༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་བྱང་ཐང་ཉོ་མར་འཚམས་གཟིགས་ཕེབས་ཡོད་པ་རེད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཉོ་མར་ཕེབས་འབྱོར་སྐབས་ས་གནས་མི་མང་རྣམས་ནས་ཕེབས་བསུ་གཟབ་རྒྱས་ཞུས་རྗེས་དཔལ་ལྡན་སྲིད་སྐྱོང་མཆོག་གིས་ལས་གཞི་ཁག་ལ་གཟིགས་སྐོར་དང་། བྱང་ཐང་ཉོ་མའི་བོད་ཁྱིམ་སློབ་གྲྭར་འཚམས་གཟིགས་དང་། དགེ་ལས་སློབ་ཕྲུག་རྣམས་ལ་གསུང་བཤད་གནང་ཡོད།
གོང་ཚེས་ཉིན་གྱི་ཕྱི་དྲོ་དཔལ་ལྡན་སྲིད་སྐྱོང་མཆོག་གིས་མི་མང་རྣམས་ལ་གསུང་བཤད་གནང་སྐབས་བོད་ཀྱི་མཐོ་སྒང་དང་ཁོར་ཡུག་གི་གལ་གནད། དེ་བཞིན་རྒྱ་ནག་གཞུང་གིས་བོད་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་སོགས་ལ་དམ་བསྒྲགས་བྱེད་བཞིན་ཡོད་པས་དེ་དག་སྲུང་སྐྱོབ་བྱ་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་གསུངས། རྒྱ་ནག་གཞུང་གིས་མུ་མཐུད་དྲག་གནོན་དང་སྟངས་འཛིན་བྱེད་བཞིན་ཡོད་ཀྱང་། བོད་མིའི་སྒྲིག་འཛུགས་ཀྱིས་གཏན་འབེབས་གནང་བའི་དབུ་མའི་ལམ་ནི་བོད་རྒྱའི་དཀའ་རྙོག་སེལ་ཐབས་ཁ་ཡོད་ལག་ཡོད་ཀྱི་སྲིད་བྱུས་ཤིག་ཡིན་པའི་ནན་བརྗོད་གནང་བ་དང་། ཉེ་ཆར་ཨ་རིའི་གྲོས་ཚོགས་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེར་ཕྱོགས་གཉིས་ཀས་སྤྱིས་མོས་ཐོག་རྒྱབ་སྐྱོར་ཐོབ་ཡོད་པ་དང་འབྲེལ་དེའི་གལ་གནད་སྐོར་འགྲེལ་བརྗོད་གནང་ཡོད།
ཉིན་དེར་དཔལ་ལྡན་སྲིད་སྐྱོང་མཆོག་གིས་ས་གནས་ཀྱི་གནད་ཡོད་མི་སྣ་ཁག་ཐུག་འཕྲད་ཀྱིས་མི་མང་རྣམས་ཀྱི་འཚོ་བ་ཡར་རྒྱས་གཏོང་ཕྱོགས་བཅས་ཀྱི་སྐོར་བཀའ་མོལ་གནང་ཡོད་པ་བཅས།།
