༄༅། །ཕྱི་ལོ་ ༢༠༢༤ ཟླ་བ་ ༦ ཚེས་ ༡༨ ཉིན་གྱི་ཕྱི་དྲོ་ཆུ་ཚོད་ ༤།༠༠ ཙམ་གྱི་ཐོག་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱའི་ཀལ་མེག་ཀཱོལ་ (Rep. Michael McCaul, Chairman of the House Foreign Affairs Committee) མཆོག་གིས་སྣེ་ཁྲིད་འོག གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནེན་སི་པི་ལོ་སི་ (Rep. Nancy Pelosi, Speaker Emerita) མཆོག་དང་། གྲོས་ཚོགས་འོག་མའི་འཐུས་མི་ལྕམ་སྐུ་མ་རིཡ་ནེ་ཊི་ མི་ལར་ མིག་སེ་ (Rep. Mariannette Miller-Meeks, House Veterans Affairs Committee) མཆོག གྲོས་ཚོགས་འོག་མའི་འཐུས་མི་སྐུ་ཞབས་གྷི་རི་གོ་རེ་ མིག་སེ་ (Rep. Gregory Meeks, Ranking Member, House Foreign Affairs Committee) མཆོག གྲོས་ཚོགས་འོག་མའི་འཐུས་མི་ལྕམ་སྐུ་ནི་ཁོ་ལེ་ མ་ལིའོ་ཊ་ཀི་སི་ (Rep. Nicole Malliotakis, House Ways and Means Committee) མཆོག གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Rep. Jim McGovern, House Rules Committee) མཆོག གྲོས་ཚོགས་འོག་མའི་འཐུས་མི་སྐུ་ཞབས་ཨ་མི་ བྷེ་རཱ་ (Rep. Ami Bera, House Foreign Affairs Committee) མཆོག་བཅས་ཨ་རིའི་སྲིད་དོན་ཚོགས་པ་ཐུན་མོང་ལས་གྲུབ་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ཞིག་བོད་མི་མང་སྤྱི་འཐུས་ལྷན་ཁང་དུ་འཚམས་གཟིགས་ཕེབས་གནང་སོང་།

སྐབས་དེར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དཔལ་ལྡན་བདེ་སྲུང་བཀའ་བློན་རྒྱ་རི་སྒྲོལ་མ་མཆོག དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ་དང་། མང་ཚོགས་རྩིས་ཁྲའི་ཚོགས་ཆུང་གི་ཚོགས་མི་སྤྱི་འཐུས་རྣམ་པ། ཁྲིམས་སྒྲིག་བསྐྱར་བཅོས་ཚོགས་ཆུང་གི་ཚོགས་མི་སྤྱི་འཐུས་རྣམ་པ། ཚོགས་དྲུང་ལས་ཁུངས་ཀྱི་དྲུང་ཆེ་གཙོས་པའི་ལས་བྱེད་རྣམ་པས་ཕེབས་བསུའི་སྣེ་ལེན་གཟབ་རྒྱས་ཞུས་རྗེས། གྲོས་ཚོགས་ཀྱི་ཚོགས་ཁང་ནང་གཟིགས་སྐོར་སྣེ་ཁྲིད་གནང་སོང་།དེ་རྗེས་གྲོས་ཚོགས་ཚོགས་ཁང་ནང་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་གི་ཚོགས་མི་རྣམ་པ་དང་། དཔལ་ལྡན་ཚོགས་གཙོ་སྦྲེལ་པོ་མཆོག་དང་། དཔལ་ལྡན་སྲིད་སྐྱོང་མཆོག དཔལ་ལྡན་བདེ་སྲུང་བཀའ་བློན་མཆོག སྤྱི་འཐུས་རྣམ་པ་བཅས་ཚང་འཛོམས་ཐོག