༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༢༤ ཉིན་ཧི་མ་ཅལ་མངའ་སྡེའི་ཀང་ར་རྫོང་གི་རྫོང་དཔོན་སྐུ་ཞབས་ཧེམ་རཱཇ་བཻ་ར་བཱ་ (Hemraj Bairwa) ལགས་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་ཕེབས་ཡོད་པ་དང་། སྐབས་དེར་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ཕེབས་བསུ་ཞུས་ཡོད།

མཇལ་མོལ་སྐབས་བདེ་སྲུང་དྲུང་ཆེ་ཀརྨ་རིན་ཆེན་ལགས་དང་། རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱང་ལྷན་བཅར་ཐོག ཨ་ཊར་ལག་ཁྱེར་(Aadhaar cards) བཟོ་ཕྱོགས་སོགས་ཐེ་བའི་གནད་དོན་ཁག་ཅིག་ཐོག་གྲོས་མོལ་གནང་བ་མ་ཟད། གོ་སྐབས་དེ་དང་འབྲེལ་ཏེ་རྫོང་དཔོན་ལས་ཁུངས་བརྒྱུད་ཐར་འདོད་གླིང་ཁུལ་གནས་སྡོད་བོད་མི་རྣམས་ཀྱི་ཆུའི་དཀའ་ངལ་བསལ་བར་ཐུགས་རྗེ་ལེགས་འབུལ་ཞུས་ཡོད་པ་རེད། ཐེངས་འདིའི་མཇལ་མོལ་དེ་ཉིད་རྡ་ས་ས་གནས་འགོ་འཛིན་གྱིས་འབྲེལ་མཐུད་ཞུས་ཡོད་པ་བཅས།།