༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༠ ཉིན་བོད་ཀྱི་གསོ་བ་རིག་པའི་ལྷན་ཚོགས་དབུ་བརྙེས་ཏེ་མི་ལོ་ ༢༠ འཁོར་བ་དང་བསྟུན་བོད་ཀྱི་གསོ་བ་རིག་པའི་ལྷན་ཚོགས་ཀྱི་གོ་སྒྲིག་འོག་རྡ་ས་མེག་གྷན་གསོལ་མགྲོན་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག་བོད་ཀྱི་གསོ་བ་རིག་པའི་ལྷན་ཚོགས་ཀྱི་བྱུང་རབས་དང་། གལ་ཆེའི་ལས་དོན་ཇི་བྱས་ཀྱི་ལོ་རྒྱུས་ཕྱོགས་བསྒྲིགས་དཔེ་དེབ་ཀྱི་དབུ་འབྱེད་མཛད་སྒོ་བསྐོང་ཚོགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་སྡན་སྲིད་སྐྱོང་སྤེན་པ་ཚེ་རིང་མཆོག་དང་། འཕྲོད་བསྟེན་དྲུང་ཆེ་ཟླ་བ་ཚུལ་ཁྲིམས་ལགས། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་དྲུང་འཚོ་ཚེ་རིང་ཐག་གཅོད་ལགས། ཚོགས་གཞོན་སྨན་དགེ་རྡོ་རྗེ་དགྲ་འདུལ་ལགས། གཞན་ཡང་ཚོགས་པའི་རྒྱུན་ལས་དང་ཚོགས་མི་བཅས་ཚང་འཛོམས་ཀྱིས་ཐོག་མར་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྣང་སེལ་མར་མེ་ཞལ་ཕྱེ་གནང་སྟེ་མཛད་སྒོ་དབུ་འཛུགས་གནང་། དེ་ནས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་དྲུང་འཚོ་ཚེ་རིང་ཐག་གཅོད་ལགས་ཀྱིས་ཚོགས་འདུའི་ངོ་སྤྲོད་དང་འབྲེལ། བོད་ཀྱི་གསོ་བ་རིག་པའི་ད་ལྟའི་གནས་བབ། དེ་བཞིན་དཔེ་དེབ་ཕྱོགས་བསྒྲིགས་དེས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ལོ་ངོ་ ༢༠ ལས་བསྡོམས་ལྟ་བུ་ཆགས་ཀྱི་ཡོད་པའི་སྐོར་གསུངས།
དེ་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ལོ་རྒྱུས་ཕྱོགས་བསྒྲིགས་དཔེ་དེབ་དབུ་འབྱེད་གནང་སྟེ་གསུང་བཤད་གནང་། དེ་ཡང་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་འབྲེལ་ཟླ་འདིའི་ཕྱི་ཚེས་ ༡༢ ནས་ ༡༤ བར་ཉིན་གྲངས་གསུམ་རིང་འགྲོ་ཕན་བོད་ཀྱི་སྨན་རྩིས་ཁང་དུ་ཚོགས་འདུ་བསྐོང་ཚོགས་གནང་རྒྱུ་ཡིན་པ་དེར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༩ ཕེབས་ལ་ཉེ་བའི་སྐུ་འཁྲུངས་སྐར་དང་སྟབས་བསྟུན་ནས་བརྟན་བཞུགས་ཕུལ་བར་སྨན་པ་མང་པོ་ཕེབས་ཀྱི་ཡོད་པས། གོ་བསྡུར་བྱ་རྒྱུའི་གོ་སྐབས་བཟང་པོ་དེ་ཆུད་ཟོས་སུ་མ་གཏང་བའི་ཐོག་ནས་བོད་ཀྱི་གསོ་བ་རིག་པ་སྤྱིའི་གནས་བབ་སྐོར་གོ་བསྡུར་གནང་རྒྱུ་གལ་ཆེན་པོ་ཡིན་པ་གསུངས། དེ་དང་འབྲེལ་ནས་བོད་ཀྱི་གསོ་བ་རིག་པའི་ད་ལྟའི་གནས་སྟངས་དང་། མ་འོངས་ཁ་ཕྱོགས་གང་འདྲ་ཞིག་གི་ཐོག་འགྲོ་དགོས་ཀྱི་ཡོད་པའི་སྐོར་ཐུགས་བསམ་གནང་རྒྱུ་གལ་གནད་ཆེན་པོ་ཡིན་ལུགས། དེ་བཞིན་བོད་མིའི་སྒྲིག་འཛུགས་ངོས་ནས་སྤྱི་ཡོངས་ཀྱི་སྲིད་བྱུས་གང་འདྲ་ཡིན་མིན། དེ་དང་ལྷན་དུ་བོད་ཀྱི་གསོ་བ་རིག་པ་དང་སྦྲེལ་ནས་ཕྱག་ལས་གང་གནང་དགོས་ཀྱི་ཡོད་མེད་སོགས་གསལ་པོར་ར་ཕྲོད་པ་ཡིན་ན་ལས་འགན་ཡང་དག་པ་ཞིག་སྒྲུབ་ཐུབ་པའི་སྐོར་འགྲེལ་བརྗོད་གནང་སོང་།
དེ་ནས་དཔལ་ལྡན་སྲིད་སྐྱིང་མཆོག་གིས་ཚོགས་འདུ་དེ་འཚོགས་རྒྱུའི་དགོས་པ་རྟོགས་ནས་གོ་བསྡུར་བྱེད་དགོས་པ་མ་ཟད། ཁྲིམས་ཀྱི་སྒྲོམ་གཞི་ཚད་ལྡན་ཞིག་དགོས་གལ་དང་ལག་བསྟར་གནང་ཕྱོགས། སྨན་པ་ལྷན་ཚོགས་དེ་ངོ་བོ་དང་མཐུན་པ་ཞིག་གང་འདྲ་དགོས་ཡོད་མེད་སོགས་ཀྱི་ཐོག་དོ་སྣང་བྱེད་དགོས་གསུངས། ལྷག་པར་ད་ལྟའི་བོད་ཀྱི་གསོ་བ་རིག་པའི་ལྷན་ཚོགས་ཀྱི་གནས་སྟངས་གང་འདྲ་ཆགས་ཡོད་མེད་དང་། དེ་མ་འོངས་པ་ནུས་པ་ལྡན་པ་བཟོ་དགོས་ན་ཁ་ཕྱོགས་གང་འདྲ་ཞིག་ལ་འགྲོ་དགོས་ཀྱི་ཡོད་མེད། དེ་ལ་མཐུན་རྐྱེན་དང་། མི་བྱེ་བྲག་དང་ཚོགས་པའི་ངོས་ནས་གང་བྱེད་དགོས་ཀྱི་ཡོད་མེད་བཅས་ཁ་གསལ་བརྗོད་ཐུབ་པ་བྱུང་ཚེ་ཐུགས་ཕན་གསོས་པ་ཞིག་ཡོང་ངེས་ཡིན་ཞེས་སོགས་གསུང་བཤད་གནང་ཡོད། དེ་བཞིན་ཁོང་གིས་ཉིན་གསུམ་རིང་བགྲོ་གླེང་ལྷུག་པོ་གནང་སྟེ་རྒྱབ་གཉེར་ཚད་ལྡན་ཞིག་གནང་ཐུབ་པ་ཡིན་ན་དེར་གཞིགས་ནས་འགན་འཛིན་ལྷན་ཚོགས་དང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལྷན་ཁང་ནས་མཐུན་འགྱུར་དང་རྒྱབ་སྐྱོར་གནང་ཐུབ་ཅེས་འགྲེལ་བརྗོད་གནང་ཡོད་པ་བཅས།།
