༄༅། །འཛམ་གླིང་ཁོར་ཡུག་ཉིན་མོའི་དུས་ཚེས་དང་སྟབས་བསྟུན་ཕྱི་ལོ་ ༢༠༢༤ ཟླ་ ༦ ཚེས་ ༥ ཉིན་མོན་གྷོ་འདོད་རྒུ་གླིང་ས་གནས་འགོ་འཛིན་ལས་ཁུངས་ཀྱི་ཁོར་ཡུག་སྡེ་ཚན་དང་སོ་ནམ་སྡེ་ཚན་ཟུང་སྦྲེལ་ཐོག་འཛམ་གླིང་ཁོར་ཡུག་ཉིན་མོ་སྲུང་བརྩི་ཞུས།

དེ་ཡང་སྔ་དྲོ་ཚོུད་ ༩།༣༠ ཐོག་གཞིས་སྤྱི་མི་མང་ཚོགས་ཁང་དུ་ས་གནས་ཀྱི་ཚོགས་སྡེ་ ༢༦ ཚོགས་མི་དང་། ཟ་ཁང་ཚོང་ཁང་སྐྱིད་སྡུག་ཚོགས་པ། དེ་བཞིན་མི་མང་ ༢༥༠ མཉམ་ཞུགས་བྱས་ཡོད། མཛད་སྒོའི་ཐོག་ས་གནས་འགོ་འཛིན་ལྷག་པ་སྒྲོལ་མ་ལགས་ནས་དེ་རིང་ཉིན་མོའི་ངོ་སྤྲོད་དང་། ལྷག་པར་དུ་འདི་ལོའི་ཁོར་ཡུག་ཉིན་མོའི་བརྗོད་གཞི་ Land Restoration, desertification and drought Resilience གཏན་ཁེལ་ལྟར། བརྗོད་གཞི་དང་འབྲེལ་ད་ལྟའི་ཆར་ས་གནས་སུ་ཆུའི་དཀའ་ངལ་ཆེན་པོ་འཕྲད་དང་འཕྲད་བཞིན་པར་མ་འོངས་ས་གནས་གནད་ཡོད་མི་སྣ་ཚང་འཛོམས་ཐོག་ཆུའི་དཀའ་ངལ་སེལ་ཐབས་སླད་གྲོས་བསྡུར་དང་ཐབས་ལམ་སྟོན་དགོས་པའི་དུས་ལ་བབས་ཡོད་པ་སོགས་ཀྱི་ངོ་སྤྲོད་གྲུབ་རྗེས། གཞིས་གྲོང་གསུམ་པའི་སྨན་རྩིས་ཁང་གི་སྨན་པ་རྡོ་རྗེ་ཚེ་རིང་ལགས་ནས་ཁོར་ཡུག་གཙང་ཉར་དང་སྲུང་སྐྱོབ་ཐད་གློག་སྟོན་བརྙན་རིས་(Power Point Presentation) ལམ་ནས་སྐར་ ༤༠ ཙམ་གསུང་བཤད་གནང་ཡོད།

དེ་རྗེས་སོ་ནམ་སློབ་སྟོན་པ་ངག་དབང་མཆོག་གྲུབ་ལགས་ནས་ས་གནས་འགོ་འཛིན་ལས་ཁུངས་ཀྱི་ཁོར་ཡུག་ཚན་པ་ནས་ས་གནས་སུ་གད་རྙིགས་ཀྱི་དཀའ་ངལ་སེལ་ཐབས་སུ་གད་རྙིགས་དབྱེ་འབྱེད་ (Waste Segregation) ཀྱི་ལས་གཞི་སྤེལ་འཆར་ཡོད་པར་སོང་། དེ་དང་འབྲེལ་ལས་རིམ་སྤེལ་ཕྱོགས་དང་། ལས་གཞི་དེ་ཉིད་ཚགས་ཚུད་དང་རྒྱུན་གནས་ཐུབ་ཐབས་སླད་སེར་སྐྱ་མི་མང་ཡོངས་ནས་ནས་ཕྱར་གྲུ་མཉམ་འདེགས་དགོས་གལ་སོགས་ཀྱི་གསུང་བཤད་གནང་གྲུབ་བསྟུན་ཚོགས་འདུར་ཕེབས་པའི་མི་མང་ལ་ Enzymes བགོ་འགྲེམས་དང་། དེ་ནས་ཚོུད་ ༡༡ ཐོག་མཛད་སྒོ་གྲོལ་རྗེས་སྤྱི་མི་དང་ཟ་ཁང་ཚོང་ཁང་གི་ཚོོགས་གཙོའི་འགན་ཁུར་འོག་གཞིས་གྲོང་སོ་སོ་དང་ཟ་ཁང་ཚོང་ཁང་སྐྱིད་སྡུག་ནས་ས་ཚིགས་ཆ་བགོས་ལྟར་གཞུང་ལམ་གཡས་གཡོན་ལ་གཙང་བཟོའི་ལས་རིམ་སྤེལ་ཡོད་པ་བཅས།།