༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མེཀ་སི་ཀོ་རྒྱལ་ཁབ་ཀྱི་སྲིད་འཛིན་ལ་འོས་འདེམས་བྱུང་བའི་བུད་མེད་ཐོག་མ ་ཡིན་པ་ལྕམ་སྐུ་ཀ་ལོ་ཌི་ཡ་ཤིན་བོམ་ (Claudia Sheinbaum) མཆོག་་ལ་འཚམས་འདྲི་མཛད་ཡོད།

དེ་ཡང་འཚམས་འཕྲིན་ནང་མགོན་པོ་མཆོག་གིས། ངོས་ཀྱིས་བུད་མེད་རྣམས་གཞན་གྱི་བདེ་སྡུག་ལ་ཚོར་ཤེས་སྐྱེན་པ་ཡོད་པའི་ཡིད་ཆེས་བྱེད་ཀྱི་ཡོད། ཁྱད་ཆོས་འདི་དག་ནི་ངོས་ཀྱི་ཨ་མའི་སར་ནས་ཐོག་མར་སྦྱངས་པ་ཡིན་ལ། ཚན་རིག་ཐོག་ནས་བལྟས་པ་ཡིན་ནའང་བུད་མེད་རྣམས་སྙིང་རྗེ་ཆེ་བའི་རང་བཞིན་ཡིན་པ་སྒྲུབ་ཐུབ་ཡོད། དེར་བརྟེན་ངོས་ཀྱིས་དུས་རྟག་ཏུ་བུད་མེད་འགོ་ཁྲིད་རྣམས་ལ་རྒྱབ་སྐྱོར་བྱེད་ཀྱི་ཡོད་ལ། དེ་ནི་སེམས་འགུལ་སྐྱེ་གཞིའི་རྒྱུ་ཞིག་ཀྱང་ཡིན།  ང་ཚོའི་འགོ་ཁྲིད་ཀྱི་ཁྲོད་དུ་བུད་མེད་ཇེ་མང་དུ་སོང་བ་ཡིན་ན། འཛམ་གླིང་འདི་སྔར་ལས་བསམ་ཤེས་དང་། ཞི་བདེ་ལྡན་པ་ཞིག་ཏུ་འགྱུར་ངེས་ཡིན་པ་ངོས་ཀྱི་ཡིད་ཆེས་བརྟན་པོ་བྱེད་ཀྱི་ཡོད། འགྲོ་བ་མིའི་ལོ་རྒྱུས་ལ་ཕྱིར་བལྟས་བརྒྱབ་པ་ཡིན་ན། སྐྱེས་པ་ཕོ་རྣམས་དྲག་རྩལ་ཆེ་བ་ཡོད་པ་བདེན་ནའང་། བུད་མེད་ཚོས་རྒྱུན་དུ་གཞན་གྱི་སྡུག་བསྔལ་ལ་སེམས་ཁུར་ཆེ་བ་ལེན་གྱི་ཡོད། 

ངོས་རང་མེཀ་སི་ཀོ་རྒྱལ་ཁབ་ཏུ་ཐེངས་ཁ་ཤས་བསྐྱོད་པའི་སྐབས་མི་མང་ནས་ངོས་ཀྱིས་གཞི་རྩའི་འགྲོ་བ་མིའི་རིན་ཐང་དང་། བྱམས་སྙིང་རྗེ། ཆོས་ལུགས་མཐུན་སྒྲིལ་སོགས་ཀྱི་སྐོར་གླེང་སློང་བྱེད་སྐབས་དོ་སྣང་དང་རྒྱབ་སྐྱོར་གནང་བས་ངོས་རང་སེམས་འགུལ་ཐེབས་བྱུང་། ཞེས་དང་། 

མཐར་མགོན་པོ་མཆོག་གིས་ལྕམ་ཤིན་བོམ་མཆོག་ལ་མེཀ་སི་ཁོ་དང་། རྒྱ་ཆེ་ས་ནས་འཛམ་གླིང་འདི་བདེ་སྐྱིད་ལྡན་པ་ཞིག་ཏུ་བསྒྱུར་བར་སླད་མར་འཕྲད་སྲིད་པའི་དཀའ་ངལ་མཐའ་དག་ལ་གདོང་ལེན་གནང་ཐུབ་པའི་ཐུགས་སྨོན་མཛད་འདུག་པ་བཅས།།