༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༣ ཉིན་བྱང་ཨིན་ཡུལ་བོད་རིགས་ཚོགས་པའི་ངོས་ནས་ཨིན་ཡུལ་གྲོང་ཁྱེར་མེན་ཅེསྚར་ནང་གི་ (Firswood Scouts Group) ཞེས་པའི་སློབ་ཕྲུག་རྣམས་ལ་བོད་ཀྱི་ཐུན་མོང་མ་ཡིན་པའི་རིག་གཞུང་ངོ་སྤྲོད་ཆེད་མཛད་སྒོ་ཞིག་གོ་སྒྲིག་ཞུས་ཡོད།

མཛད་སྒོ་དེའི་དམིགས་ཡུལ་ནི་གཞོན་སྐྱེས་རྣམས་ལ་བོད་ཀྱི་རིག་གཞུང་དང་ལོ་རྒྱུས་སྐོར་ཤེས་ཡོན་སྤྲོད་རྒྱུ་ཡིན་པ་རེད།

མཛད་སྒོའི་ཐོག་མར་བོད་རིགས་ཚོགས་པའི་དང་བླངས་རྣམས་ཀྱིས་སོ་སོའི་ལོ་རྒྱུས་སྙིང་བསྡུས་དང་། བོད་དང་འབྲེལ་བ་ཇི་ལྟར་ཆགས་ཚུལ་སྐོར་ངོ་སྤྲོད་གནང་རྗེས་སློབ་ཕྲུག་ཚོའི་བོད་ཀྱི་རྒྱལ་རབས་ལོ་རྒྱུས་དང་འབྲེལ་བའི་དྲི་བ་ཁག་ལ་ལན་འདེབས་ཞུས་ཡོད།མཛད་སྒོའི་སྐབས་ཀྱི་ལས་རིམ་ནི།

 ༡༽  བརྙན་ཐུང་ངོ་སྤྲོད། བརྙན་ཐུང་ནང་བོད་ཀྱི་ལོ་རྒྱུས་མདོར་བསྡུས་ཤིག་བསྟན་ཡོད་པ་དང་། དེས་སློབ་ཕྲུག་ཚོར་བོད་ཀྱི་རིག་གཞུང་དང་། བོད་མིའི་འཐབ་རྩོད་ཤེས་རྟོགས་ཡོང་བར་ཕན་ཐོགས་བྱུང་ཡོད།

༢༽  བོད་ཆས་ངོ་སྤྲོད། བོད་རིགས་ཚོགས་པའི་དང་བླངས་རྣམས་ཀྱིས་བོད་ཀྱི་ཕྱུ་པ་གྱོན་ལུགས་དང་དེའི་གོ་དོན་སོགས་འགྲེལ་བརྗོད་གནང་།

༣༽  རྩམ་པ་བཟོ་སྟངས།  ཕྲུ་གུ་ཚོས་བོད་ཀྱི་ཐུན་མོང་མ་ཡིན་པའི་རྩམ་པ་བཟོ་སྟངས་སྦྱངས་བ་མ་ཟད། དྲོ་བ་བཅས་མྱངས་ཏེ་བོད་ཟས་སྐོར་ཤེས་རྟོགས་བྱུང་ཡོད།

༤༽  ཁ་བཏགས་ཀྱི་ངོ་སྤྲོད། ཕྲུ་གུ་ཚོར་ཁ་བཏགས་ཕུལ་སྲོལ་དང་འབྲེལ་དེའི་གོ་རིམས་དང་འབུལ་སྟངས་སོགས་རྒྱུས་ལོན་ཞུས།

༥༽  བོད་ལུགས་ཀྱི་ཕྲེང་བའི་ངོ་སྤྲོད། བོད་པའི་ཕྲེང་བ་དེ་སྒོམ་སྒྲུབ་དང་ཁ་བཏོན་སྐབས་གལ་གནད་ཇི་ལྟར་ཆེ་ཚུལ་སྐོར་ངོ་སྤྲོད་གནང་།

༦༽  བོད་ཀྱི་ཐང་ཀ  ཕྲུ་གུ་རྣམས་ལ་བོད་ཀྱི་ཐང་ཀ་ཞིག་བསྟན་ནས་དེའི་ཆོས་ལུགས་དང་སྒྱུ་རྩལ་གྱི་གནད་འགག་སྐོར་ངོ་སྤྲོད།

༧༽  བོད་ཀྱི་རྒྱལ་དར་སྐོར་ལ་ཕྲུ་གུ་རྣམས་ཤེས་རྟོགས་ཆེད་ངོ་སྤྲོད་གནང་།

༨༽  བོད་ཀྱི་རོལ་དབྱངས་སྒྲ་སྙན་ཀྱི་ངོ་སྤྲོད། དང་བླངས་ཚོས་བོད་ཀྱི་གྲུ་གཞས་ཞིག་བརྒྱུད་དེ་སྒྲ་སྙན་ངོ་སྤྲོད་གནང་། མཛད་རིམ་དེའི་རིང་སློབ་ཕྲུག་རྣམས་ཀྱིས་ལས་རིམ་རེ་རེར་དོ་སྣང་ཆེན་པོས་མཉམ་ཞུགས་བྱས་ཏེ་བོད་ཀྱི་རིག་གཞུང་དང་ལུགས་སྲོལ་སྐོར་ལ་ཤེས་འདོད་དང་སྤྲོ་སེམས་ཆེན་པོ་བསྟན་ཡོད་པ་བཅས།།