༄༅། །ཏི་ཛུ་དར་རྒྱས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༤ ཟླ་བ་ ༧ ཚེས་ ༦ ཉིན་ཏི་ཛུ་དར་རྒྱས་གླིང་ས་གནས་འགོ་འཛིན་ལས་ཁུངས་ཀྱི་གོ་སྒྲིག་འོག་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༩ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཉིན་སྐུ་མགྲོན་གཙོ་བོ་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་གཞོན་པ་ཅོཧ་ན་མེན་ (Chowna Mein) མཆོག་དང་། རྫོགས་ཆེན་དགའ་ནོར་རིན་པོ་ཆེ་མཆོག ཨ་རུ་ན་ཅལ་མངའ་སྡེའི་བློན་ཆེན་གཉིས། ཨ་རུ་ན་ཅལ་སྡེའི་གྲོས་ཚོགས་འཐུས་མི་བཞི། གཞན་ཡང་ཏི་ཛུའི་རྫོང་དཔོན་དང་དཔོན་རིགས་འདྲ་མིན་སྐུ་མགྲོན་དུ་གདན་འདྲེན་ཞུས་ཐུབ་པ་བྱུང་ཡོད།དེ་ཡང་མཛད་སྒོའི་སྐབས་སྐུ་མགྲོན་གཙོ་བོ་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་གཞོན་པ་ཅོཧ་ན་མེན་མཆོག་ལ་ཏི་ཛུ་དར་རྒྱས་གླིང་བོད་མིའི་གཞིས་ཆགས་སུ་ལོ་གཅིག་ནང་འཛུགས་སྐྲུན་ལས་གཞི་འདྲ་མིན་ལ་རོགས་སྐྱོར་གནང་བར་ས་གནས་འགོ་འཛིན་ལས་ཁུངས་ནས་བོད་མིའི་སྒྲིགས་འཛུགས་ཀྱི་ཚབ་ཞུས་ཏེ་ཐུགས་རྗེ་ལེགས་འབུལ་མཚོན་ཆེད་དུ་ཕྱག་རྟགས་དང་ལག་འཁྱེར་(Appreciation certificate) འབུལ་ཡོད་པ་བཅས། །