༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་གི་དབུ་གཡབ་ཏུ་བོད་ཀྱི་བཟོ་རིག་སྒྱུ་རྩལ་འགྲེམས་སྟོན་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེས་འགྲེམས་སྟོན་དབུ་འབྱེད་དང་འབྲེལ་གཟིགས་སྐོར་གནང་ཞིང་། འགྲེམས་སྟོན་ནང་ཚོགས་སྒེར་མི་འདྲ་བ་ ༡༩ ཡིས་དེང་རབས་དང་སྔ་མོའི་བོད་ཀྱི་སྒྱུ་རྩལ་སྣ་ཚོགས་འགྲེམས་སྟོན་དང་ཚོང་སྒྱུར་གནང་ཡོད་ལ། སྐབས་དེར་ཐང་ཀའི་རི་མོ་དང་། བོད་ཀྱི་སྲོལ་རྒྱུན་གྱི་གྱོན་ཆས། རྡོ་བཟོ། རོལ་ཆས། བྱེ་མའི་དཀྱིལ་འཁོར། དེང་རབས་ཀྱི་སྒྱུ་རྩལ་གྱི་དངོས་རྫས། དཔེ་དེབ་སོགས་འགྲེམས་སྟོན་བྱས་ཡོད།
འགྲེམས་སྟོན་དེའི་དམིགས་ཡུལ་གཙོ་བོ་ནི་བོད་ཀྱི་སྒྱུ་རྩལ་དང་ལག་ཤེས་རྣམས་མི་མང་ལ་ཁྱབ་སྤེལ་གཏོང་རྒྱུ་དང་། དུས་མཚུངས་སུ་སྒྱུ་རྩལ་པ་དང་ལག་ཤེས་བཟོ་བ་ཚོར་སོ་སོའི་ལག་ཤེས་འགྲེམས་སྟོན་ཞུ་རྒྱུའི་སྡིངས་ཆ་བསྐྲུན་རྒྱུ་ཡིན་ཞིང་། འགྲེམས་སྟོན་དེས་བོད་ཀྱི་རིག་གཞུང་གི་ཤུལ་བཞག་དངོས་པོ་རྣམས་གསལ་སྟོན་བྱས་པ་ཙམ་མ་ཡིན་པར། ལྟད་མོ་བ་མང་པོ་ཞིག་ལ་བོད་ཀྱི་སྒྱུ་རྩལ་ལ་དགའ་སྣང་དང་གོ་རྟོགས་སྤེལ་ཡོད་པ་རེད།
བོད་ཀྱི་བཟོ་རིག་སྒྱུ་རྩལ་འགྲེམས་སྟོན་དེ་བཞིན་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ཨ་རིའི་རོགས་ཚོགས་ཀྱི་མཐུན་འགྱུར་འོག་ཐེངས་དང་པོ་གོ་སྒྲིག་གནང་ཡོད་པ་བཅས།། 
