༄༅། །ཡུ་རོབ་གྲོས་ཚོགས་ཀྱི་འོས་བསྡུ་དང་འབྲེལ་དེ་སྔ་ཕྱི་ཟླ་ ༤ ཚེས་ ༩ ནས་དབུ་འཛུགས་ཀྱིས་བོད་དོན་ཆེད་དུ་ཡུ་རོབ་ཅེས་པའི་ལས་འགུལ་ཞིག་སྤེལ་ཡོད་པ་དེའི་ཐོག་ཡུ་རོབ་གྲོས་ཚོགས་འཐུས་མིའི་འོས་མི་གྲངས་ ༡༡༥ ནས་བོད་དོན་ལ་རྒྱབ་སྐྱོར་གནང་རྒྱུའི་དམ་བཅའ་དང་འབྲེལ་ལས་འགུལ་མཇུག་སྒྲིལ་ཡོད།
དེ་ཡང་བེལ་ཇ་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་རྒྱ་ནག་གཞུང་གིས་བོད་ནང་གི་བོད་མིའི་གཞི་རྩའི་ཐོབ་ཐང་རྡོག་རོལ་གཏོང་བཞིན་བའི་དུས་མཚམས་འདིར་སྐབས་གསར་པའི་ཡུ་རོབ་གྲོས་ཚོགས་ཀྱི་འཐུས་མི་རྣམས་ནས་བོད་མིའི་འཚེ་མེད་ཞི་བའི་འཐབ་རྩོད་ཐད་སྔར་ལྷག་རྒྱབ་སྐྱོར་གནང་རྒྱུ་གལ་འགངས་ཆེན་པོ་ཡིན་སྐོར་གསུང་ཞིང་། བོད་ཀྱི་གནད་དོན་འདིི་ཡུ་རོབ་གྲོས་ཚོགས་སུ་གཙིགས་ཆེར་འཛིན་པར་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བསྐྱར་གསོ་གནང་རྒྱུ་གནད་འགག་ཆེན་པོ་ཡིན་པ་གསུང་འདུག་པ་མ་ཟད། སྐུ་ཚབ་དོན་གཅོད་ཀྱིས་ཐེངས་འདིའི་བོད་དོན་ཆེད་དུ་ཡུ་རོབ་ཅེས་པའི་ལས་འགུལ་ལེགས་གྲུབ་བྱུང་བ་འདི་བཞིན་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་དང་། དང་བླངས་བོད་དོན་ཞུ་གཏུག་ལས་འགུལ་གྱི་ཚོགས་མི་རྣམ་པ། བོད་རང་བཙན་སློབ་ཕྲུག་ཚོགས་པ། ཡུ་རོབ་ཁུལ་གྱི་བོད་རིགས་ཚོགས་པ་ཁག་བཅས་ཐུན་མོང་གི་མཉམ་རུབ་ལས་བྱུང་བ་ཞིག་ཡིན་པ་གསུང་འདུག
བོད་དོན་ཆེད་དུ་ཡུ་རོབ་ཅེས་པའི་ལས་འགུལ་འདི་བཞིན་བེལ་ཇ་ཡམ་སྐུ་ཚབ་དོན་ཁང་དང་། ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ། རྒྱལ་སྤྱིའི་བོད་དོན་ལས་འགུལ་ཁང་བཅས་མཉམ་སྦྲེལ་གྱི་སྤེལ་གནང་བ་ཞིག་ཡིན་པ་དང་། ལས་འགུལ་དེར་ཨིན་ཡུལ་སྐུ་ཚབ་དོན་ཁང་དང་། སུད་སིའི་སྐུ་ཚབ་དོན་ཁང་། རྒྱལ་སྤྱིའི་བོད་དོན་འབྲེལ་མཐུད་ལས་ཁང་ནས་རྒྱབ་སྐྱོར་གནང་ཡོད་པ་བཅས།།
