༄༅། །ཕྱི་ལོ་ ༢༠༢༤ ཟླ་བ་ ༦ ཚེས་ ༩ ཉིན་ཨ་རིའི་ཁོ་ལོ་ར་ཌོ་མངའ་སྡེའི་ (Camp Hale) ས་གནས་སུ་དེ་སྔོན་ཕྱི་ལོ་ ༡༩༥༩  ནས་ ༡༩༦༤ བར་ཨ་རི་གསང་བའི་སྡེ་ཚན་ (CIA) ནས་ཆུ་བཞི་སྒང་དྲུག་བསྟན་སྲུང་དང་བླངས་དམག་སྒར་གྱི་བོད་དམག་གྲངས་ ༣༠༠ ཙམ་ལ་དམག་སྦྱོང་སྤྲོད་ཡུལ་ས་གནས་དངོས་སུ་ར་འཕྲོད་བྱུང་སའི་ས་གནས་སུ་དྲན་རྟེན་གྱི་མཛད་སྒོར་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གཞུང་འབྲེལ་གྱི་མཉམ་ཞུགས་གནང་ཡོད་པ་དང་། གཞན་ཡང་མཛད་སྒོར་བྱང་ཨ་རིའི་སྤྱི་འཐུས་བསྟན་འཛིན་འཇིགས་མེད་ལགས། སྤྱི་འཐུས་དགེ་བཤེས་ཨ་ཀྲུག་ཚེ་བརྟན་ལགས། སྤྱི་འཐུས་གསེར་རྟ་ཚུལ་ཁྲིམས་ལགས། སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས། དབུས་མདོ་སྟོད་ཆུ་སྒང་གི་ཚོགས་གཙོ་བཀའ་ཟུར་འཁོར་ལྷ་ཚང་བསོད་ནམས་སྟོབས་རྒྱལ་མཆོག བཀའ་ཟུར་པདྨ་ཆོས་འབྱོར་མཆོག གུང་ལོ་ ༩༢ སོན་པ་ཨ་རིའི་དམག་སྦྱོང་སྤྲོད་མཁན་གྱི་དགེ་རྒན་གྲས་ཡིན་པ་ (Bruce Walkar) ལགས། དེའི་སྐབས་ཀྱི་སྐད་བསྒྱུར་ཚེ་རིང་རྡོ་རྗེ་ལགས་བཅས་མཉམ་ཞུགས་གནང་འདུག

གསུང་བཤད་གནང་མཁན་ཕལ་མོ་ཆེ་ནས་ཆུ་བཞི་སྒང་དྲུག་དང་བླངས་དམག་གི་ཁོངས་སུ་མདོ་དབུས་ཁམས་གསུམ་གྱི་མི་ཡོད་པ་དང་། ཁོང་རྣམ་པའི་བློས་གཏོང་ལ་རྗེས་དྲན་བྱེད་རྒྱུ་གལ་འགངས་ཆེན་པོ་ཡིན་པའི་སྐོར་གསུང་སོང་། །