༄༅། །བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོང་ཁྱེར་ནེའུ་ཡོག་ཏུ་ཞབས་པུས་སྨན་བཅོས་སླད་ཆིབས་བསྒྱུར་བསྐྱངས་གནང་ཡོད་པ་ལྟར། འཛམ་གླིང་ས་ཕྱོགས་གང་སར་གནས་པའི་བོད་མི་གཙོ་བོར་གྱུར་པའི་དད་ལྡན་མང་ཚོགས་ནས་གནས་ཆུང་ཆོས་རྒྱལ་ཆེན་པོའི་བཀའ་ལུང་བཞིན་སྨན་བླའི་གཟུངས་སྔགས་གསོག་སྒྲུབ་ཞུ་གི་ཡོད་པ་དང་། ཕྱི་ལོ་ ༢༠༢༤ ཟླ་བ་ ༦ ཚེས་ ༢༨ ཉིན་སྨན་བཅོས་དངོས་སུ་གནང་གི་ཡོད་སྟབས། བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཁག་ནས་ཉིན་རྒྱབ་ཆུ་ཚོད་ ༠༢ ནས་ ༠༥ བར་སྨན་བླའི་གཟུངས་སྔགས་གསོག་སྒྲུབ་ཞུས་ཡོད།

དེ་བཞིན་ཉིན་རྒྱབ་དྷ་ས་ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་གི་དབུ་གཡབ་ཏུ་ཧིན་དུ་དང་།  སིག  ཁ་ཆེ། ཡི་ཤུ། ནང་པ་བཅས་ནས་རང་ལུགས་ཀྱི་སྒོ་ནས་སྨོན་ལམ་གསུང་འདོན་གནང་ཡོད་པ་བཅས།།