༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༠༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་ན་རེནྡྲ་མོ་དཱི་མཆོག་གི་རྒྱ་གར་མི་སེར་ཚོགས་པ་(བྷཱ་ར་ཏཱི་ཡ་ཇན་ཏཱ་པཱརྚི་)དང་། རྒྱལ་ཡོངས་མང་གཙོ་མཐུན་སྦྲེལ་ཚོགས་པར་(National Democratic Alliance)རྒྱ་གར་གྲོས་ཚོགས་འོག་མའི་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲི་མཛད་ཡོད།
དེ་ཡང་མཚམས་འཕྲིན་ནང་མགོན་པོ་མཆོག་གིས། རྒྱ་གར་གྱིས་འཛམ་གླིང་གི་མང་གཙོའི་རྒྱལ་ཁབ་ཆེ་ཤོས་ཡིན་པའི་འགན་འཁྲི་ལེགས་པར་ཁུར་བཞིན་པ་མཐོང་དུས་སྤོབས་པ་དང་ཡིད་སྨོན་སྐྱེ་གི་འདུག འོས་བསྡུ་འདི་དག་ལ་བརྟེན་ནས་རྒྱ་གར་མི་མང་གིས་མང་གཙོ་ལ་རིན་ཐང་ཆེན་པོ་སྤྲོད་ཀྱི་ཡོད་པ་གསལ་པོ་རེད། རྒྱ་གར་ནི་གནའ་བོའི་དཔལ་ཡོན་ཁྲོད་ནས་གཅིག་ཡིན་ཞིང་། དཔལ་ཡོན་དེའི་ཐུན་མོང་མ་ཡིན་པའི་ཁྱད་ཆོས་གཙོ་བོ་ནི་འཚེ་བ་མེད་པ་དང་སྙིང་རྗེ་ཡིན་པ་དང་། འཛམ་གླིང་རྒྱལ་ཁབ་གཞན་ཚོའི་ཁྲོད་ནས་རྒྱ་གར་ནི་འགོ་ཁྲིད་ཅིག་ཏུ་ངོས་འཛིན་བྱེད་མཁན་ཇེ་མང་དུ་འགྲོ་བཞིན་ཡོད།
ངོས་ནས་གོ་སྐབས་འདི་བརྒྱུད་བོད་མི་རྣམས་ཀྱི་ཚབ་བྱས་ཏེ་རྒྱ་གར་གཞུང་དམངས་གཉིས་ནས་བོད་མིར་སྣེ་ལེན་རྒྱབ་སྐྱོར་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན། རྒྱ་གར་གཞུང་གིས་ང་ཚོར་རྒྱུན་དུ་བྱམས་བརྩེའི་སྒོ་ནས་སྣེ་ལེན་གནང་བར་བརྟེན་བཙན་བྱོལ་བོད་མི་ཚོས་རང་དབང་དང་། ཞི་བདེའི་ངང་ནས་གནའ་བོའི་རིག་གཞུང་རྒྱུན་འཛིན་བྱེད་ཐུབ་ཡོད་པ་མ་ཟད། རྒྱ་གར་གྱི་སྤུན་ཟླ་ཕོ་མོ་མི་རབས་གསར་པ་ཚོའི་ཁྲོད་དུ་གནའ་བོའི་རྒྱ་གར་གྱི་རིག་གཞུང་ལ་དོ་སྣང་དང་ཤེས་རྟོགས་སྤེལ་རྒྱུར་གྲུབ་འབྲས་གང་འཚམ་ཐོན་ཡོད།
སྐུ་ཉིད་ནས་སླར་ཡང་ལས་ཡུན་གསར་པ་ཞིག་བཞེས་རྒྱུའི་གྲ་སྒྲིག་གནང་བཞིན་པའི་སྐབས་འདིར། རྒྱལ་ཁབ་ཆེན་པོ་འདིའི་མི་མང་གི་རེ་འདོད་སྐོང་བའི་ཆེད་དུ། འབྱུང་འགྱུར་ཕྲད་སྲིད་པའི་དཀའ་ངལ་མཐའ་དག་ལ་གདོང་ལེན་གནང་ཐུབ་པའི་སྨོན་འདུན་ཞུ་རྒྱུ་ཡིན། ཞེས་བཀའ་སྩལ་ཡོད་པ་བཅས།།
