༄༅། །ཕྱི་ལོ་ ༢༠༢༤ ཟླ་བ་ ༦ ཚེས་ ༡༦ ཉིན་རྒྱབ་ཆུ་ཚོད་ ༣།༠༠ ཐོག་སྦེལ་ཇམ་གྱི་གྲོང་ཁྱེར་ཨན་ཊབ་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལུགས་ལྟར་དགུང་གྲངས་ ༨༩ ཕེབས་པའི་སྐུའི་འཁྲུངས་སྐར་དང་། གཞན་ཡང་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་ ༦༦ འཁོར་བའི་དུས་དྲན་སྲུང་བརྩི་ཞུས་གནང་ཡོད།
སྐབས་དེར་མཛད་སྒོའི་སྐུ་མགྲོན་གཙོ་བོར་སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་། དབུས་མདོ་ཁམས་ཆུ་བཞི་སྒང་དྲུག་གི་སྐུ་ཚབ་བྱང་ཆུབ་རིན་ཆེན་ལགས། མེ་ཏོག་རིན་པོ་ཆེ་དང་དགེ་བཤེས་ཚེ་བརྟན་ཕུན་ཚོགས་ལགས། སྦེལ་ཇམ་བོད་རིགས་ཚོགས་པས་གཙོས་ཚོགས་པ་སྐྱིད་སྡུག་ཁག་གི་སྐུ་ཚབ་རྣམ་པ་དང་མི་མང་བཅས་ཕེབས་ཡོད།
སྐུ་མགྲོན་གཙོ་བོ་དང་ཆུ་སྒང་དབུས་སའི་ཚོགས་གཙོ་རྣམ་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེའི་སྐུ་མདུན་དུ་མཎྜལ་རྟེན་གསུམ་འདེགས་འབུལ་ཞུས་གནང་ཡོད་པ་དང་། དེ་རྗེས་བོད་རྒྱལ་ཁབ་ཆེན་པོའི་རྒྱལ་གླུ་དང་ཆུ་སྒང་གི་དམག་གླུ་བཅས་བཏང་གྲུབ་མཚམས་སྦེལ་ཇམ་ས་གནས་མོད་ཁམས་ཆུ་བཞི་སྒང་དྲུག་གི་ཚོགས་གཙོ་སྤེན་པ་རྡོ་རྗེ་ནས་མཛད་སྒོའི་དབུ་འབྱེད་གཏམ་གནང་དོན། དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༩ ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་དང་། མདོ་ཁམས་ཆུ་བཞི་སྒང་དྲུག་དབུ་བརྙེས་ནས་མི་ལོ་ ༦༦ ཧྲིལ་པོ་འཁོར་བའི་དུས་དྲན། དེ་བཞིན་ཡོ་རོབ་མདོ་ཁམས་ཆུ་བཞི་སྒང་དྲུག་གི་ཚོགས་ཆེན་ཐེེངས་གཉིས་པ་བཅས་སུམ་འཛོམས་སྐྱིད་པའི་དགའ་སྟོན་གོ་སྒྲིག་ཞུ་བ་དང་འབྲེལ་མང་ཚོགས་ཡོངས་ལ་འཚམས་འདྲི་ཞུས་གནང་སོང་། ས་གནས་མདོ་ཁམས་ཆུ་བཞི་སྒང་དྲུག་གི་སྐབས་ ༡༠ པའི་རྒྱུན་ལས་ཀྱི་ལས་རྒྱུན་ལོ་གཉིས་འདི་ལོར་གཙང་བ་དང་། རྒྱུན་ལས་གསར་པ་རྣམས་འོས་འདེམས་ལེགས་གྲུབ་ཀྱིས་དམ་འབུལ་ཞུས་གནང་སོང་བ་དང་། རྒྱུན་ལས་རྙིང་པ་དང་སློབ་སྟོན་པོ་རྣམས་ལ་ཐུགས་རྗེ་ལེགས་འབུལ་གྱི་ཕྱག་ཁྱེར་ཕྱག་རྟགས་བཅས་འགྲེམས་སྤྲོད་གནང་ཡོད།
