༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་སཡི་རིལ་རྭ་མ་ཕོ་ས་ (Cyril Ramaphosa) མཆོག་སླར་ཡང་ལྷོ་ཨཕ་རི་ཀའི་སྲིད་འཛིན་དུ་བདམས་ཐོན་བྱུང་བར་འཚམས་འཕྲིན་སྩལ་ཡོད།
དེ་ཡང་འཚམས་འཕྲིན་ནང་མགོན་པོ་མཆོག་གིས། ལྷོ་ཨཕ་རི་ཀའི་ནང་མི་རིགས་དབྱེ་འབྱེད་མཚམས་འཇོག་བྱས་པ་ནས་བཟུང་མང་གཙོའི་ལམ་ལུགས་བརྟན་པའི་རྒྱལ་ཁབ་ཅིག་ཏུ་གྱུར་ཡོད། མི་རིགས་སྣ་མང་འདུས་པའི་སྤྱི་ཚོགས་འདིར་རིག་གཞུང་དང་། སྐད་ཡིག ཆོས་ལུགས་བཅས་ཀྱི་མི་སྣ་འདྲ་མིན་ཞི་མཐུན་མཉམ་གནས་ཀྱིས་མི་གཞན་གྱི་མིག་དཔེ་ལྟ་ས་ཞིག་ཆགས་ཡོད། ངོས་ཀྱིས་ཁྱེད་ཀྱི་དབུ་ཁྲིད་འོག་ལྷོ་ཨཕ་རི་ཀའི་རྒྱལ་ཁབ་དར་རྒྱས་བྱུང་ཞིང་དམིགས་བསལ་གྱིས་མཐུན་རྐྱེན་ཞན་པའི་རིགས་ཀྱི་འཚོ་བ་ཡར་རྒྱས་གཏོང་ཐུབ་པར་རེ་བ་བྱེད་ཀྱི་ཡོད།
མཐར་མགོན་པོ་མཆོག་གིས་སྐུ་ཞབས་སཡི་རིལ་རྭ་མ་ཕོ་ས་མཆོག་གིས་མ་འོངས་གདོང་ལེན་གནང་དགོས་རིགས་དང་གོ་སྐབས་སོགས་དམ་འཛིན་གྱིས་ལྷོ་ཨཕ་རི་ཀའི་མི་མང་གི་མངོན་འདོད་ལེགས་འགྲུབ་ཡོང་བའི་ཐུགས་སྨོན་མཛད་ཡོད། །