དཔལ་ལྡན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་དགའ་བསུའི་འཚམས་འདྲི་དང་སྦྲགས་གསུངས་དོན། ད་རེས་ཨ་རིའི་གྲོས་ཚོགས་ཀྱི་སྲིད་དོན་ཚོགས་པ་ཐུན་མོང་ལས་གྲུབ་པའི་ཆེས་མཐོའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་སར་ཕེབས་པ་འདིས། ཨ་རིའི་གྲོས་ཚོགས་ཀྱི་སྲིད་དོན་ཚོགས་པ་ཐུན་མོང་གིས་བོད་དོན་ཐོག་གཅིག་མཚུངས་ཀྱིས་རྒྱབ་སྐྱོར་གནང་གི་ཡོད་པ་གསལ་པོ་མཚོན་གྱི་ཡོད་པར་མ་ཟད། རྒྱ་ནག་གཞུང་ལའང་བརྡ་ལན་ཤུགས་ཆེ་ཞིག་ཀྱང་སྤྲོད་ཀྱི་ཡོད། ཨ་རི་དང་། རྒྱ་གར་གཙོ་བོར་བྱས་པའི་འཛམ་གླིང་རྒྱལ་ཁབ་ཁག་མང་པོའི་གཞུང་གིས་རྒྱབ་སྐྱོར་མཐུན་འགྱུར་གནང་བར་བརྟེན་ནས་ད་བར་རྒྱལ་སྤྱིའི་ཐོག་བོད་ཀྱི་འཐབ་རྩོད་གསོན་པོར་གནས་ཐུབ་པ་བྱུང་ཡོད་པས་ཚང་མར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་ཨ་རིའི་གཞུང་གིས་བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས་འཆར་དང་། ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་། རྒྱབ་སྐྱོར་གྱི་ཁྲིམས་འཆར་གཏན་འབེབས་དང་། ཨ་རིའི་བོད་དོན་དམིགས་བསལ་འབྲེལ་མཐུད་པ་རིམ་པར་བསྐོ་གཞག ཉེ་ཆར་ཨ་རིའི་གྲོས་ཚོགས་ནང་བོད་དོན་དཀའ་རྙོག་སེལ་ཐབས་ཀྱི་ཁྲིམས་འཆར་གཏན་འབེབས་གནང་བ་བཅས་ཀྱི་ཐོག་ནས་ཨ་རིའི་གཞུང་གིས་བོད་དོན་ཐོག་རྒྱབ་སྐྱོར་ཤུགས་ཆེ་གནང་དང་གནང་བཞིན་ཡོད་པ་མཚོན་གྱི་ཡོད་པས། ངས་གོ་སྐབས་འདི་བརྒྱུད་ཨ་རིའི་གཞུང་མང་གཉིས་ལ་ཡི་རངས་བསྔགས་བརྗོད་ཞུ་རྒྱུ་ཡིན།

ཁྱེད་རྣམ་པས་བོད་ནང་གི་ད་ལྟའི་ཛ་དྲག་གནས་སྟངས་སྐོར་མཁྱེན་གསལ་ལྟར། རྒྱ་ནག་དམར་གཞུང་འོག་བོད་ནང་བོད་མི་ཚོར་ཆབ་སྲིད་དང་། དཔལ་འབྱོར། ཆོས་ལུགས། སྐད་ཡིག་སྲུང་སྐྱོབ་བཅས་ཀྱི་རང་དབང་མེད་པར་མ་ཟད། སྨྲ་བརྗོད་དང་། འགྲུལ་བཞུད་ཀྱི་རང་དབང་ཡོངས་རྫོགས་འཕྲོག་ཡོད་པ་རེད་ཅེས་གོ་སྐབས་འདི་བརྒྱུད་ནས་བསྐྱར་ནན་ཞུ་རྒྱུ་ཡིན། ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་འདིར་ཕེབས་པ་འདིས། སྡུག་སྦྱོང་མནར་གཅོད་མྱོང་བཞིན་པའི་བོད་ནང་གི་གཞིས་བཞུགས་སྤུན་ཟླ་ཚོའི་སེམས་ཤུགས་སྤར་བ་དང་། ཨ་རིའི་གཞུང་གིས་མང་གཙོའི་རིན་ཐང་ཐོག་འགན་ཁུར་གནང་ཕྱོགས་ལ་དེ་བས་ཡིད་ཆེས་སླེབས་ཡོད། དེར་བརྟེན་ཁྱེད་རྣམས་ལ་དམིགས་བསལ་གྱིས་ཐུགས་རྗེ་ཆེ་ཞུ་རྒྱུ་དང་། འབྱུང་འགྱུར་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུ་རྒྱུ་ཡིན་ཞེས་གསུངས་གནང་སོང་།དཔལ་ལྡན་ཚོགས་གཞོན་མཆོག་གིས་གཙོ་བོ་གསུངས་དོན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་རླབས་ཆེན་གྱི་བཀའ་དགོངས་འོག