༄༅། །ཕྱི་ལོ་ ༢༠༢༤ ཟླ་བ་ ༧ ཚེས་ ༡༥ ཉིན་དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ཊོ་རོན་ཊོ་གངས་ལྗོངས་བོད་ཀྱི་སྐད་དང་རིག་གཞུང་སློབ་གྲྭའི་དཔེ་སྟོན་ལས་རིམ་ཐོག་མཉམ་ཞུགས་གནང་མཁན་སློབ་ཕྲུག་རྣམས་དང་མཇལ་འཕྲད་གནང་ཡོད།
དེ་ཡང་དཔལ་ལྡན་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་བཙན་བྱོལ་རང་དབང་ལུང་པར་གནས་འཁོད་བོད་མི་རྣམས་ལ་རང་མི་རིགས་ཀྱི་སྐད་ཡིག་དང་རིག་གཞུང་ཐོག་སློབ་སྦྱོང་བྱེད་རྒྱུའི་གོ་སྐབས་ཡོད་པར་གོ་སྐབས་དམ་འཛིན་གནང་དགོས་པའི་སྐོར་ལམ་སྟོན་ཡོད། དེ་བཞིན་བདེ་སྲུང་བཀའ་བློན་མཆོག་གིས་རྒྱ་ནག་གཞུང་གིས་དབང་སྒྱུར་འོག་གཞིས་བཞུགས་བོད་རྒྱ་ཆེ་མི་མང་ལ་དེ་ལྟ་བུའི་རང་དབང་མེད་པའི་སྐོར་གསུངས་ཤིང་། ཉེ་ལམ་རྒྱ་ནག་གཞུང་གིས་རྭ་རྒྱ་གངས་ལྗོངས་ཤེས་རིག་ནོར་བུའི་གླིང་བཙན་དབང་གི་སྒོ་བརྒྱབ་པའི་ཡིད་སྐྱོའི་གནས་ཚུལ་སྐོར་དང་འབྲེལ་བོད་མིའི་སྒྲིག་འཛུགས་ནས་བློ་ཕམ་ཡོད་པ་གསུང་ཡོད་པ་རེད།
གཞི་རྩའི་ཊོ་རོན་ཊོ་གངས་ལྗོངས་བོད་ཀྱི་སྐད་ཡིག་དང་རིག་གཞུང་སློབ་གྲྭའི་དཔེ་སྟོན་ལས་རིམ་འདི་བཞིན་ཊོ་རོན་ཊོ་གངས་ལྗོངས་བོད་ཀྱི་སྐད་དང་རིག་གཞུང་སློབ་གྲྭ་དང་། བོད་མིའི་སྒྲིག་འཛུགས་ཤེས་རིག་ལས་ཁུངས། མེས་དབོན་གཙུག་ལག་དཔེ་སྟོན་སློབ་གྲྭ་བཅས་ཐུན་མོང་ནས་གོ་སྒྲིག་གནང་བ་ཞིག་རེད་འདུག སློབ་མ་ཁོང་རྣམ་པས་མེས་དབོན་གཙུག་ལག་དཔེ་སྟོན་གྲྭའི་ཉིན་རེའི་བྱེད་སྒོ་ཁག་ལ་མཉམ་ཞུགས་ཀྱིས་བོད་ཀྱི་སྐད་ཡིག་དང་རིག་གཞུང་སོགས་ལ་སློབ་གཉེར་གནང་འདུག་ལ། ཕྱི་ཚེས་ ༡༥ ནས་དབུ་འཛུགས་ཀྱིས་བདུན་ཕྲག་གཅིག་ཙམ་གྱི་རིང་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་ཤེས་ཡོན་བསྟི་གནས་ཁག་སོགས་ལ་ཤེས་ཡོན་ལྟ་སྐོར་དུ་ཕེབས་ཀྱི་ཡོད་པ་རེད། ལས་རིམ་འདིའི་ནང་སློབ་མ་གྲངས་ ༡༠ དང་སྣེ་ཁྲིད་དགེ་ལས་ ༣ བཅས་མཉམ་ཞུགས་གནང་འདུག །
