༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ནང་གཞུང་འབྲེལ་ཕྱོགས་ཕེབས་གནང་མུས་ལྟར། ཕྱི་ལོ་ ༢༠༢༤ ཟླ་བ་ ༠༧ ཚེས་ ༢༧ ཉིན་ཝི་སི་ཀོན་སོན་མངའ་ཁུལ་བོད་རིགས་མི་མང་ལ་བོད་དོན་འཐབ་རྩོད་དང་། བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སོགས་ཀྱི་སྐོར་གསུང་བཤད་གནང་།
དེ་རྗེས་དཔལ་ལྡན་སྲིད་སྐྱོང་མཆོག་ནས་མི་ནི་སོ་ཊ་དང་། ཅི་ཀ་གོ་གནས་སྡོད་བོད་མི་མང་ཚོགས་དང་ཐུག་འཕྲད་ཀྱིས་བཀའ་ཤག་སྐབས་བཅུ་དྲུག་པའི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་བོད་དོན་བསྟན་པ་ཆབ་སྲིད་ཀྱི་ལས་དོན་འཐུས་ཤོར་མེད་པར་སྒྲུབ་བཞིན་པ་དང་། ལྷག་པར་དུ་བོད་རྒྱའི་དཀའ་རྙོག་སེལ་བར་རྒྱ་ནག་གཞུང་ལྷན་དུ་གྲོས་མོལ་མ་བྱ་ཐབས་མེད་ཡིན་ཞིང་། ཇི་སྲིད་བོད་དོན་བདེན་མཐའ་མ་སེལ་བར་དུ་བཙན་བྱོལ་བོད་མི་རྣམས་ནང་ཁུལ་རྡོག་རྩ་ཆིག་སྒྲིལ་དགོས་རྒྱུ་གལ་གནད་ཆེན་པོ་ཡིན་པ་ནན་བརྗོད་གནང་།
དེ་བཞིན་དཔལ་ལྡན་སྲིད་སྐྱོང་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། བོད་ནང་གི་ཛ་དྲག་གནས་སྟངས་ལ་བརྟེན་ནས་བོད་ཀྱི་གནད་དོན་རྒྱལ་སྤྱིའི་སྡིངས་ཆའི་སྟེང་དུ་སླེབས་ཐུབ་པ་བྱུང་ཡོད་ལ། ཁྱད་པར་དུ་ཉེ་ལམ་ཨ་རི་གཞུང་གིས་བོད་རྒྱའི་རྩོད་རྙོག་སེལ་ཐབས་ལ་དམིགས་ཏེ་ཁྲིམས་ཡིག་གལ་ཆེན་ཞིག་གཏན་འབེབས་གནང་ཐུབ་པ་བྱུང་ཡོད་ཅིང་། དེ་ལ་བརྟེན་ནས་བོད་དོན་ལ་གདེང་འཇོག་ཆེ་རུ་འགྲོ་རྒྱུའི་རེ་བ་ཆེན་པོ་ཡོད་པ་གསུངས།
ཕྱི་ཚེས་ ༢༩ ཉིན་དཔལ་ལྡན་སྲིད་སྐྱོང་མཆོག་གིས་ནིའུ་ཡོག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཚམས་ཞུའི་མཇལ་ཁ་ཞུས་པ་དང་འབྲེལ། མགོན་པོ་མཆོག་གི་སྐུ་ཁམས་དྭངས་སྐྱེད་མྱུར་པོ་འགྲོ་བཞིན་ཡོད་སྐོར་གསུངས་ཡོད་པ་བཅས།། 
