༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གཞུང་དམངས་གཉིས་ལ་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་ཐུགས་རྗེ་ཆེ་ཞུས་གནང་ཡོད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་བྱང་ཐང་སུམ་མདོ་ནས་གསར་འགོད་པ་ཚོར་གསུང་བཤད་གནང་དོན། བོད་ཕྱི་ནང་གཉིས་ཀྱི་བོད་མི་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཨ་རིའི་སྲིད་འཛིན་ཇོ་བྷའི་ཌེན་མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་དེ་ཁྲིམས་སུ་གྱུར་ཡོད་པའི་གཏམ་བཟང་གི་གནས་ཚུལ་རེད། སྐབས་བཅུ་དྲུག་པའི་བཀའ་ཤག་གིས་ལོ་གཉིས་དང་ཟླ་བ་གཉིས་རིང་སྲིད་བྱུས་དེ་དབུ་མའི་ལམ་ཡིན་པ་གང་ཞིག་ཐབས་བྱུས་ལ་འགྱུར་བ་བཏང་སྟེ་དབུ་མའི་མཐའ་གཅིག་ནི་བོད་དེ་ལོ་རྒྱུས་ཐོག་རང་བཙན་ཡིན་པའི་གནས་བབ་ཐོག་ཤུགས་རྒྱག་རྒྱུ་བྱེད་པ་ནང་བཞིན་ཁ་ནས་བཤད་པ་ཙམ་མ་ཡིན་པར་ཁ་ཡོད་ལག་ཡོད་ཀྱི་ཨ་རིའི་གྲོས་ཚོགས་མཉམ་དཀའ་ལས་བརྒྱབ་པའི་རྒྱུ་མཚན་ལ་བརྟེན་ནས་ཡོང་གི་ཡོད་པ་རེད། དེའི་ནང་དཀའ་ལས་རྒྱག་མཁན་མང་པོ་ཡོད། དངོས་སུ་ཕྱག་ལས་གནང་མཁན་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་གཙོས་ལས་བྱེད་རྣམ་པ་དང་། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་རི་ཅཊ་གྷེ་རི་ (Richard Gere) ལགས། རྒྱལ་སྤྱིའི་བོད་དོན་ལས་འགུལ་ཁང་གི་བསྟན་ཆོས་རྒྱ་མཚོ་ལགས། བུ་ཆུང་ཚེ་རིང་ལགས། ཕེ་རན་ཇི་ (Franz) ལགས་བཅས་ཀྱི་ཧུར་ཐག་གནང་ཡོད། དེ་བཞིན་ཨ་རི་ནང་ཡོད་པའི་བོད་པའི་ཞུ་གཏུག་པ་འདི་ལོའི་ཕྱི་ཟླ ༣ ཚེས ༡༡ དང་ ༡༢ ལ་ཉིས་བརྒྱ་ལྷག་ཙམ་ཞིག་ཝ་ཤིང་ཊོན་ཌི་སིར་ཕེབས་ནས་ཁྲིམས་འཆར་འདི་དང་འབྲེལ་བའི་ཐོག་ནས་ཞུ་བསྐུལ་བྱས་ཡོད། བོད་རིགས་སྤྱི་མཐུན་ཚོགས་པ་དང་བོད་དོན་རྒྱབ་སྐྱོར་ཚོགས་པས་དེའི་ཐོག་སྐུ་ལས་ཧ་ཅང་བསྐྱོན་ཡོད། ཚང་མས་སྐུ་ལས་བསྐྱོན་པའི་ཉེར་ལེན་ལ་བརྟེན་ནས་ང་ཚོ་ད་ལྟ་གནས་སྟངས་འདི་འདྲ་ཞིག་ལ་སླེབ་ཐུབ་ཡོད། དེར་བརྟེན། ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། མ་འོངས་པ་ཡིན་ནའང་འདི་ལྟ་བུའི་ལས་ཀ་མང་པོ་ཞིག་བྱེད་དགོས་ཐུག་གི་རེད། ཚང་མས་མཉམ་རུབ་ཀྱི་ཐོག་ནས་ནུས་པ་མཉམ་སྤུངས་བྱེད་པ་ཡིན་ན་དོན་དག་སྒྲུབ་རྒྱུ་ཡོད་པ་འདི་ནས་ཁུངས་སྐྱེལ་ཐུབ་པའི་གནས་སྟངས་ཆགས་ཡོད།
ད་རེས་གཙོ་བོ་ཐུགས་རྗེ་ཆེ་ཞུ་དགོས་ས་དེ་ཨ་རིའི་སྲིད་འཛིན་ཇོ་བྷའི་ཌེན་མཆོག་དང་། ཨ་རིའི་གྲོས་ཚོགས་འོག་མའི་ནང་ཁྲིམས་འཆར་འདོན་མཁན་མ་ཧི་ཀལ་མེག་ཀོལ་ (Michael McCaul) མཆོག་དང་། ཇིམ་མེག་གྷོ་ཧན་ (Jim McGovern) མཆོག་གིས་གཙོས་འབྲེལ་ཡོད་ལས་བྱེད་རྣམ་པ། དེ་བཞིན་གྲོས་ཚོགས་གོང་མའི་ནང་ཀྲོཊ་ཡོང་ (Todd Young) མཆོག་དང་། ཇེབ་མར་ཀི་ལི་ (Jeff Merkley) མཆོག སྐུ་ཞབས་བྷེན་ཁར་ཌིན་ (Ben Cardin) མཆོག་གིས་རྒྱབ་སྐྱོར་ལ་བརྟེན་ནས་བྱུང་ཡོད་པར་བརྟེན་གྲོས་ཚོགས་འཐུས་མི་རྣམ་པ་དང་། ལས་བྱེད་མང་པོ་ཞིག་འབྲེལ་བ་ཡོད་པར་བརྟེན་ཚང་མར་བོད་ཕྱི་ནང་གཉིས་ཀྱི་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་རྒྱུ་ཡིན།
