༄༅། །བལ་ཡུལ་སྐུ་ཚབ་དོན་གཅོད་ཀྱིས་དབུ་ཁྲིད་པའི་མཧཱ་གུ་རུའི་འབུམ་ཚོགས་གོ་སྒྲིག་ཚོགས་ཆུང་ཞེས་བལ་ཡུལ་ཀཐཱ་མན་གྲུ་ཁུལ་དུ་གནས་སྡོད་བོད་རིགས་མང་ཚོགས་ཀྱིས་ཕྱི་ལོ་ ༡༩༧༨ ནས་བཟུང་མཧཱ་གུ་རུའི་འབུམ་ཚོགས་དང་། ༧རྒྱལ་བའི་སྐུ་ཕྱྭའི་༧ཞབས་རིམ་ལོ་ལྟར་གནང་མུས་ལྟར་འདི་ལོ་ཡང་མཧཱ་གུ་རུའི་འབུམ་ཚོགས་གོ་སྒྲིག་ཚོགས་ཆུང་གིས་ཕྱི་ལོ་ ༢༠༢༤ ཟླ་བ་ ༦ ཚེས་ ༡༤ ནས་ ༡༧ བོད་ཟླ་ ༥ ཚེས་ ༨ ནས་ ༡༡ བར་ཏེ་ཉིན་གྲངས་བཞིའི་རིང་གོ་སྒྲིག་ཞུས་པ་ལས་ཉིན་གསུམ་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་འབུམ་ཚོགས་དང་། ཉིན་བཞི་པ་༧རྒྱལ་བའི་སྐུ་ཕྱྭའི་༧ཞབས་རིམ་ཆེད་ཞབས་བརྟན་གསོལ་འདེབས་གསོག་སྒྲུབ་དང་། ད་རེས་དམིགས་བསལ་སྨན་བླའི་གཟུངས་སྔགས་གྲངས་གསོག་རྒྱ་ཆེར་གནང་བར་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འདབས་དཔལ་རྒྱལ་བ་ཞེ་ཆེན་པའི་གདན་ས་ཆེན་མོ་ཞེ་ཆེན་བསྟན་གཉིས་དར་རྒྱས་གླིང་དུ་བལ་ཡུལ་ཀཐཱ་མན་གྲུ་ལུང་གཤོངས་སུ་གཞིས་ཆགས་པའི་བོད་བརྒྱུད་ནང་བསྟན་གྱི་ཆོས་བརྒྱུད་རིས་མེད་ཀྱི་དགོན་སྡེ་གྲྭ་ཚང་མང་པོ་ཡོད་པའི་ཁོངས་ནས་གཞུང་སེམས་ལྷག་བསམ་ཅན་གྱི་དགོན་ཁག་བཅུ་དྲུག་ནས་བོད་བསྟན་སྲིད་ལ་ལར་ཞེན་དང་། ལྷག་པར་༧རྒྱལ་བའི་སྐུ་ཕྱྭའི་ཞབས་རིམ་གལ་ཆེར་བརྩི་ནས་འདི་ལོ་དམིགས་བསལ་འདས་པའི་ལོ་ཤས་གོང་དང་མི་འདྲ་བར་༧སྐྱབས་རྗེ་བླ་སྤྲུལ་མཁན་སློབ་དགེ་བཤེས་སོགས་དབུ་བཞུགས་ཐོག་གྲྭ་བཙུན་གྱི་གྲངས་འབོར་སྟོང་ཕྲག་ལས་བརྒལ་བ་མཉམ་འཛོམས་བྱུང་བ་དང་། སྐབས་དེར་༧ཞབས་རིམ་གསོག་སྒྲུབ་ཆེད་ཉིན་ལྟར་མི་མང་ཡང་དྲུག་བརྒྱ་ལས་བརྒལ་བ་མཉམ་བཞུགས་གནང་ནས་བསྟན་སྲིད་༧ཞབས་རིམ་ལེགས་གྲུབ་བྱུང་བ་མ་ཟད། ཚེས་བཅུའི་ཉིན་རྣམ་དཀར་དགེ་ལ་དཀར་པའི་དད་སྦྱིན་མི་ཉུང་བ་ཞིག་ལ་དགེ་བསྐུལ་ཞུས་པ་ཇི་བཞིན་མ་འོངས་མཧཱ་གུ་རུའི་འབུམ་ཚོགས་ཀྱི་མཆོད་རྒྱུན་སྲ་བརྟན་སླད་ཐེབས་རྩའི་མ་དངུལ་སྤྱི་འཇོག་གི་ལས་གཞི་འཕར་མ་ཞིག་སྤེལ་བར་གཏོང་ཕོད་ཅན་རྣམས་ནས་ཀྱང་མ་དངུལ་མཐུན་འགྱུར་གང་ལེགས་གནང་བ་བཅས། །
