༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༧ ཉིན་ཌལ་ཧོར་ཕུན་ཚོགས་གླིང་བོད་མིའི་གཞིས་ཆགས་ཀྱི་མི་མང་རྣམས་ནས་ཉེ་ལམ་ཨ་རིའི་སྲིད་གཞུང་གིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བར་དགའ་སྟོན་གྱི་མཛད་སྒོ་ཞིག་ཚོགས་ཡོད།
དེ་ཡང་སྐབས་དེར་ཌལ་ཧོར་ས་གནས་འགོ་འཛིན་ཕུར་བུ་ཚེ་རིང་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་ཕུར་བུ་དགྲ་འདུལ་ལགས་རྣམ་གཉིས་ཀྱིས་ཁྲིམས་ཡིག་དང་འབྲེལ་བའི་སྐུ་ལས་བསྐྱོན་མཁན་ཡོངས་ལ་བཀའ་དྲིན་ཆེ་ཞུ་དང་ཆབས་ཅིག རྒྱ་གར་གཞུང་ནས་ཀྱང་དེ་བཞིན་རྒྱབ་སྐྱོར་མཚོན་ཆེད་ཁྲིམས་ཡིག་འཇོག་གནང་ཡོང་བའི་འབོད་སྐུལ་ཞུས་ཡོད།
དགའ་སྟོན་དེ་དང་སྟབས་བསྟུན་ནས་ས་གནས་གནས་སྡོད་མི་མང་དང་། ཡུལ་འཁོར་སྤྲོ་འཆམ་པ་སོགས་ལ་མངར་ཟས་འགོ་འགྲེམས་བྱས་ཡོད།
བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་དེས་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་དང་། རྒྱ་ནག་གཞུང་གིས་བོད་ཀྱི་ལོ་རྒྱུས་ཐོག་འཁྱོག་བཤད་བྱས་པ་ལ་ངོས་ལེན་བྱེད་ཀྱི་མེད་པ་མཚོན། དེ་བཞིན་རྒྱ་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ཁོང་གི་སྒྲིག་འཛུགས་ཐོག་ལོག་འགྲེལ་བཅས་ལ་ཁ་གཏད་བཅོག་རྒྱུ་ཡིན་པ་བཅས།།