དེ་རྗེས་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ནས་༸སྐུའི་འཁྲུངས་སྐར་དུས་ཆེན་དང་དུས་དྲན་གྱི་མཛད་སྒོ་དང་འབྲེལ་བའི་གཏམ་བཤད་གནང་དོན། མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དེ་བཞིན་ཕྱི་ལོ་ ༡༩༥༨ ཟླ་ ༦ ཚེས་ ༡༦ ཉིན་བོད་ལྷོ་ཁ་ལྕགས་ཚ་གྲི་གུ་ཐང་དུ་རྒྱལ་གཅེས་དཔའ་བོ་ཛ་སག་ཨ་འབྲུག་མགོན་པོ་བཀྲིས་མཆོག་གི་དབུ་ཁྲིད་འོག བོད་ཆོལ་གསུམ་གྱི་ས་ཁུལ་ཡོངས་ནས་དཔའ་མཛངས་བརྟུལ་ཕོད་ཅན་གྱི་དཔའ་བོ་རྣམ་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་རྒྱ་ནག་དམར་གཞུང་གི་བཙན་འཛུལ་བ་རྣམས་མཐར་སྤྲོད་གཏོང་ཆེད། མ་གྲོས་བསམ་པ་གཅིག་མཐུན་གྱིས་བཙུགས་གནང་ཞིང་། དགྲ་བོ་རྒྱ་དམར་གྱི་བཙན་འཛུལ་རིམ་བྱུང་ལ་ཕར་རྒོལ་ལན་མང་གནང་བ་མ་ཟད། སྤྱི་ལོ་ ༡༩༥༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་དགོས་བྱུང་སྐབས་༸གོང་ས་མཆོག་གི་༸སྐུའི་ཉེན་སྲུང་གི་ཞབས་འདེགས་རླབས་ཆེན་བསྒྲུབས་ཏེ་༸གོང་ས་མཆོག་རྒྱ་གར་དུ་ཞབས་སོར་བདེ་བར་འཁོད་ཐུབ་པ་བྱུང་ཡོད། དེ་ཡང་དེ་རིང་འདིར་དུས་དྲན་སྲུང་བརྩི་ཞུ་བ་ཙམ་མ་ཡིན་པར་ཁོང་རྣམ་པས་བོད་མི་རིགས་ལ་བཅངས་པའི་སྙིང་སྟོབས་དང་དཔའ་ངར་ཡིད་ལ་དྲན་པའི་ཐོག་ནས་བོད་མིའི་འཐབ་རྩོད་ལ་འགན་འཁུར་འཕར་མ་བཞེས་དགོས་སྐོར་དང་། དེ་བཞིན་ཁོང་གིས་དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༩ ལ་ཕེབས་པའི་སྐུའི་འཁྲུངས་སྐར་དུས་ཆེན་ཡང་སྲུང་བརྩི་ཞུ་ཡི་ཡོད་པ་རེད། ༸རྒྱལ་བའི་འཁྲུངས་སྐར་ཉིན་མོའི་ཕྱག་རྟགས་ལེགས་ཤོས་ནི་ཁོང་གི་བཀའ་སྲུང་ཅི་སྒྲུབ་ཞུ་རྒྱུ་དང་ཁོང་གི་བཀའ་སློབ་ལམ་སྟོན་རྣམས་དོན་དམ་གྱིས་ཕྱག་བསྟར་ཞུ་རྒྱུ་དེ་ཆགས་ཡོད་པས་ཚང་མས་ཡིད་འཇགས་དགོས་པའི་འབོད་སྐུལ་དང་། གཞན་ཡང་ཉེ་ཆར་ལས་བྱེད་དང་སྐུ་སྲུང་ཟུར་པ་དང་། འགྲོ་ཕན་སྨན་རྩིས་ཁང་གི་བརྟན་བཞུགས་བསྟར་འབུལ་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དཔལ་ལྡན་ལྷ་མོས་གཟིགས་ལམ་དུ་མགོན་པོ་མཆོག་དགུང་གྲངས་བརྒྱ་དང་བཅུ་གྲངས་ཤིག་བཞུགས་གཏན་འཁེལ་བའི་གཏམ་བཟང་ཕེབས་ཡོད་སྟབས་བོད་མི་སྤྱི་བོ་གནམ་བསྟེན་པ་ཚང་མས་ཐུགས་འགན་ལྷག་བཞེས་ཀྱིས་རྒྱལ་བའི་བཀའ་དགོངས་ལྷུར་ལེན་གྱིས་གཞིས་བྱེས་ལྷན་འཛོམས་ལ་འབད་འབུངས་དགོས་པའི་འབོད་སྐུལ་ཞུས་སོང་།
མཐར་མདོ་ཁམས་ཆུ་བཞི་སྒང་དྲུག་གི་དབུས་རྒྱུན་བྱང་ཆུབ་རིན་ཆེན་ལགས་ནས་བོད་མི་མང་སྤྱི་འཐུས་ལྷན་ཚོགས་ཀྱིས་གནང་བའི་གསུང་འཕྲིན་སྒྲོགས་སྦྱང་གནང་གྲུབ་རྗེས་མདོ་ཁམས་ཆུ་བཞི་སྒང་དྲུག་གི་ཁྱབ་ཁོངས་སྐྱིད་སྡུག་ཁག་ནས་བོད་ཀྱི་སྲོལ་རྒྱུན་གཞས་སྣ་འཁྲབ་སྟོན་དང་། སྙན་ཚིགས་གྱེར་འདོན། སྒོར་གཞས་ཁྲབ་པ་བཅས་མཛད་སྒོ་རེ་ཞིག་མཇུག་རྫོགས་པར་བྱས། །
