༄༅། །ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ཁྲིམས་ཞིབ་པ་ཕུན་ཚོགས་དཔལ་ལྡན་ལགས་ནས་ཕྱི་ལོ་ ༢༠༢༤ ཟླ་ ༦ ཚེས་ ༢༠ ཉིན་གྱི་སྔ་དྲོའི་ཚོུད་ ༡༡ ཐོག་ཀོ་ལི་གྷལ་སཾ་བྷོ་ཊ་སློབ་གྲྭའི་ཚོགས་ཁང་ནང་སློབ་སྤྱི་གཙོས་པའི་དགེ་ལས་ཁག་ཅིག་དང་། འཛིན་རིམ་ ༦ ནས་ ༡༠ བར་གྱི་སློབ་མ་གྲངས་ ༧༠ བཅས་དང་། ཕྱི་ཚེས་ ༢༣ ཉིན་གྱི་སྔ་དྲོའི་ཚོུད་ ༡༡ ཐོག་ཀོ་ལི་གྷལ་ས་གནས་ཚོགས་ཁང་ནང་ས་གནས་འཐུས་ཚོགས་ཀྱི་ཚོགས་གཙོ་ཚོགས་གཞོན་གཙོས་པའི་གཞོན་ནུ་དང་། མཉམ་འབྲེལ་གྱི་གནད་ཡོད་མི་སྣ། མི་མང་བཅས་མི་གྲངས་ ༢༠༠ ཙམ་མཉམ་བཞུགས་གནང་བ་རྣམས་ལ་བཙན་བྱོལ་བོད་མིའི་ཁྲིམས་ལུགས་ཀྱི་གོ་རྟོགས་ཞིག་སྤེལ་ཐུབ་པ་བྱུང་འདུག

གོ་རྟོགས་ཀྱི་ལས་རིམ་འགོ་འཛུགས་མ་ཞུས་གོང་། ས་གནས་འགོ་འཛིན་ལས་ཁུངས་ཀྱི་སྐུ་ཚབ་ས་གནས་ལས་དྲུང་ནས་ས་གནས་ཁྲིམས་ཞིབ་པའི་ངོ་སྤྲོད་སྙིང་བསྡུས་ཤིག་གནང་བ་དང་། དེའི་རྗེས་སུ་ས་གནས་ཁྲིམས་ཞིབ་པ་མཆོག་ནས་བཙན་བྱོལ་བོད་མིའི་མང་གཙོ་ཀ་བ་གསུམ་གྱི་ངོ་སྤྲོད་དང་། ཁྲིམས་ལུགས་དབང་འཛིན་གྱི་འགན་དབང་དང་རིམ་པ་སོ་སོའི་ངོ་སྤྲོད། བོད་མིའི་སྒྲིག་འཛུགས་ཀྱི་རང་དབང་ཅན་སྡེ་ཚན་གི་ངོ་སྤྲོད། བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གཞིར་བཞག་གིས་ཁྲིམས་གཏུག་བྱེད་ཕྱོགས་བཅས་ཀྱི་གོ་རྟོགས་སྤེལ།དེ་མཚུངས་གོང་ཚེས་ཀྱི་ཕྱི་དྲོའི་ཚོུད་ ༣༌༤༠ ཐོག་མེ་སོར་རུས་པ་ (ROOPA) གསོལ་མགྲོན་ཁང་གི་ཚོགས་ཁང་ནང་། མེ་སོར་དུ་མཐོ་སློབ་བསྐྱོད་བཞིན་པའི་བོད་རིགས་སློབ་ཕྲུག་ཁག་ཅིག་ལ་གོང་གསལ་བརྗོད་གཞི་ཐོག་གོ་རྟོགས་སྤེལ་འདུག

སྐབས་དེར་མང་ཚོགས་ལ་ཁ་མཆུ་ཞུ་གཏུག་བྱེེད་ཕྱོགས་ཀྱི་འགྲེམ་ཡིག་ ༼Pamphlet༽ ༡༠༠ ལྷག་བགོ་འགྲེམས་ཞུས་ཡོད་པ་དང་། སྐབས་མཚམས་སོ་སོར་དྲི་བ་བྱུང་བ་ཁག་ལ་ལན་འདེབས་གསལ་བཤད་གནང་འདུག་པ་བཅས།།