༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ཟླ་བ་ ༦ ཚེས་ ༣ ཉིན་དཔལ་ལྡན་ཕོ་བྲང་ཡིག་ཚང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཞབས་པུས་སྨན་བཅོས་ཆེད་ཨ་རིར་ཆིབས་བསྒྱུར་གནང་རྒྱུའི་ཐག་གཅོད་མཛད་པའི་གསལ་བསྒྲགས་བསྐྱངས་པ་བཞིན།  ཕྱི་ལོ་ ༢༠༢༤ ཟླ་བ་ ༦ ཚེས་ ༢༣ ཉིན་གྱི་སྔ་དྲོ་ཕྱག་ཚོད་ ༩ པ་ཡོལ་ཙམ་ལ་སུད་སི་གྲོང་ཁྱེར་ཛུལ་རིག་ནས་དམིགས་བསལ་གནམ་གྲུ་བརྒྱུད་ཨ་རིའི་མངའ་སྡེ་ནིའུ་འཇར་སི་ཡི་ཁྲལ་ཁྲ་སྦོའོ་རོ་ (Teterboro) གནམ་ཐང་དུ་ཕེབས་འབྱོར་སྐབས་བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་དང་ཕྱག་རོགས་སུ་དོན་ཁང་ལས་བྱེད་ཚུལ་ཁྲིམས་ཚུལ་ཁྲིམས་རྒྱ་མཚོ་ལགས།  ནིའུ་ཡོག་ཏུ་བཅའ་བཞུགས་རྒྱ་གར་གཞུང་ཚབ་ཁང་གི་གནད་ཡོད་ལས་བྱེད་ Dr. Varun Jeph ལགས་དང་། Avdhesh Kumar ལགས། Abhimanyu Gehlaut ལགས།  བཀའ་ཟུར།  སེར་བྱེས་མཁན་རིན་པོ་ཆེ་བཀྲ་ཤིས་ཚེ་ཐར།  ཨ་ཀྱ་རིན་པོ་ཆེ་སོགས་ནིའུ་ཡོག་དང་ནིའུ་འཇར་སི་ཁུལ་དང་ཉེ་འཁོར་ས་གནས་ནས་ཕེབས་པའི་བླ་སྤྲུལ་དགེ་བཤེས།  དད་ལྡན་སོག་རིགས་མང་ཚོགས་བཅས་སེར་སྐྱ་མང་ཚོགས་སྟོང་ཕྲག་བཞི་ལ་ཉེ་བས་ཕེབས་བསུ་ཟབ་རྒྱས་ཞུས།  སེར་སྐྱ་མང་ཚོགས་ཀྱི་ཕྱག་ཏུ་བཀྲ་ཤིས་གཤིས་ཚིག་དང་།  དགའ་བསུ་དང་རྟེན་འབྲེལ་མཚོན་པའི་བརྗོད་ཚིག་སྣ་ཚོགས་གསལ་བའི་བོད་ཨིན་གཉིས་ཀྱི་ཕྲེད་དར་བཟོ་དབྱིབས་སྣེ་འཛོམས།  ཚོན་ཁྲ་འདྲ་མིན་གྱི་དྲི་ཞིམ་མེ་ཏོག  དཀར་གཙང་གྱི་མཇལ་དར་བཅས་བསྣམས་པའི་ཐོག  གྲོ་སོ་ཕྱེ་མར་དང་།  ཆང་ཕུད་དང་འོ་ཕུད་སྟེགས་པའི་གྲལ་བསྟར་གྱི་འཁྲིས་སུ་བཀྲ་ཤིས་ཞོལ་པ་དང་།  སེང་གེ  གཡག་སོགས་འཁྲབ་ནས་བོད་ལུགས་ཀྱི་ཕེབས་བསུ་ཟབ་རྒྱས་ཞུས་རྗེས།  ཨ་རི་གཞུང་གིས་གྲ་སྒྲིག་ཞུས་པའི་ཕེབས་ཊོར་བཞུགས་ཏེ།  ཆུ་ཚོད་བཅུ་པ་ཙམ་ལ་ནིའུ་ཡོག་གྲོང་ཁྱེར་ནང་གི་བཞུགས་གནས་ (Park Hyatt) སྐར་མ་ལྔ་ལྡན་གྱི་མགྲོན་ཁང་དུ་ཞབས་སོར་བདེ་བར་འཁོད།  ལམ་བར་ཆིབས་བསྒྱུར་གནང་བཞིན་པའི་སྐབས་ཕེབས་ལམ་གཡས་གཡོན་དུ་དགའ་དད་སྤྲོ་གསུམ་གྱིས་རྣམ་པས་ཁེངས་པའི་ཕེབས་བསུ་ཞུ་མཁན་དང་།  དེ་བཞིན་མགྲོན་ཁང་གི་གཟིམ་སྒོའི་མདུན་དུ་ནིའུ་ཡོག་ནིའུ་འཇར་སི་དང་ཉེ་འཁོར་ས་གནས་ནས་ཕེབས་པའི་བླ་སྤྲུལ་དགེ་བཤེས་དང་།  