༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་པྲེམ་སིངྷ་ཏ་མང་མཆོག་གི་སྲིད་དོན་ཚོགས་པར་མངའ་སྡེའི་གྲོས་ཚོགས་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲི་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གི་འཚམས་འཕྲིན་ནང་། སྐུ་ཉིད་ལ་རྒྱལ་ཁ་ཐོབ་པ་དེས་མངའ་སྡེ་མི་མང་གིས་སྐུ་ཉིད་ཀྱི་དབུ་ཁྲིད་འཇོན་ཐང་ལ་བཅངས་པའི་ཡིད་ཆེས་དང་གདེང་ཚོད་མཚོན་གྱི་ཡོད། སྐུ་ཉིད་ཀྱི་དབུ་ཁྲིད་འོག་མངའ་སྡེ་མུ་མཐུད་ནས་ཡར་རྒྱས་དང་དར་རྒྱས་སུ་འགྲོ་ངེས་ཡིན་པ་རེད། ཅེས་དང་། 

དེ་བཞིན་ཁོང་གིས། སྔ་ལོའི་ཕྱི་ཟླ་ ༡༢ ནང་སྤྱི་ཁྱབ་བློན་ཆེན་མཆོག་གི་མགྲོན་འབོད་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འབྲས་ལྗོངས་མངའ་སྡེར་ཆིབས་སྒྱུར་བཀའ་དྲིན་བསྐྱངས་པ་དྲན་གསོ་འབྲེལ། མངའ་སྡེའི་སྤྱི་ཁྱབ་བློན་ཆེན་མཆོག་ལ་ཐུགས་རྗེ་ལེགས་འབུལ་ཞུས་ཡོད་པ་བཅས།།