༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་གཞུང་འབྲེལ་གཞིས་ཆགས་འཚམས་གཟིགས་ཐེངས་གཉིས་པ་ལ་དྭགས་གླེ་བྱང་གཉིས་ནས་དབུ་འཛུགས་གནང་ཡོད། 

དེ་ཡང་གོང་ཚེས་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་དྭགས་གླེའི་བ་ཀུ་ལ་རིན་པོ་ཆེའི་གནམ་ཐང་དུ་ཕེབས་འབྱོར་སྐབས་ལ་སྤྱི་དོན་གྲུབ་བཀྲ་ཤིས་ལགས་དང་། ལ་དྭགས་ས་གནས་ཁྲིམས་ཞིབ་པ་པདྨ་བཟང་པོ་ལགས། ས་གནས་འཐུས་ཚོགས་ཀྱི་ཚོགས་གཙོ་དོན་གྲུབ་ཚེ་རིང་ལགས། ས་གནས་རང་བདེན་ཚོགས་ཆུང་གི་ཚོགས་གཙོ། ས་གནས་མཉམ་འབྲེལ་གྱི་ཚོགས་གཙོ། དགོན་སྡེ་ཁག་གི་སྐུ་ཚབ། ས་གནས་འཕྲོད་བསྟེན་སྨན་ཁང་། ཡན་ལག་སྨན་རྩིས་ཁང་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལ་སྤྱི་ལས་ཁུངས་དང་། ས་གནས་ཁྲིམས་ཞིབ་ལས་ཁུངས། ས་གནས་འཕྲོད་བསྟེན་སྨན་ཁང་། ལྕོག་ལམ་སར་འགྲོ་ཕན་བོད་ཀྱི་སྨན་རྩིས་ཁང་། མཉམ་འབྲེལ་ལས་ཁུངས། ས་གནས་རང་བདེན་ཚོགས་ཆུང་བཅས་སུ་འཚམས་གཟིགས་དང་འབྲེལ། ཚོགས་སྡེ་སོ་སོའི་ལས་ཀྱི་སྣེ་བོ་དང་ལྷན་མཇལ་མོལ་གྱིས་གཞིས་ཆགས་སྲ་བརྟན་ཚུགས་ཐབས་དང་། གཞིས་མིའི་བདེ་སྡུག་སྙན་སེང་ཇི་ཞུས་ཁག་ལ་རྒྱུས་ལོན་གསན་བཞེས་གནང་ཡོད། ཐེངས་འདིའི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་འཚམས་གཟིགས་སྐབས་ལ་སྤྱི་དོན་གྲུབ་བཀྲ་ཤིས་ལགས་དང་། ལ་དྭགས་ས་གནས་ཁྲིམས་ཞིབ་པ་པདྨ་བཟང་པོ་ལགས། ས་གནས་འཐུས་ཚོགས་ཀྱི་ཚོགས་གཙོ་དོན་གྲུབ་ཚེ་རིང་ལགས། དེ་བཞིན་ནང་སྲིད་ཟུང་དྲུང་བཀྲ་ཤིས་བདེ་སྐྱིད་ལགས་དང་། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འབྲེལ་ལས་བཅས་ལྷན་བཅར་ཞུས་ཡོད་པ་རེད། ལ་སྤྱི་དོན་གྲུབ་བཀྲ་ཤིས་ལགས་ཀྱིས་གསར་འགོད་པར་འགྲེལ་བརྗོད་གནང་དོན་ལྟར་ན། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་གཞུང་འབྲེལ་འཚམས་གཟིགས་ཐེངས་གཉིས་པའི་ནང་ལ་དྭགས་བསོད་ནམས་གླིང་གཞིས་ཆགས་དང་། བྱང་ཐང་གནས་སྡོད་བོད་མིའི་གཞིས་ཆགས་ཁག་ཏུ་བོད་མིའི་བདེ་དོན་དགོས་མཁོ་ཇི་ཡོད་རྟོག་ཞིབ་དང་། ས་གནས་སོ་སོར་འགྲོ་བཞིན་པའི་ལས་གཞི་ལས་འཆར་ཁག་ལ་གཟིགས་ཞིབ་གནང་རྒྱུ་མ་ཟད། ལ་དྭགས་དབུས་སྐྱོང་མངའ་སྡེའི་གནད་ཡོད་དཔོན་རིགས་སོགས་དང་མཇལ་འཕྲད་གནང་འཆར་ཡོད་པ་གསུངས་ཡོད་པ་བཅས།།