བཙན་བྱོལ་ནང་ཐོག་མར་བོད་མི་མང་སྤྱི་འཐུས་ལྷན་ཚོགས་གསར་འཛུགས་གནང་བ་ནས་བཟུང་རིམ་པས་བཙན་བྱོལ་ནང་མང་གཙོའི་འཕེལ་རིམ་ཇི་བྱུང་སྐོར་ངོ་སྤྲོད་སྙིང་བསྡུས་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་། གྲོས་ཚོགས་ཚོགས་དུས་གཉིས་དང་། བོད་དོན་ཞུ་སྐུལ་གྱི་ལས་རིམ། སྤྱི་འཐུས་ཕྱོགས་བསྐྱོད། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་འབྲེལ་མཐུད་ལྷན་ཚོགས། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་སོགས་བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་སྐོར་ངོ་སྤྲོད།གཞན་ཡང་དཔལ་ལྡན་ཚོགས་གཞོན་མཆོག་གིས་ཨ་རིའི་གྲོས་ཚོགས་འོག་མའི་འཐུས་མི་ཟུར་པ་ལྕམ་སྐུ་ནེནེ་སི་པི་ལོ་སི་མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་རྣམ་གཉིས་ཕྱི་ལོ་ ༢༠༢༢ ལོར་ཨ་རིའི་རྒྱལ་ས་ཝ་ཤིང་ཊོན་དུ་ཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་ཆེད་ཕེབས་གནང་བར་ཐུགས་རྗེ་ཆེ་ཞུས་དང་ཆབས་ཅིག ཨ་རིའི་སྲིད་གཞུང་རིམ་པ་དང་། མི་མང་གིས་བོད་ཀྱི་བདེན་པའི་རྩ་དོན་ཐོག་རྒྱབ་སྐྱོར་དང་། ལྷག་པར་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་བོད་མིའི་སྒྲིག་འཛུགས་ཀྱི་བསྟི་གནས་སུ་ཕེབས་ཏེ་འཛམ་གླིང་གང་སར་བཞུགས་པའི་བོད་མི་རྣམས་ལ་རེ་བའི་སེམས་ཤུགས་སྤར་གནང་བ་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུས་གནང་སོང་།ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱའི་ཀལ་མེག་ཀཱོལ་མཆོག་གིས་ཉེ་ཆར་ཨ་རིའི་གྲོས་ཚོགས་ནང་གཏན་འབེབས་གནང་བའི་བོད་དོན་དཀའ་རྙོག་སེལ་ཐབས་ཀྱི་ཁྲིམས་འཆར་དང་། དེ་དང་འབྲེལ་བའི་གྲོས་ཚོགས་ནང་གི་བརྒྱུད་རིམ་སྐོར་དང་། མང་གཙོའི་གལ་གནད་སྐོར་སོགས་གསུངས་པ་དང་།གྲོས་ཚོགས་འོག་མའི་འཐུས་མི་སྐུ་ཞབས་གྷི་རི་གོ་རེ་མིག་སེ་མཆོག་གིས་ཨ་རིའི་གཞུང་མང་གཉིས་ནས་མུ་མཐུད་བོད་དོན་ཐོག་རྒྱབ་སྐྱོར་ཡོད་སྐོར་གསུངས་སོང་།མཐར་ལྕམ་སྐུ་ནེན་སི་པི་ལོ་སི་མཆོག་གིས་བོད་ཀྱི་མང་གཙོའི་གལ་གནད་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་འཛམ་གླིང་ཞི་བདེ་དང་། བྱམས་པ། སྙིང་རྗེ་བཅས་ཀྱི་བསླབ་བྱའི་གལ་གནད་སྐོར་གསུངས་རྗེས། དཔལ་ལྡན་ཚོགས་གཙོ་སྦྲེལ་པོ་མཆོག་གིས་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་གི་ཚོགས་མི་རྣམས་དང་། ཁོང་རྣམ་པའི་སྐུ་ཟླ། ལས་བྱེད་བཅས་ལ་བོད་མི་མང་སྤྱི་འཐུས་ལྷན་ཚོགས་ཀྱི་དྲན་རྟེན་ཕྱག་རྟགས་ཕུལ་བ་དང་། དེ་རྗེས་བོད་ཀྱི་འགྲེམ་སྟོན་ཁང་དང་། དཔེ་མཛོད་ཁང་ལ་གཟིགས་སྐོར་ཕེབས་ཡོད་པ་བཅས། །