༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྐབས་བཅོ་བརྒྱད་པའི་རྒྱ་གར་གྲོས་ཚོགས་འོག་མའི་ཚོགས་གཙོ་སྐུ་ཞབས་ཨོཾ་བིར་ལཱ་མཆོག་ལ་འཚམས་འདྲི་གནང་ཡོད།
དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། སྐུ་ཉིད་སྐབས་བཅོ་བརྒྱད་པའི་རྒྱ་གར་གྲོས་ཚོགས་འོག་མའི་ཚོགས་གཙོར་འོས་འདེམས་བྱུང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། འདས་པའི་ལོ་ངོ་མང་པོའི་རིང་རྒྱ་གར་གྲོས་ཚོགས་ནང་གི་ང་ཚོའི་གྲོགས་པོ་དང་། ལྷག་པར་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བརྒྱུད་བོད་དོན་འཐབ་རྩོད་ལ་རྒྱབ་སྐྱོར་གཡོ་མེད་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན།
རྒྱ་གར་གྲོས་ཚོགས་འོག་མའི་ནང་མི་མང་གི་འཐུས་མི་མང་པོ་ཡོད་པ་ནི། རྒྱ་གར་གྱི་མང་གཙོའི་ལམ་ལུགས་ཀྱི་ནུས་པ་དང་། ཆབ་སྲིད་ཀྱི་ལངས་ཕྱོགས་འདྲ་མིན་འཕེལ་རྒྱས་སུ་འགྲོ་གི་ཡོད་པའི་དཔང་རྟགས་ཤིག་ཡིན། སྐུ་ཉིད་ཀྱི་དབུ་ཁྲིད་འོག་ཆབ་སྲིད་ཀྱི་ལངས་ཕྱོགས་སྣ་མང་ལྡན་པའི་གྲོས་ཚོགས་འདི་མང་མོས་ཐོག་ཡར་རྒྱས་ཀྱི་ཕྱོགས་སུ་འཁྲིད་རྒྱུ་ནི། རྒྱ་གར་གྱི་མ་འོངས་པའི་གནས་བབ་ཐག་གཅད་རྒྱུ་དང་། མང་གཙོའི་ལྟ་གྲུབ་སྲ་བརྟན་དུ་གཏོང་བར་ཧ་ཅང་གལ་ཆེན་པོ་ཆགས་ཡོད། ཅེས་གསུངས་ཡོད་པ་བཅས།།
