༄༅། །འདི་གར་ཐའེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༧ ཚེས་ ༩ ཉིན་རྒྱབ་ཆུ་ཚོད་ ༢ ནས་ ༤ བར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་མཆོད་ཁང་དུ་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་དང་། ཐའེ་ཝན་གཞུང་ཁོངས་མིན་པའི་ཚོགས་པ་ཐུན་མོང་ནས་ཐའེ་ཝན་གནས་བཞུགས་བོད་མི་ཡོངས་ལ་དབུ་མའི་ལམ་གྱི་གོ་རྟོགས་སྤེལ་གནང་ཡོད།
དེ་ཡང་མཛད་སྒོའི་དང་ཐོག་ཐའེ་ཝན་དོན་གཅོད་ལས་ཁུངས་ཀྱི་དྲུང་ཆེ་ནས་རྒྱལ་སྤྱིའི་དབུ་མའི་ལམ་ལས་འགུལ་ཚོགས་པའི་ཚོགས་གཙོ་དང་རྒྱུན་ལས་བཅས་ཐའེ་ཝན་དུ་ཕེབས་པར་འཚམས་འདྲི་དང་སྦྲགས། དབུ་མའི་ལམ་ནི་བོད་མིའི་སྒྲིག་འཛུགས་ཀྱི་བོད་དོན་བདེན་མཐའ་སེལ་ཐབས་ཀྱི་སྲིད་བྱུས་གལ་གནད་ཅན་ཞིག་ཇི་ལྟར་ཡིན་མིན་སྐོར་འགྲེལ་བརྗོད་ཞུས། དེ་ནས་རྒྱལ་སྤྱིའི་དབུ་མའི་ལམ་ལས་འགུལ་ཚོགས་པའི་ཚོགས་གཙོ་དགེ་བཤེས་བློ་བཟང་ཆོས་འཕེལ་ལགས་ནས་དབུ་མའི་ལམ་གྱི་བྱུང་རིམ་སྐོར་འགྲེལ་བརྗོད་གནང་རྗེས་དྲུང་ཆེ་བསྟན་འཛིན་བཤེས་གཉེན་ལགས་ཀྱིས་བོད་ཀྱི་ལོ་རྒྱུས་གནས་བབ་དང་། བོད་རྒྱའི་དཀའ་རྙོག་གི་ངོ་བོ་བཅས་འགྲེལ་བརྗོད་གནང་། དེའི་རྗེས་ལས་བྱེད་ཚེ་དབང་རྒྱལ་མཚན་ལགས་ནས་བོད་ནང་གི་ཛ་དྲག་གནས་སྟངས་སྐོར་འགྲེལ་བརྗོད་གནང་རྗེས་མང་ཚོགས་ཀྱི་དྲི་བ་ཁག་ལ་ལན་འདེབས་གནང་ཡོད། དེ་ནས་ཐའེ་ཝན་དོན་གཅོད་ལས་ཁུངས་ཀྱི་ཁྱབ་ཁོངས་གངས་ལྗོངས་པར་སྐྲུན་ཁང་ནས་པར་སྐྲུན་ཞུས་པའི་བོད་འདི་ལོ་རྒྱུས་ཐོག་ནས་རྒྱ་ནག་གི་ཆ་ཤས་ནམ་ཡང་མིན་ཞེས་པའི་རྒྱ་ཡིག་ཐོག་ཡོད་པའི་དེབ་རེ་དང་མཇལ་དར་བཅས་ཕུལ་ཏེ་སྐུ་དཔར་མཉམ་སྒྲོན་དང་ཐའེ་ཝན་དུ་ཕེབས་བསུའི་ཞལ་ལག་བཅས་འདེགས་འབུལ་ཞུས་གནང་ཡོད།
ཐའེ་ཝན་གཞུང་ཁོངས་མིན་པའི་ཚོགས་པ་ཁག་ནས་གདན་ཞུས་དང་གོ་སྒྲིག་འོག་རྒྱལ་སྤྱིའི་དབུ་མའི་ལམ་ལས་འགུལ་ཚོགས་པའི་ཚོགས་གཙོ་དང་རྒྱུན་ལས་རྣམ་པ་ཕྱི་ལོ་ ༢༠༢༤ ཟླ་ ༧ ཚེས་ ༥ ནས་ ༡༢ བར་ཐའེ་ཝན་གྱི་རྒྱལ་ས་ཐའེ་པེ་དང་། ཐའེ་ཝན་དབུས་ཀྱི་མངའ་སྡེ་ཐའེ་ཅོང་བཅས་སུ་དབུ་མའི་ལམ་གྱི་གོ་རྟོགས་ལས་འགུལ་སྤེལ་ཡོད་པ་ལྟར། མི་མང་དངོས་སུ་འདུ་འཛོམས་དང་དྲ་ཐོག་བཅས་ནས་གསན་གཟིགས་གནང་མཁན་ ༦༠༠༠ ལྷག་བྱུང་ཡོད་པས་ཐའེ་ཝན་དུ་དབུ་མའི་ལམ་གྱི་གོ་རྟོགས་རྒྱ་ཆེ་སྤེལ་ཐུབ་པ་བྱུང་ཡོད་པ་བཅས།། 
