༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༡༩ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཌར་ཕེབས་འབྱོར་སྐབས་ཁེ་ན་ཌའི་ཨོན་ཊེ་རིའོ་ (Ontario) བོད་རིགས་སྤྱི་མཐུན་ཚོགས་པ་དང་། ཁེ་ན་ཌ་གངས་ལྗོངས་ཆོས་ལྡན་གླིང་གི་ཚོགས་གཙོ་གཙོས་པའི་རྒྱུན་ལས་རྣམ་པ། ས་གནས་ཀྱི་བོད་མིའི་ཚོགས་པ་ཁག་གི་ལས་སྣེ་རྣམ་པ་བཅས་ནས་ཕེབས་བསུའི་སྣེ་ལེན་ཞུས་ཡོད་པ་དང་། ཕྱི་ཚེས་ ༢༠ རེས་གཟའ་སྤེན་པའི་ཉིན་ཁེ་ན་ཌ་གངས་ལྗོངས་ཆོས་ལྡན་གླིང་ཚོགས་ཁང་དུ་དཔལ་ལྡན་སྲིད་སྐྱོང་སྤེན་པ་མཆོག་དབུ་ཞུགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞབས་པུས་བཤག་བཅོས་ལེགས་འགྲུབ་བྱུང་བ་དང་། ཨ་རིའི་སྲིད་གཞུང་ནས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བ། དེ་བཞིན་ཁེ་ན་ཌའི་གྲོས་ཚོགས་འོག་མའི་ནང་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་གྱིས་གྲོས་ཆོད་སྤྱི་མོས་ཀྱིས་གཏན་འབེབས་གནང་བ་བཅས་རྟེན་འབྲེལ་གསུམ་འཛོམས་ཀྱི་དགའ་སྟོན་མཛད་སྒོ་ཞིག་འཚོགས་ཡོད་པ་རེད།མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཁེ་ན་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇེམ་སི་མ་ལོ་ནི་ (James Maloney) མཆོག  བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་སྡེ་ཚན་གྱི་འགན་འཛིན་བུ་ཆུ་ཚེ་རིང་ལགས། ཁེ་ན་ཌའི་བོད་དོན་ལྷན་ཚོགས་ཀྱི་འགན་འཛིན་ཤེས་རབ་མཐར་ཕྱིན་ལགས་ཀྱིས་གཙོས་ས་གནས་བོད་མི་མང་ཚོགས་ལྷན་འཛོམས་གནང་ཡོད། སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་སྐབས་ ༡༦ ངོས་ནས་དབུ་མའི་ལམ་གྱི་སྲིད་བྱུས་ལ་གདེང་འཇོག་ཡོང་སླད་བོད་ཀྱི་དངོས་ཡོད་ལོ་རྒྱུས་ཀྱི་གནས་བབ་ཐད་རྒྱལ་སྤྱིའི་སྲིད་གཞུང་ཁག་ལ་ཞུ་སྐུལ་དང་འབྲེལ། འདས་པའི་ལོ་གཉིས་ནང་འབྲེལ་ཡོད་ཚང་མས་སྐུ་ལས་བསྐྱོན་པ་ལ་བརྟེན་ནས་ཉེ་ལམ་ཕྱི་ཟླ་ ༧ ཚེས་ ༡༢ ཉིན་ཨ་རིའི་སྲིད་གཞུང་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཡོད་པ་དང་། ཕྱོགས་མཚུངས་ཉེ་ལམ་ཕྱི་ཟླ་ ༦ ཚེས་ ༡༠ ཉིན་ཁེ་ན་ཌའི་གྲོས་ཚོགས་འོག་མའི་ནང་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་གྱིས་གྲོས་ཆོད་སྤྱི་མོས་ཀྱིས་གཏན་འབེབས་གནང་ཐུབ་པ་བྱུང་ཡོད་སྐོར་གསུང་ཡོད་པ་རེད། ལྷག་པར་དཔལ་ལྡན་སྲིད་སྐྱོང་མཆོག་གིས་རིང་མིན་ཟླ་བ་འདིའི་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུ་རྒྱུ་ཡིན་ཞེས་སོགས་གསུང་ཡོད་པ་རེད།ཁེ་ན་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇེམ་སི་མ་ལོ་ནི་ (James Maloney) མཆོག་གིས། ཁེ་ན་ཌའི་གྲོས་ཚོགས་འོག་མའི་ནང་བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པའི་མི་རིགས་ཤིག་དང་རྒྱལ་ཁབ་ཤིག་ཡིན་པར་ངོས་འཛིན་བྱེད་པའི་གྲོས་ཆོད་བཞག་ཡོད་པ་དང་། ཨ་རིའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཐུབ་པ་འདི་ནི་བོད་མི་རྣམས་ཀྱིས་ཐུན་མོང་གིས་དཀའ་ལས་བརྒྱབ་པའི་འབྲས་བུ་ཞིག་ཡིན། ཁོང་དང་འབྲེལ་ཡོད་འཐུས་མི་ཚོས་གང་གནང་དགོས་མིན་ཐད་དགོངས་བཞེས་གནང་བའི་ཐོག་མུ་མཐུད་བོད་དོན་ལ་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་སྐོར་སོགས་གསུང་བཤད་གནང་ཡོད་པ་བཅས།།