༄༅། །ཨོག་ལེནྜ་བོད་རིགས་ཚོགས་པས་ནིའུ་ཛི་ལེནྜ་གྱི་སྲིད་བློན་ཀྲིས་ཊོ་ཕར་ལག་སོན་མཆོག་ལ་རྒྱ་ནག་གི་སྲིད་བློན་དང་མཇལ་འཕྲད་སྐབས་བོད་དོན་གླེང་སློང་དགོས་པའི་འཕྲིན་ཡིག་ཞིག་ཕུལ་འདུག
དེ་ཡང་འཕྲིན་ཡིག་ནང་འཁོད་དོན། རྒྱ་ནག་གི་སྲིད་བློན་ལི་ཆང་ནིའུ་ཛི་ལེནྜ་དུ་བསྐྱོད་གཏན་ཁེལ་བ་འདི་ནི་བོད་རིགས་ཆེད་དུ་གནད་འགག་ཆེན་པོ་ཞིག་ཡིན་ལ། ནིའུ་ཛི་ལེནྜ་གྱི་དབུ་ཁྲིད་ཚོས་རྒྱལ་ཁབ་ཀྱི་ཁེ་ཕན་ཆེད་དུ་ཅི་ཞིག་སྒྲུབ་བཞིན་པ་དེར་ཨོག་ལེནྜ་དུ་གནས་སྡོད་བོད་རིགས་ཚང་མས་རྟག་ཏུ་རྒྱབ་སྐྱོར་བྱེད་ཀྱི་ཡོད། རྒྱ་ནག་ནི་ནིའུ་ཛི་ལེནྜ་དང་ཚོང་འབྲེལ་ཡག་པོ་ཡོད་པ་དང་། ནིའུ་ཛི་ལེནྜ་རྒྱལ་ཁབ་ཀྱི་ཡར་རྒྱས་ཐོག་དོ་སྣང་གནང་བཞིན་པ་ང་ཚོས་ཤེས་ཀྱི་ཡོད། ཡིན་ནའང་ཁྱེད་རང་ཚོ་རྒྱ་ནག་གིས་བཟང་སྤྱོད་དང་ཀུན་སྤྱོད་ལ་གཏོར་གཤིག་གཏོང་བཞིན་པ་ལྟར་མ་འགྱུར་བའི་རེ་བསྐུལ་ཞུ་རྒྱུ་ཡིན། ཞེས་དང་།
ཕྱི་ལོ་ ༢༠༢༤ ཟླ་ ༠༢ ནང་ཁམས་སྡེ་དགེ་རུ་རྒྱ་ནག་གིས་ཆུ་མཛོད་གསར་རྒྱག་གི་ལས་གཞི་རྐྱེན་གྱིས་བོད་ཀྱི་དགོན་སྡེ་ཁག་དང་། གྲོང་པ་ཁག དེ་བཞིན་ལོ་ངོ་སྟོང་ཕྲག་མང་པོ་སྔོན་གྱི་ནང་པའི་ལྡེབས་རིས་རྣམས་རྩ་མེད་བཟོ་བ་དེར་བོད་མི་བརྒྱ་ཕྲག་མང་པོས་རང་གི་པུས་མོ་སར་བཙུགས་ཏེ་འབོད་སྐུལ་གནང་ཡོད་ཀྱང་། རྒྱ་གཞུང་གིས་བོད་མི་དེ་དག་འཛིན་བཟུང་བྱས་ཡོད།
བོད་ནང་ཆབ་སྲིད་ཀྱི་དྲག་གནོན་དང་། སྤྱི་ཚོགས་དབྱེ་འབྱེད། ཁོར་ཡུག་གཏོར་བཤིག རིག་གཞུང་གཅིག་གྱུར་བཅས་ནི་དེང་སྐབས་བོད་ཀྱི་དངོས་ཡོད་གནས་སྟངས་ཆགས་ཡོད། རྒྱ་ནག་གིས་རྒྱ་སྒྱུར་གྱི་ལས་འགུལ་མུ་མཐུད་ཤུགས་ཆེར་གཏོང་བཞིན་ཡོད་ལ། རྒྱ་གཞུང་གིས་འཛིན་སྐྱོང་བྱེད་པའི་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་གཅིག་ལ་ཉེ་བ་ཕ་མ་དང་ཁ་བྲལ་ཏུ་བཅུག་ཡོད་པ་མ་ཟད། སློབ་གྲྭ་དང་དགོན་སྡེ་ཁག་ཏུ་བོད་སྐད་བཀག་སྡོམ་བྱེད་པ་ནི་བོད་ཀྱི་ཆོས་དང་རིག་གཞུང་། སྐད་ཡིག་བཅས་རྩ་མེད་གཏོང་ཐབས་ཀྱི་ལས་འགུལ་ཡིན་པ་རེད། གཞན་ཡང་ཊོ་རོན་ཊོ་མི་སེར་ཚོད་ལྟ་ཁང་གི་སྙན་ཐོ་ལྟར་ན། རྒྱ་ནག་གཞུང་གིས་སྤྱི་ཚོགས་བརྟན་སྲུང་དང་ཁྲིམས་འགལ་གྱི་བྱ་སྤྱོད་འགོག་ཐབས་ཡིན་ཞེས་ཕྱི་ལོ་ ༢༠༡༦ ནས་ ༢༠༢༢ བར་བོད་མི་ལོ་ན་ལྔ་མ་སོན་པ་ནས་བཟུང་རིགས་རྫས་བསྡུ་རུབ་བྱས་ཏེ་ད་བར་བོད་མི་ས་ཡ་ ༡༢ ལྷག་གི་རིགས་རྫས་བསྡུ་རུབ་བྱས་ཡོད་པ་རེད། རྒྱ་གཞུང་གིས་བོད་ཀྱི་ས་ཁུལ་གཞན་དུ་གནས་སྡོད་བོད་མི་རྣམས་ཀྱི་སྐྱེ་ལྡན་བཤེར་རྟགས་དང་། རིགས་རྫས་སོགས་བསྡུ་རུབ་བྱས་ཡོད་པ་དེ་དག་ནི་ལྐོག་ཏུ་བོད་མི་ཚོར་ཆབ་སྲིད་ཀྱི་དྲག་གནོན་ཤུགས་ཆེ་རུ་གཏོང་ཆེད་ཡིན། ཡིད་སྐྱོ་བའི་གནས་ཚུལ་ཞིག་ལ་ཕྱི་ལོ་ ༢༠༠༩ ལོ་ནས་བཟུང་བོད་མི་ ༡༥༩ ཡིས་ཆབ་སྲིད་ཀྱི་ངོ་རྒོལ་བྱེད་ཐབས་སུ་རང་ལུས་མེར་སྲེག་བཏང་ཡོད། དེ་མིན་རྒྱལ་སྤྱིའི་རང་དབང་ཁང་པའི་ཕྱི་ལོ་ ༢༠༢༤ ཡི་འཛམ་གླིང་ནང་གི་རང་དབང་གི་སྙན་ཐོ་ལྟར་ན། བོད་ནི་ཆེས་རང་དབང་ཞན་པའི་རྒྱལ་ཁབ་ཏུ་ངོས་འཛིན་བྱས་ཡོད་པ་དང་། བརྒྱ་ཆ་ཀླད་ཀོར་ཐོབ་པ་གང་ཞིག་ནིའུ་ཛི་ལེནྜ་ལ་བརྒྱ་ཆ་དགུ་བཅུ་གོ་དགུ་ཐོབ་ཡོད་པས་རང་དབང་ཆེ་ཤོས་ཀྱི་རྒྱལ་ཁབ་ཅིག་ཏུ་ངོས་འཛིན་བྱས་ཡོད།
ཆོས་ལུགས་ནི་བོད་མི་ཞིག་གི་མི་ཚེའི་གཞི་རྩ་ཡིན་པ་དང་། ནང་ཆོས་ནི་བོད་མི་ཞིག་གི་ངོ་བོ་མཚོན་གྱི་ཡོད། བོད་མི་ཚོས་ནོ་སྦེལ་ཞི་བདེའི་གཟེངས་རྟགས་བཞེས་མྱོང་བའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཅངས་པའི་དད་པ་དེ་ནི་རྒྱ་ནག་གཞུང་གིས་ཁ་བྲལ་རིང་ལུགས་ཀྱི་བྱ་སྤྱོད་ཞིག་དང་། རྒྱལ་ཁབ་ཀྱི་བདེ་འཇགས་ལ་ཉེན་ཁ་ཞིག་ཏུ་ངོས་འཛིན་བྱེད་ཀྱི་ཡོད། དེའི་རྐྱེན་པས་དགོན་སྡེ་ཁག་དང་ཆོས་དད་རང་དབང་ལ་དྲན་གནོན་རྒྱུན་ཆགས་སུ་བྱེད་བཞིན་ཡོད།
