༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་མ་ཡུམ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་མྱ་ངན་ཐུགས་གསོ་དང་འབྲེལ། དཀའ་སྡུག་ཆེ་བའི་དུས་སྐབས་འདིར་བོད་མི་ཡོངས་ཀྱི་ཚབ་ཞུས་ཏེ་གདུང་སེམས་མཉམ་སྐྱེ་ཞུས་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གི་ཐུགས་གསོའི་གསུང་འཕྲིན་ནང་། སྐུ་ཉིད་ཀྱི་མ་ཡུམ་ལས་བཟང་ལགས་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་བྱུང་བར་མྱ་ངན་གུས་འདུད་དང་བཅས་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ། ཐུགས་གསོ་ཞུ་རྒྱུ་མ་ཟད། དཀའ་སྡུག་ཆེ་བའི་དུས་སྐབས་འདིར་ང་ཚོས་སྐུ་ཉིད་ཀྱི་ལྟོས་བཅས་ནང་མི་ལྷན་རྒྱས་ལ་གདུང་སེམས་མཉམ་སྐྱེ་དང། ཚེ་འདས་དམ་པ་དེ་ཉིད་ཀྱི་ཆེད་བསྔོ་བ་སྨོན་ལམ་འདེབས་ཀྱི་ཡོད།
བོད་མི་རྣམས་ནས་སྐུ་ཉིད་ལ་གུས་བརྩི་ཆེན་པོ་བྱེད་ཀྱི་ཡོད་པས། དཀའ་ངལ་ཆེ་བའི་དུས་ཚིགས་འདིར་བོད་མི་རྣམས་ནས་གདུང་སེམས་མཉམ་སྐྱེ་དང། ཨ་རུ་ན་ཅལ་མངའ་སྡེའི་མི་མང་དང་ལྷན་དུ་ཚེ་འདས་མ་ཡུམ་ལས་བཟང་ལགས་ཀྱི་ཆེད་མྱ་ངན་གུས་འདུད་ཞུ་གི་ཡོད།
བོད་སྐད་ནང་ལས་བཟང་ཞེས་པ་ནི་ལས་བཟང་པོ་ཞེས་པའི་དོན་ཡིན་པ་ལྟར། ཁོང་མོས་སྐུ་ཉིད་ལྟ་བུ་མི་མང་གི་སླད་ཞབས་འདེགས་སྒྲུབ་མཁན་ཞིག་བཙས་པ་ནི་མིང་དོན་མཚུངས་པ་རེད། ཁོང་མོའི་མཚན་རང་གིས་སྐུ་ཉིད་ལྟ་བུའི་སྙིང་རྗེ་ལྡན་པའི་དབུ་ཁྲིད་ཅིག་གསོ་སྐྱོང་གནང་བའི་ལས་བཟང་པོ་མཚོན་གྱི་ཡོད། ཁོང་མོའི་མཛད་རྗེས་དེ་དག་སྐུ་ཉིད་ཀྱི་བྱམས་བརྩེ་ལྡན་པའི་དབུ་ཁྲིད་ལམ་སྟོན་བརྒྱུད་ནས་མུ་མཐུད་གསལ་ངེས་རེད།
ང་ཚོ་བོད་མི་རྣམས་ནས་ཨ་མ་ལས་བཟང་ལགས་མགྱོགས་ནས་མྱུར་དུ་དལ་འབྱོར་མི་ལུས་འཐོབ་པའི་སྨོན་ལམ་ཞུ་རྒྱུ་ཡིན། ཞེས་གསུངས་ཡོད་པ་བཅས།།
