༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༠༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་སྲིད་བློན་ན་རེནྡྲ་མོ་དཱི་མཆོག་དང་། རྒྱལ་ཡོངས་མང་གཙོ་མཐུན་སྦྲེལ་ཚོགས་པར་གྲོས་ཚོགས་འོག་མའི་འོས་བསྡུའི་རྒྱལ་ཁ་ཐོབ་པར་འཚམས་འདྲི་གནང་ཡོད།
དེ་ཡང་འཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། ཉེ་ཆར་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུའི་ཁྲོད་སྐུ་ཉིད་གཙོས་པའི་རྒྱལ་ཡོངས་མང་གཙོའི་མཐུན་སྦྲེལ་ཚོགས་པར་ལོ་རྒྱུས་རང་བཞིན་ལྡན་པའི་རྒྱལ་ཁ་ཐོབ་པར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། སྔོན་ཆད་བྱུང་མྱོང་མེད་པའི་གྲུབ་འབྲས་འདི་ནི། རྒྱ་གར་མི་མང་གིས་སྐུ་ཉིད་དང་། རྒྱལ་ཡོངས་མང་གཙོ་མཐུན་སྦྲེལ་ཚོགས་པའི་དབུ་ཁྲིད་ནུས་རྩལ་ལ་ཡིད་ཆེས་གདེང་འཇོག་གནང་གི་ཡོད་པ་མཚོན་ཐུབ།
ཐེངས་འདིའི་གོ་སྐབས་འདི་བརྒྱུད་ངས་རྒྱ་གར་གཞུང་དམངས་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་ལ་ཡུན་རིང་རྒྱབ་སྐྱོར་ཕན་གྲོགས་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན་ལ། རྒྱ་གར་གྱིས་ང་ཚོར་སྐུ་མགྲོན་གྱི་རྣམ་པར་ངོས་ལེན་གྱིས་རྒྱ་གར་ས་ཐོག་ཏུ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་ཞུ་རྒྱུའི་གོ་སྐབས་གནང་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡང་ཡང་མགོན་པོ་གང་ཉིད་མཆོག་རྒྱ་གར་འཕགས་པའི་ཡུལ་གྱི་སྲས་ཡིན་ཞེས་བཀའ་གནང་གི་ཡོད་པ་མ་ཟད། མགོན་པོ་གང་ཉིད་མཆོག་ནས་རྒྱ་གར་གྱི་གནའ་བོའི་དཔལ་ན་ལེནྡྲའི་ཆོས་བརྒྱུད་དྲི་མ་མེད་པ་ཉམས་བཞེས་གནང་གི་ཡོད། དེང་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གནའ་བོའི་ཤེས་རིག་སླར་གསོ་མཛད་རྒྱུའི་ཐུགས་ཁུར་ཆེན་པོ་བཞེས་བཞིན་ཡོད་ལ། དགོངས་བཞེད་དེར་རྒྱ་གར་དབུས་དང་མངའ་སྡེའི་གཞུང་གིས་རྒྱབ་སྐྱོར་གནང་གི་ཡོད་པར་ང་ཚོས་བཀའ་དྲིན་རྗེས་དྲན་ཞུ་རྒྱུ་ཡིན།
ད་ལྟའི་རྩོད་རྙོག་དང་དྲག་སྤྱོད་ཆེ་བའི་དུས་རབས་འདིའི་ནང་། རྒྱ་གར་ནི་འཛམ་གླིང་གི་མང་གཙོའི་རྒྱལ་ཁབ་ཆེ་ཤོས་དེ་ཡིན་པའི་ཆ་ནས། བློ་མཐུན་རྒྱལ་ཁབ་ཁག་ཕྱོགས་མཐུན་གྱིས་མང་གཙོ་དང་མཐུན་པའི་མཉམ་ལས་སྤེལ་རྒྱུའི་གོ་སྐབས་བཟང་པོ་ཞིག་ཡོད། རྒྱ་གར་ནི་འཚེ་མེད་ཞི་བའི་ལྟ་སྤྱོད་ལ་རྩ་བ་བརྟན་པོ་ཚུགས་ཟིན་པའི་རྒྱལ་ཁབ་ཅིག་ཡིན་དུས། རྒྱལ་ཁབ་འདིས་འཛམ་གླིང་འདི་ཞི་བདེ་དང་བརྟན་ལྷིང་ཕྱོགས་སུ་འགོ་ཁྲིད་རྒྱུ་སྔར་ལས་གལ་ཆེ་བར་གྱུར་ཡོད། སྐུ་ཉིད་ཀྱིས་ལོ་རྒྱུས་རང་བཞིན་ལྡན་པའི་ལས་ཡུན་ཐེངས་གསུམ་པ་དབུ་འཛུགས་པའི་སྐབས་འདིར་ང་ཚོས་སྐུ་ཉིད་ཀྱི་དབུ་ཁྲིད་འོག་རྒྱ་གར་གྱིས་མུ་མཐུད་དེ་མང་གཙོ་དང་། རང་དབང་། འགྲོ་བ་མིའི་ཐོབ་ཐང་བཅས་ཀྱི་རིན་ཐང་རྣམས་སྲུང་སྐྱོབ་གནང་བའི་རེ་བ་འཆང་གི་ཡོད། ཅེས་དང་།
མཐར་དཔལ་ལྡན་སྲིད་སྐྱོང་མཆོག་གིས་སྲིད་བློན་མོ་དཱི་མཆོག་གི་དབུ་ཁྲིད་འོག་ཡོང་འགྱུར་རྒྱ་གར་དེ་ཞི་བདེ་འཆམ་མཐུན་དང་། ཡར་རྒྱར་གོང་འཕེལ་ལྡན་པའི་རྒྱལ་ཁབ་ཅིག་ཏུ་འགྱུར་བའི་སྨོན་འདུན་དང་། རྒྱ་གར་གཞུང་ནས་བཙན་བྱོལ་བོད་མི་རྣམས་ལ་རྒྱབ་སྐྱོར་ཕན་གྲོགས་སྔར་བཞིན་མུ་མཐུད་གནང་སྐྱོང་ཡོང་བའི་རེ་སྐུལ་ཞུས་འདུག་པ་བཅས།།
