༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༢༡ ཉིན་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག་གཞི་རིམ་འོག་མའི་སློབ་གྲྭ་ཁག་གི་དགེ་ཆེ་དང་བོད་དགེ་རྣམས་ལ་ཉིན་གསུམ་རིང་བྱིས་པའི་ཀློག་རྩལ་གྱི་ཟབ་སྦྱོང་མཇུག་སྒྲིལ་ཡོད།
དེ་ཡང་ཟབ་སྦྱོང་དེ་བཞིན་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བསྐོང་ཚོགས་གནང་ཞིང་། སྐབས་དེར་གཞི་རིམ་སློབ་གྲྭ་ཁག་གི་དགེ་ཆེ་གྲངས་ ༨ དང་། དགེ་རྒན་ ༢༢ བཅས་ཁྱོན་བསྡོམས་ཚོགས་བཅར་བ་ ༣༠ མཉམ་ཞུགས་གནང་ཡོད། ཟབ་སྦྱོང་དབུ་འབྱེད་དང་མཇུག་སྡོམ་མཛད་སྒོར་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་དང་། སློབ་སྤྱི་གཞོན་པ་གཉིས་ཚོགས་ཞུགས་གནང་ཡོད་པ་རེད།
ཟབ་སྦྱོང་དེ་ནི་ཀློག་རོགས་ལས་གཞི་ནང་ཡོད་པའི་སྦྱོང་བརྡར་ཁག་དང་མཐུན་སྦྱོར་གནང་བ་ཞིག་ཡིན་པ་དང་། དམིགས་བསལ་བོད་ཡིག་ཀློག་རྒྱུར་དཀའ་ངལ་འཕྲད་པའི་གཞི་རིམ་སློབ་ཕྲུག་ཚོར་རོགས་རམ་བྱེད་ཆེད་ཡིན་པ་རེད། ཟབ་སྦྱོང་འདི་བརྒྱུད་ཚོགས་བཅར་བ་རྣམས་ནས་སློབ་ཕྲུག་ཚོར་ལ་སྤྲོ་སྣང་ལྡན་པའི་ངང་སློབ་ཁྲིད་བྱེད་ཐབས་ངོ་སྤྲོད་གནང་ཡོད། དེ་བཞིན་ཚོགས་བཅར་བ་རྣམས་ལ་སློབ་ཕྲུག་གི་དགོས་མཁོ་ངོས་བཟུང་ནས་དེ་དག་ལ་ཀློག་རྩལ་ཡར་རྒྱས་གཏོང་ཐབས་སུ་རོགས་རམ་བྱ་རྒྱུའི་ཐབས་བྱུས་དང་བྱེད་སྒོ་སྣ་ཚོགས་ངོ་སྤྲོད་གནང་ཡོད།
ཟབ་སྦྱོང་སྐབས་སུ་སྤེལ་བའི་བྱེད་སྒོ་ཁག་ཅིག་ནི།
༡༽ ཀློག་འདོན་དཔེ་དེབ་བརྒྱུད་ནས་ཀློག་འདོན་ཡར་རྒྱས་གཏོང་ཐབས།
༢༽ སྐད་གསང་མཐོན་པོའི་སྒོ་ནས་ཀློག་རྩལ་ཡར་རྒྱས་གཏོང་ཐབས།
༣༽ Dominos ཌོ་མི་ནོ་སི་རྩེད་མོའི་སྒོ་ནས་ཀློག་པ།
༤༽ གསར་ཤོག་གམ་སྒྲུང་དེབ་ཞིབ་ལྟ་དང་། བྱིས་པའི་སྒྲུང་དེབ་འདྲ་མིན་ངོ་སྤྲོད་བྱས་པ།
༥༽ བོད་ཁྱིམ་སློབ་གྲྭའི་དགེ་རྒན་མིང་ཆུང་ལགས་དང་། ངག་དབང་བྱམས་པ་ལགས་གཉིས་ཀྱིས་ཀློག་རྩལ་ཡར་རྒྱས་གཏོང་ཐབས་ཀྱི་གསུང་བཤད་གནང་།
༦༽ སམ་བྷོ་ཊ་མེས་དབོན་གཙུག་ལག་དཔེ་སྟོན་སློབ་གྲྭའི་དགེ་རྒན་པ་སངས་ཚེ་རིང་ལགས་ཀྱིས་སློབ་ཕྲུག་ཚོར་ཀློག་ཐབས་སློབ་ཚུལ་གྱི་གསུང་བཤད་གནང་།
༧༽ ཤེས་རིག་ལས་ཁུངས་ཀྱི་བྱིས་སྒྲུང་རྩོམ་པ་པོ་ཚེ་རིང་དཔལ་འཛོམས་ལགས་དང་། ཕ་ཡུལ་ཤེས་བྱ་བང་མཛོད་ཀྱི་རྩོམ་སྒྲིག་པ་ཆོས་ཉིད་སྒྲོལ་མ་ལགས། བོད་ཡིག་སློབ་དེབ་རྩོམ་སྒྲིག་པ་བསྟན་འཛིན་དཔལ་ལགས་བཅས་ཀྱི་ལྷན་དུ་དྲི་བ་དྲི་ལན་གྱི་ལེ་ཚན།
ཚོགས་བཅར་བ་རྣམས་ལ་བྱིས་པའི་སྒྲུང་དེབ་དང་། སློབ་ཕྲུག་ཚོ་དང་ལྷན་བྱེད་སྒོ་ཁག་སྤེལ་ཆེད་མིང་ཚིག་གི་དཔེ་རིས་ཁག་གནང་བ་མ་ཟད། སློབ་ཕྲུག་ཚོའི་སློབ་སྦྱོང་བྱེད་སྐབས་དཀའ་ངལ་འཕྲད་པ་ཁག་ངོས་འཛིན་བྱ་རྒྱུ་དང་། ཟབ་སྦྱོང་སྐབས་སྦྱངས་པའི་ཐབས་ལམ་རྣམས་ལག་བསྟར་བྱ་རྒྱུའི་ལས་འཁུར་བཀོད་སྒྲིག་བྱས་པ་ལྟར། ཡོང་འགྱུར་ཕྱི་ཟླ་ ༧ པའི་ནང་ཚོགས་བཅར་བ་ངོས་ནས་དྲྭ་ཐོག་གཏམ་བཤད་གནང་རྒྱུ་ཡིན་པ་རེད།
གཞན་ཡང་ཤེས་རིག་ལས་ཁུངས་ཀྱི་བསོད་ནམས་གངས་བཟང་ལགས་དང་། མེས་དབོན་གཙུག་ལག་དཔེ་སྟོན་སློབ་གྲྭ་ནས་བསྟན་འཛིན་སྒྲོལ་མ་ལགས། ཅོན་ཏ་ར་བོད་ཁྱིམ་སློབ་གྲྭ་ནས་ཟླ་བ་མཚམས་གཅོད་ལགས། དྷ་ཤོད་བོད་ཁྱིམ་སློབ་གྲྭ་ནས་ཕུན་ཚོགས་སྒྲོལ་དཀར་ལགས་བཅས་མཉམ་ལས་ཀྱི་ཟབ་སྦྱོང་གོ་སྒྲིག་གནང་ཡོད།
ཟབ་སྦྱོང་དེ་བཞིན་ཨ་རི་རོགས་ཚོགས་ཀྱིས་མཐུན་འགྱུར་གནང་བ་ཞིག་ཡིན། །