རྒྱ་ནག་གི་སྲིད་བློན་ལི་ཆང་གིས་ཕྱི་ལོ་ ༢༠༢༤ ཟླ་ ༠༣ ཚེས་ ༠༥ ཉིན་གྱི་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་ཐོག་ང་ཚོས་ཆོས་ལུགས་ཀྱི་གནད་དོན་ཐོག་དམར་ཤོག་ཚོགས་པའི་གཞི་རྩའི་སྲིད་བྱུས་བརྩི་སྲུང་བྱ་རྒྱུ་དང་། རྒྱ་ནག་ནང་གི་ཆོས་ལུགས་རྣམས་རྒྱ་རིགས་ཁོ་ནར་ཕྱོགས་དགོས་པ། ཆོས་ལུགས་རྣམས་ང་ཚོའི་སྤྱི་ཚོགས་ཀྱི་ལམ་ལུགས་དང་བསྟུན་ཐབས་ཀྱི་ལམ་སྟོན་བཅས་བྱ་རྒྱུ་ཡིན་ཞེས་དམར་ཤོག་ཚོགས་པའི་ལངས་ཕྱོགས་བསྐྱར་དུ་གསལ་བསྒྲགས་བྱས་ཡོད།
རྒྱ་ནག་གི་སྲིད་བློན་ལི་ཆང་དང་མཇལ་འཕྲད་སྐབས་ང་ཚོས་ནིའུ་ཛི་ལེནྜ་གཞུང་ལ་འབོད་སྐུལ་ཞུ་རྒྱུ་ཁག་ནི། རྒྱ་ནག་གཞུང་ལ་བོད་རྒྱའི་དཀའ་རྙོག་སེལ་ཐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ལྷན་དུ་གྲོས་མོལ་བསྐྱར་དུ་འགོ་འཛུགས་བྱ་རྒྱུ།
༢༽ རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་མཐོ་རིམ་སྐུ་ཚབ་ཀྱི་ལས་ཁུངས་ཐེ་བའི་རང་དབང་ཅན་གྱི་ཞིབ་འཇུག་པ་ཚོར་བོད་དུ་བཀག་སྡོམ་མེད་པར་གཏོང་རྒྱུ།
༣༽ བོད་དུ་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་མཚམས་འཇོག་དགོས་རྒྱུ།
༤༽ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་ཀྱི་བླ་སྤྲུལ་ཁག་གི་ཡང་སྲིད་ངོས་འཛིན་ཐད་རྒྱ་ནག་གཞུང་གིས་ཐེ་བྱུས་བྱེད་མི་ཆོག་པ་དང་། དེ་རྒྱལ་སྤྱི་འགྲོ་བ་མིའི་ཐོབ་ཐང་གི་ཁྲིམས་ལྟར་ན་རང་དབང་དེ་བོད་མི་ཁོ་ནར་ཡོད།
༥༽ རྒྱ་ནག་གཞུང་གིས་འཛམ་གླིང་གི་ཆབ་སྲིད་བཙོན་པ་ཆུང་ཤོས་ཀུན་གཟིགས་པཎ་ཆེན་རིན་པོ་ཆེ་གཙོས་ཁོང་གི་ནང་མི་སྐུ་འཁོར་བཅས་མྱུར་དུ་གློད་བཀྲོལ་བྱ་རྒྱུ།
༦༽ རྒྱ་ནག་གཞུང་གིས་ཁྲིམས་འཛིན་བཙོན་འཇུག་གི་ཐོབ་ཐང་དང་འགལ་བ་དང་། རྒྱལ་ཁབ་ཀྱི་བདེ་འཇགས་སྲུང་སྐྱོབ་ཀྱི་ཁྲིམས་འགལ་གཞན་ཁག་ལ་ཁ་གཡར་ནས་ཞི་བའི་སྒོ་ནས་འགྲོ་བ་མིའི་ཐོབ་ཐང་ལ་ལོངས་སུ་སྤྱོད་མཁན་གྱི་བོད་མི་རྣམས་འཛིན་བཟུང་བྱེད་པར་རྒྱུན་དུ་བཀོལ་སྤྱོད་བྱེད་པའི་རྒྱ་ནག་ཁྲིམས་ལུགས་ཀྱི་དོན་ཚན་ཁག་ཕྱིར་བསྡུའམ་ལེགས་བཅོས་བྱེད་དགོས་པའི་རེ་འདུན་ཞུ་རྒྱུ་བཅས།།