ཁྲིམས་ཞིབ་པ་ཟུར་པ།  བོད་མི་མང་སྤྱི་འཐུས།  སྐུ་ཚབ་དོན་གཅོད་ལས་ཁུངས་ནས་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས།  ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་དང་རྒྱུན་ལས།  མགྲོན་ཁང་གི་ཚོམས་ཆེན་ནང་དུ་ནིའུ་ཡོག་རྒྱ་གར་གཞུང་ཚབ་ཁང་གི་སྐུ་ཚབ་ (Vishal Harsh) ལགས་དང་།  ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་དང་བདག་མོ་སྐུ་ཞབས།  ར་སྟོད་མཁན་ཟུར་དགེ་བཤེས་ཐུབ་བསྟན་ལྷུན་གྲུབ་ལགས།  རྒྱལ་བ་ཀརྨ་པ་མཆོག་གི་གཅེན་མོ་ལྕམ་སྲིང་དངོས་གྲུབ་དཔལ་འཛོམས་ལགས།  རྣམ་གྲྭ་ནང་ཆོས་སློབ་གཉེར་ཁང་གི་འགན་འཛིན་བསྟན་འཛིན་ཆོས་བཟང་ལགས་སོགས་སེར་སྐྱ་མང་ཚོགས་སྟོང་ཕྲག་ལྔ་ལྷག་གིས་བོད་ལུགས་ཀྱི་ཕེབས་བསུ་ཟབ་ཅིང་རྒྱས་པ་ཞུས།  ཕེབས་བསུ་ཞུ་མཁན་གྱི་ཕྱག་ཏུ་གོང་བཞིན་འཕྲེད་དར་སྣ་ཚོགས་དང་། དྲི་ཞིམ་མེ་ཏོག  དཀར་གཙང་གྱི་མཇལ་དར་བཅས་བསྣམས་ཤིང་།  སློབ་ཕྲུག་ནས་གྲོ་སོ་ཕྱེ་མར་དང་།  ཆང་ཕུད་དང་འོ་ཕུད་སྟེགས་པའི་གྲལ་བསྟར་གྱི་འཁྲིས་སུ་བཀྲ་ཤིས་ཞོལ་པ་དང་།  རྒྱལ་གཞས།  བཀྲ་ཤིས་པའི་ཕེབས་བསུའི་གསུང་བཤད་བཅས་བཏང་ནས་བོད་ལུགས་ཀྱི་ཕེབས་བསུ་ཟབ་ཅིང་རྒྱས་པ་གནང་། ནིའུ་འཇར་སི་དང་ནིའུ་ཡོག་གཉིས་ཀའི་ཕེབས་བསུ་ཞུ་མཁན་གྱི་ཁོངས་སུ་ཁེ་ནེག་ཀྲི་ཀ་ཊི་དང་།  སྦོ་སི་ཊོན།  མལ་སི་ཆུ་སི།  ཀྲོ་རོན་ཊོ།  ཝན་ཁུ་བ།  ཕི་ལ་རྡལ་ཕི་ཡང་།  སྦོལ་ཊི་མོན།  མལ་རི་ལན་ཊ་སོགས་ཁེ་ན་ཊ་དང་ཉེ་ས་གནས་ཁག་ནས་ཁྱོན་བསྡོམས་མང་ཚོགས་སྟོང་ཕྲག་བཅུ་ (New Jersey & New York) ལ་ཉེ་བ་ཕེབས་བསུར་བཅར་ཡོད་པ་མ་ཟད།  གསར་འགོད་པ་ཧ་ཅང་མང་པོས་ཀྱང་སྔར་དང་མི་འདྲ་བར་བོད་ལུགས་ཀྱི་ཕེབས་བསུ་ཞུ་སྟངས་ལ་དོ་སྣང་ཆེན་པོ་བྱས།    དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་དང་།  སྐུའི་བླ་སྨན་པ་མཆོག་ནས་འགྲེལ་བརྗོད་གནང་བར་གཞིགས་ན།  ད་ལྟའི་ཆར་ཉིན་ཤས་རིང་སྐུའི་འཕྲོད་བཞེས་ཀྱི་བྱེད་སྒོ་ཁོ་ན་ལས་དེ་མིན་པའི་མཛད་ཆར་རིགས་གང་ཡང་མེད་ཅིང་།  གནས་ཚུལ་གསར་པའི་རིགས་ཡོད་ཚེ།  སྐབས་མཚམས་སོ་སོར་གསལ་བསྒྲགས་ཞུ་རྒྱུ་ཡིན།  ཞེས་འགྲེལ་བརྗོད་གནང་གི་འདུག་པ་བཅས་ཀྱི་གནས་ཚུལ་མདོར་བསྡུས་སུ། །