༄༅། །བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་ཕྱི་ལོ་ ༢༠༢༤ཟླ་བ་ ༦ ཚེས་ ༤ ནས་ ༡༧ བར་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བདུན་ཕྲག་གཉིས་རིང་གི་དབྱར་དུས་བོད་ཀྱི་རིག་གཞུང་གོ་རྟོགས་ལས་གཞི་མཇུག་སྒྲིལ་ཡོད་པ་དང་། ལས་གཞི་འདི་ཉིད་རྒྱ་གར་གྱི་སློབ་གྲྭ་ཁག་ཏུ་འགྲིམ་བཞིན་པའི་བོད་པའི་སློབ་ཕྲུག་རྣམས་ལ་བོད་ཀྱི་རིག་གཞུང་སྐོར་ཤེས་རྟོགས་ཐོག་བོད་མིའི་སྤྱི་ཚོགས་སྤྱི་ལ་འབྲེལ་ཐག་ཉེ་པོ་ཡོང་ཐབས་ཆེད་ཡིན།
དེ་ཡང་མཇུག་སྡོམ་མཛད་སྒོར་ཆོས་རིག་ཟུང་དྲུང་བསྟན་འཛིན་སྒྲོལ་དཀར་ལགས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཕེབས་ཡོད། ཆོས་རིག་ཟུང་དྲུང་བསྟན་འཛིན་སྒྲོལ་དཀར་ལགས་ཀྱིས་ཚོགས་བཅར་བ་རྣམས་ལ་ཟབ་སྦྱོང་ལེགས་གྲུབ་ཀྱི་གཟེངས་བསྟོད་ཕྱག་འཁྱེར་གནང་རྗེས་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱིས་མཇུག་སྡོམ་གསུང་བཤད་གནང་ཡོད།
བདུན་ཕྲག་གཉིས་རིང་སློབ་ཕྲུག་རྣམས་ཀྱིས་བྱེད་སྒོ་སྣ་ཚོགས་ལ་མཉམ་ཞུགས་གནང་པའི་ཁྲོད་བོད་ཀྱི་རྒྱལ་རབས་དང་། སྐད་ཡིག སྤྱི་ཚོགས་དང་ཚོར་ཤེས། བཟང་སྤྱོད་ཀྱི་སློབ་གསོ་བཅས་ཀྱི་སྐོར་ལ་སློབ་ཁྲིད་གནང་ཡོད།
ལས་འཆར་དེའི་ཆ་ཤས་སུ་སློབ་ཕྲུག་རྣམས་དྷ་རམ་ས་ལར་རྟེན་གཞི་བྱས་པའི་བོད་ཀྱི་རིག་གཞུང་ལྟེ་གནས་ཁག་དང་། དགོན་སྡེ་ཁག བོད་མིའི་སྒྲིག་འཛུགས་བཅས་སུ་བོད་ཀྱི་རིག་གཞུང་དང་། བོད་ཀྱི་གནད་དོན་བཅས་ལ་དངོས་སུ་རྒྱུས་ལོན་གནང་རྒྱུ་བྱུང་ཡོད་པ་བཅས། །
