༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་ཀི་རན་རི་ཇི་ཇིའུ་མཆོག་རྒྱ་གར་དབུས་གཞུང་གི་གྲོས་ཚོགས་ཀྱི་གནད་དོན་དང་འབྲེལ་བའི་བློན་ཆེན་ལས་ཁུངས་དང་། གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་བློན་ཆེན་ལས་ཁུངས་གཉིས་ཀྱི་བློན་ཆེན་དུ་བསྐོ་བཞག་གནང་བར་འཚམས་འདྲི་གནང་ཡོད།
དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། སྐུ་ཉིད་ནས་རྒྱ་གར་དབུས་གཞུང་གི་གྲོས་ཚོགས་ཀྱི་གནད་དོན་དང་འབྲེལ་བའི་བློན་ཆེན་ལས་ཁུངས་དང་། གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་བློན་ཆེན་ལས་ཁུངས་ཀྱི་བློན་ཆེན་དུ་བསྐོ་བཞག་གནང་བར་བོད་མིའི་སྒྲིག་འཛུགས་དང་། བོད་མི་ཡོངས་ཀྱི་ཚབ་ཞུས་ཏེ་དགའ་ཞིང་སྤྲོ་བའི་ངང་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
སྐུ་ཉིད་གནད་འགག་ཆེ་བའི་གོ་གནས་འདི་དག་ལ་བསྐོ་བཞག་གནང་བ་དེ་ནི། ལོ་ངོ་བཅུ་ཕྲག་གཉིས་རིང་གི་སྐུ་ཉིད་ཀྱི་ཁྱད་དུ་འཕགས་པའི་དབུ་ཁྲིད་ནུས་རྩལ་གྱི་དཔང་རྟགས་ཡིན་པ་མ་ཟད། སྐུ་ཉིད་ཀྱི་གཡོ་བ་མེད་པའི་ཞབས་ཞུའི་དམ་བཅའ་དང་། ཆབ་སྲིད་ཀྱི་མཁྱེན་ཡོན་ལ་བརྟེན་ནས་ཆེ་མཐོང་ལྡན་པའི་གོ་གནས་འདི་འཐོབ་ཡོད།
སྐུ་ཉིད་ནས་ལས་གནས་གསར་པའི་ལས་ཁུར་བཞེས་པའི་སྐབས་འདིར། ང་ཚོས་སྐུ་ཉིད་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་དང་། བོད་མི་རྣམས་དང་ལྷན་དུ་རྒྱུན་རིང་གི་མཛའ་བརྩེའི་འབྲེལ་བ་བཟུང་བ་དེར་སྙིང་ཁོང་རུས་པའི་གཏིང་ནས་རྗེས་སུ་ཡི་རང་ཞུ་རྒྱུ་ཡིན། སྐུ་ཉིད་ནས་བོད་དོན་སྐོར་ལ་དོན་སྙིང་ལྡན་པའི་ཞུ་གཏུག་དང་རྒྱབ་སྐྱོར་གནང་བ་དེས་ང་ཚོའི་སྤྱི་ཚོགས་ཀྱི་བདེ་ཐབས་ལ་ཕན་པའི་སྲིད་བྱུས་བཟོ་བར་ཕན་ཐོགས་ཆེན་པོ་བྱུང་ཡོད། ལྷག་པར་སྐུ་ཉིད་ཀྱི་རྒྱབ་སྐྱོར་ལ་བརྟེན་ནས་ཕྱི་ལོ ༢༠༡༤ ལོའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ལྟ་བུ་གཏན་འབེབས་གནང་བ་ལ་བརྟེན་ནས་བོད་མི་བཙན་བྱོལ་བ་ཚོར་རོགས་སྐྱོར་དང་འཚོ་རྟེན་མཁོ་སྤྲོད་བྱེད་པར་ཕན་ཐོགས་བྱུང་ཡོད།
སྐུ་ཉིད་ཀྱིས་མཁྱེན་གསལ་ལྟར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་རྒྱ་གར་གྱི་གནའ་བོའི་ཆོས་ལུགས་རིག་གཞུང་དང་། ལྷག་པར་གནའ་བོའི་དཔལ་ན་ལེནྡྲའི་ཆོས་བརྒྱུད་ལ་ཐུགས་མོས་ཆེན་པོ་གནང་མཁན་ཞིག་ཡིན་པ་མ་ཟད། མགོན་པོ་གང་ཉིད་མཆོག་གིས་འགྲོ་བ་མིའི་རིགས་ལ་ཕན་བདེ་སྒྲུབ་ཕྱིར་གནའ་བོའི་རྒྱ་གར་གྱི་རིག་གཞུང་སླར་གསོ་གནང་རྒྱུར་དགོངས་བཞེད་གནང་གི་ཡོད། རྒྱ་གར་དབུས་དང་མངའ་སྡེ་གཞུང་གིས་ང་ཚོའི་དྲང་བདེན་གྱི་འཐབ་རྩོད་ལ་རྒྱབ་སྐྱོར་གནང་བར་བསྔགས་བརྗོད་ཞུ་རྒྱུ་ཡིན།
སྐུ་ཉིད་ཀྱིས་དུས་རྟག་ཏུ་གཡོ་བ་མེད་པའི་རྒྱབ་སྐྱོར་གནང་བ་དེ་ནི་བོད་ཕྱི་ནང་གཉིས་ཀྱི་བོད་མི་རྣམས་ལ་རེ་བ་དང་སྙིང་སྟོབས་ཀྱི་འབྱུང་ཁུངས་ཤིག་ཡིན། ངས་སླར་ཡང་བོད་མིའི་སྒྲིག་འཛུགས་དང་། བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་དང་སྦྲགས། མ་འོངས་ལས་དོན་མཐའ་དག་བྱ་བ་ལམ་འགྲོ་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས་ཡོད་པ་བཅས།།
