༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༢༤ ནས་ ༢༦ བར་ཉིན་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་གིས་རྒྱ་གར་ལྷོ་ཕྱོགས་གཞི་ཆགས་སྦེལ་ཀོབ་ཏུ་སོ་ནམ་གཞིས་ཆགས་ཁག་ ༡༢ ཡི་ས་གནས་འགོ་འཛིན་རྣམས་ལ་སོ་ནམ་དང་ས་ཆུ་བདག་གཅེས་བྱེད་ཕྱོགས་ཀྱི་ཟབ་སྦྱོང་གནང་གོ་སྒྲིག་གནང་ཡོད།

དེ་ཡང་ཟབ་སྦྱོང་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་མཻ་སོར་ (MYKAPS) ཞེས་པའི་ཚོགས་པའི་སྤྱི་ཁྱབ་འགན་འཛིན་ཨཤ་རབ་ཧ་སན་ལགས་དང་། ལྷོ་སྤྱི་འཇིགས་མེད་ཚུལ་ཁྲིམས་ལགས་ཕེབས་ཞུགས་གནང་ཡོད། སྐབས་དེར་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་དུག་རྫས་རྐྱེན་པས་ཁོར་ཡུག་ལ་གནོད་སྐྱོན་ཐེབས་སྟབས་སྐྱེ་ལྡན་དང་རང་བྱུང་གི་ཞིང་ལས་གལ་གནད་ཆེ་སྐོར་ནན་བརྗོད་གནང་བ་དང་འབྲེལ། སྦྱོང་བརྡར་འདི་བརྒྱུད་ས་གནས་འགོ་འཛིན་རྣམས་ལ་སོ་ནམ་འདེབས་ལས་དང་འབྲེལ་བའི་ཤེས་ཡོན་ཐོབ་པའི་རེ་བ་ཡོད་ཅེས་གསུངས། དེ་བཞིན་ཁོང་གིས་རྒྱ་གར་གཞུང་དམངས་གཉིས་ནས་བོད་མི་ཚོར་སོ་སོའི་རིག་གཞུང་དང་ལུགས་སྲོལ་སོགས་རྒྱུན་འཛིན་བྱེད་ཕྱོགས་ལ་རྒྱབ་སྐྱོར་གནང་བར་བཀའ་དྲིན་ཆེ་ཞུས་ཡོད། དེ་ནས་ཨཤ་རབ་ཧ་སན་ལགས་ཀྱིས་ཚོགས་བཅར་བ་རྣམས་ལ་ (MYKAPS) སྐོར་ངོ་སྤྲོད་གནང་ཡོད།

སྦྱོང་བརྡར་རིང་ (Myrada Watershed) གྱི་སློབ་སྟོན་པ་རག་ཝེནྡྲ་སུ་དི་ལགས་དང་། ( Myrada Kolar) ལས་གཞིའི་ལས་འཆར་འགན་འཛིན་བསྟན་འཛིན་དྭགས་པོ་ལགས་གཉིས་ཀྱིས་གཙོ་སྐྱོང་གནང་ཡོད། །