༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༤ ཉིན་རྒྱ་ནག་གི་སྲིད་བློན་ལི་ཆང་ཨོག་ལེནྜ་དུ་འབྱོར་སྐབས་ཨོག་ལེནྜ་གནས་སྡོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ངོ་རྒོལ་གནང་ཡོད་པ་རེད།
དེ་ཡང་ཨོག་ལེནྡྲ་དུ་བོད་མིའི་གྲངས་འབོར་ཉུང་ཉུང་ལས་མེད་ནའང་། བདེན་པའི་འབོད་སྒྲ་དེ་ཚང་མས་གོ་ཐུབ་པའི་འབད་བརྩོན་གནང་ཡོད་པ་མ་ཟད། ལས་འགུལ་བ་རྣམ་པར་རྒྱ་ནག་གི་ཕྱོགས་གཏོགས་ཚོགས་པས་ལམ་ཟུར་དུ་འབུད་རྒྱག་གཏོང་བ་དང་། དོགས་སྲུང་ནན་པོ་བྱས་ཡོད་ནའང་། རྒྱ་ནག་གི་སྲིད་བློན་ཨོག་ལེནྜ་གྲོང་ཁྱེར་དུ་སླེབས་སྐབས་བོད་མི་རྣམས་ཀྱིས་ལག་ཏུ་བོད་ཀྱི་རྒྱལ་དར་འཁྱེར་ཏེ་ངོ་རྒོལ་མུ་མཐུད་གནང་ཡོད་པ་རེད།
སྐབས་དེར་བོད་མི་ཙམ་མ་ཟད་རྒྱ་བོད་མཛའ་འབྲེལ་ཚོགས་པའི་ཚོགས་མི་དང་། བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱང་མཉམ་ཞུགས་ཀྱིས་བོད་དུ་འགྲོ་བ་མིའི་ཐོབ་ཐང་དགོས་པའི་ངོ་རྒོལ་གནང་ཡོད།
རྒྱ་ནག་གི་སྲིད་བློན་ལི་ཆང་ནིའུ་ཛི་ལེནྜ་གྱི་རྒྱལ་ས་ཝེ་ལིང་ཊོན་དུ་འབྱོར་བའི་ཉིན་མོར་ཝེ་ལིང་ཊོན་དུ་ཡོད་པའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་སྲིད་བློན་ལི་ཆང་རླངས་འཁོར་དུ་སྐྱོད་བཞིན་པའི་སྐབས་ལམ་ཟུར་ནས་སྐད་འབོད་ཀྱི་ལས་འགུལ་ཞིག་སྤེལ་ཡོད། ཝེ་ལིང་ཊོན་གྱི་བོད་དོན་རྒྱབ་སྐྱོར་ཚོགས་པའི་ཚོགས་མི་རོ་བིན་གི་རིན་བག་ལགས་ཀྱིས། ཝེ་ལིང་ཊོན་དུ་ད་ལྟ་བོད་མི་གནས་སྡོད་བྱེད་མཁན་མེད་ནའང་། བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་བོད་ཀྱི་རྒྱལ་དར་འཕྱར་ཏེ་རྒྱ་ནག་གི་སྲིད་བློན་ལ་སྟོན་ཐུབ་པ་དེ་སྐལ་བ་བཟང་པོ་ཞིག་ཏུ་ངོས་འཛིན་བྱེད་ཀྱི་ཡོད་པ་དང་། འགྲོ་བ་མིའི་ཐོབ་ཐང་དེ་ཚོང་འབྲེལ་ལས་གལ་ཆེ་ཞིང་། རྒྱ་ནག་གཞུང་གིས་བོད་ནང་གི་ཛ་དྲག་གནས་སྟངས་འགན་ཁུར་དགོས་པའི་སྐོར་སོགས་གསུངས་ཡོད་པ་བཅས།།
