་ཐོག་དོན་གཉེར་གྱི་བསམ་པ་ཆེར་བསྐྱེད་ཀྱིས་ཕྱི་རྒྱལ་ཡུལ་གྲུ་གང་ས་ནས་ཕེབས་པའི་བོད་རིགས་གཞོན་སྐྱེས་དང་ཕ་མ་སྤུན་མཆེད་ཡོངས་ལ་འཚམས་འདྲི་དང་འབྲེལ། འདི་ལོའི་སྦྱོང་བརྡར་ཁོངས་ཕྱི་རྒྱལ་ཡུལ་གྲུ་ཁག་ནས་བོད་རིགས་ན་གཞོན་བུ་ ༡༤ དང་བུ་མོ་ ༡༤ ཁྱོན་གྲངས་ ༢༨ མཉམ་ཞུགས་གནང་ཡོད།
སྤྱིར་དབྱར་དུས་བོད་ཀྱི་ཆོས་དང་རིག་གཞུང་ཟབ་སྦྱོང་གནང་མཁན་རྡ་སྟེང་བོད་ཁྱིམ་དང་ས་རཱ་མཐོ་སློབ་སོགས་མང་པོ་ཡོད་ཀྱང་། དེ་རིང་བོད་ཀྱི་ཟློས་གར་ཚོགས་པའི་གོ་སྒྲིག་ཞུས་པའི་ཟབ་སྦྱོང་འདི་ནི་ཧ་ཅང་གི་དམིགས་བསལ་དང་གལ་ཆེན་པོ་ཆགས་ཀྱི་ཡོད། དེའི་ནང་བོད་ཀྱི་ཟློས་གར་རིག་གཞུང་ཐོག་དམིགས་བསལ་གྱི་སློབ་ཁྲིད་གནང་ངེས་པ་བཞིན་ཚང་མས་དོ་སྣང་ཆེན་པོས་སློབ་སྦྱོང་གནང་རྒྱུ་གལ་ཆེན་པོོ་ཡིན་པ་དང་། ཕ་མ་ཚོས་ཀྱང་བོད་ཀྱི་ཟློས་གར་རིག་གཞུང་གལ་ཆེར་འཛིན་ཏེ་རང་གི་ཕྲུ་གུ་ཟབ་སྦྱོང་དེའི་ནང་མཉམ་ཞུགས་གནང་རྒྱུའི་མཐུན་འགྱུར་སྦྱར་གནང་བར་བཀའ་དྲིན་ཆེ་ཞེས་ཞུས།
སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་ནས་གཞོན་སྐྱེས་ཚོས་ཟློས་གར་སྒྱུ་རྩལ་སློབ་སྦྱོང་དང་སློབ་ཁྲིད་བྱ་རྒྱུའི་གོ་སྐབས་བསྐྲུན་ཡོད་པ་དེ་ཡང་ཨ་རི་གཞུང་གི་རོགས་དངུལ་ལས་འཆར་འོག་གོ་སྒྲིག་ཞུས་པ་ཞིག་ཆགས་ཡོད། སྦྱོང་བརྡར་དུས་ཡུན་རིང་འདི་གའི་དགེ་རྒན་རྣམ་པས་སློབ་ཁྲིད་གནང་སྐབས་སློབ་ཕྲུག་ཚོས་དོ་སྣང་ཐོག་སྦྱང་བརྩོན་བྱ་གལ་དང་། གཙོ་བོ་ཕྲུ་གུའི་ཕ་མ་ཚོས་བོད་ཀྱི་སྐད་ཡིག་དང་རིག་གཞུང་གལ་ཆེར་ངོས་འཛིན་གྱིས་ཕྲུ་གུ་ཚོར་མཐུན་འགྱུར་རམ་འདེགས་གནང་བར་རྗེས་སུ་ཡི་རངས་ཞུ་རྒྱུ་དང་། སྦྱོང་བརྡར་གྱི་དུས་ཡུན་འདིའི་ནང་རྐང་བྲོ་གླུ་གཞས་དང་རོལ་ཆ་སོགས་བཀྲོལ་གཏོང་དང་འཁྲབ་སྟོན་ཐུབ་ཙམ་མ་ཡིན་པ་དེ་དག་རྒྱབ་ལྗོངས་ལོ་རྒྱུས་དང་ཁྱད་ཆོས་ཤེས་རྟོགས་ཐུབ་པ་བྱ་རྒྱུ་གལ་ཆེ་ཡིན་པ་གསུངས།
གཞན་ཡང་ཁོང་གིས་ཟབ་སྦྱོང་གི་དུས་ཡུན་འདིའི་ནང་སློབ་ཕྲུག་ཚོས་ཕན་ཚུན་བཀའ་མོལ་གནང་བའི་སྐབས་བོད་སྐད་གཙང་མ་བསྐྱོན་རྒྱུའི་ཐོག་འབད་བརྩོན་གནང་ནས་རིམ་པས་ཡར་རྒྱས་བཏང་སྟེ་མཐར་རང་ཉིད་ཀྱི་གནས་སྡོད་ས་ཁུལ་དུ་ཕྱིར་ལོག་སྐབས་བོད་རིགས་ན་གཞོན་གཞན་ལ་མིག་དཔེ་བཟང་པོ་བསྐྲུན་ཐུབ་པ་དགོས་པ་དང་། དེ་བཞིན་ཟབ་སྦྱོང་གི་ལས་རིམ་ནང་ཡོད་པ་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་བསྟི་གནས་སུ་སྐོར་བསྐྱོད་ཀྱིས་བོད་མིའི་སྒྲིག་འཛུགས་ཀྱི་སྒྲོམ་གཞི་དང་། ཆབ་སྲིད་ལྟ་གྲུབ། དབུ་མའི་ལམ་གྱི་སྲིད་བྱུས་ཀྱི་བྱུང་རིམ་དང་གཏན་འབེབས་གནང་ཕྱོགས་སོགས་ཤེས་རྟོགས་དང་རྒྱུས་ལོན་བྱ་རྒྱུ་གལ་ཆེ་ཡིན་པ་དང་། བོད་པའི་དངོས་ཡོད་རྒྱལ་རབས་ལོ་རྒྱུས་དང་ད་ལྟའི་བོད་ནང་གི་ཛ་དྲག་གནས་སྟངས་ཤེས་རྟོགས་ཐུབ་པའི་ཐོག་རྒྱལ་སྤྱིའི་ནང་དངོས་ཡོད་གནས་སྟངས་བརྒྱུད་སྤེལ་གྱིས་རྒྱབ་སྐྱོར་འཚོལ་བསྒྲུབ་བྱ་རྒྱུ་ང་ཚོ་ཚང་མར་འགན་འཁྲི་ཡོད་པ་སོང་ཚང་མས་གོ་སྐབས་དམ་འཛིན་གྱིས་བོད་སྤྱི་པའི་ལས་དོན་བསྒྲུབ་རྒྱུའི་ཐོག་ལ་ནུས་པ་མཉམ་སྤུངས་བྱ་དགོས་པའི་གསུང་བཤད་གནང་། མཛད་སྒོའི་མཐའ་མར་སྦྱོང་བརྡར་དུ་ཕེབས་པའི་སློབ་ཕྲུག་རྣམས་ནས་དཔལ་ལྡན་སྲིད་སྐྱོང་མཆོག་ནས་དྲི་བ་ཞུས་ཁག་ལ་ལན་འདེབས་གནང་བའི་སྒོ་ནས་མཛད་སྒོ་གྲུབ་སོང་བ་བཅས། །
