༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཊ་གནས་སྡོད་བོད་མི་ཉི་མ་རྒྱལ་མཚན་ལགས་སུ་ཁེ་ན་ཊའི་ཆེས་མཐོའི་སྤྱི་དམངས་གཟེངས་རྟགས་ (Order of Canada) ཞེས་པ་ཐོབ་པར་འཚམས་འདྲི་གནང་ཡོད།

དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། སྐུ་ཉིད་ལ་ཁེ་ན་ཊའི་སྙན་གྲགས་ཆེ་བའི་སྤྱི་དམངས་གཟེགས་རྟགས་ (Order of Canada) ཐོབ་པར་ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན།

ཆེ་མཐོང་འདིས་ཁྱེད་ཀྱིས་ཤེས་ཡོན་གྱི་གོ་སྐབས་གོང་འཕེལ་དུ་གཏོང་བའི་བྱས་རྗེས་དང་། ལྷག་པར་ཁལ་ཀར་རི་མཐོ་སློབ་ཀྱི་ཤུ་ལིག་སིའི་བཟོ་བཀོད་སློབ་གླིང་དུ་ཉམས་གསོག་ལས་གཞི་བརྒྱུད་ཁེ་ན་ཌའི་གཞོན་སྐྱེས་གྲངས་ལས་འདས་པའི་མི་ཚེའི་ཁ་ཕྱོགས་བསྒྱུར་ཡོད་པར་མ་ཟད། ཁྱེད་ཀྱིས་བོད་ཀྱི་སྤྱི་ཚོགས་ལ་ཞབས་ཞུ་བསྒྲུབ་རྒྱུའི་ཆོད་སེམས་བརྟན་པོ་ཡོད་པ་མཚོན་གྱི་ཡོད།

ཁྱེད་ཀྱི་བོད་དོན་ལས་གཞི་ (Project Tibet Society) ཚོགས་པའི་ཚོགས་གཙོའི་ལས་ཁུར་བཞེས་པའི་སྐབས་བོད་མི་སྟོང་ཕྲག་གཅིག་ལྷག་ཁེ་ན་ཌར་གནས་སྤོ་ལེགས་འགྲུབ་བྱུང་བར་རོགས་རམ་ཤུགས་ཆེ་གནང་ཡོད་ལ། ཁྱེད་ཀྱི་དབུ་ཁྲིད་ལམ་སྟོན་ལ་བརྟེན་ནས་བོད་མི་ཚོའི་འཚོ་བ་ཇེ་ལེགས་སུ་བཏང་ཡོད་པ་མ་ཟད། བཙན་བྱོལ་བོད་མིའི་སྤྱི་ཚོགས་དང་རིག་གཞུང་མི་ཉམས་རྒྱུན་འཛིན་དང་། བོད་དོན་ཞུ་གཏུག་གི་ལས་གཞིར་ཕན་ཐོགས་ཆེན་པོ་བྱུང་ཡོད།

ཁྱེད་ཀྱིས་མི་ཚེ་ཧྲིལ་པོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་དོན་འཐབ་རྩོད་ལ་ཞབས་ཞུ་བསྒྲུབ་རྒྱུའི་ཆོད་སེམས་བརྟན་པོ་ཞིག་བཟུང་བ་དེ་ནི། ང་ཚོའི་བོད་དོན་ལས་འགུལ་ཁྲོད་འགོ་ཁྲིད་ཀྱི་དཔེ་མཚོན་ནུས་ལྡན་ཞིག་ཡིན། བོད་མིའི་མི་རབས་རྗེས་མ་རྣམས་ཀྱིས་ཁྱེད་ཀྱི་རྗེས་སུ་འབྲངས་ན། ཁྱེད་ཀྱི་བྱས་རྗེས་ཀྱི་ཤུགས་རྐྱེན་སྔར་བས་ཀྱང་ཆེ་བར་འགྱུར་བའི་གདེང་ཚོད་ཡོད། ཅེས་འཁོད་ཡོད་པ་བཅས།།