༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་སྲིད་དོན་ཚོགས་པར་མངའ་སྡེའི་གྲོས་ཚོགས་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲི་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གི་འཚམས་འཕྲིན་ནང་། སྐུ་ཉིད་ལ་རྒྱལ་ཁ་ཐོབ་པ་དེས་མངའ་སྡེ་མི་མང་གིས་སྐུ་ཉིད་ཀྱི་དབུ་ཁྲིད་འཇོན་ཐང་ལ་བཅངས་པའི་ཡིད་ཆེས་དང་གདེང་ཚོད་མཚོན་གྱི་ཡོད། སྐུ་ཉིད་ཀྱི་དབུ་ཁྲིད་འོག་མངའ་སྡེ་མུ་མཐུད་ནས་ཡར་རྒྱས་དང་དར་རྒྱས་སུ་འགྲོ་ངེས་ཡིན་པ་རེད།
སྐུ་ཉིད་ནས་བོད་མི་རྣམ་ལ་མཛའ་བརྩེའི་མཐུན་ལམ་བྱེད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཞུ་བ་ནི་ང་ཚོར་སེམས་ཤུགས་སྐྱེ་བའི་རྒྱུ་ཞིག་ཆགས་ཡོད་ལ། ལྷག་པར་དུ་སྐུ་ཉིད་ཀྱི་དབུ་འཁྲིད་འོག་མངའ་སྡེའི་ནང་གི་བོད་མིའི་བདེ་དོན་ཡར་རྒྱས་ལ་ཐུགས་ཁུར་ཆེ་བཞེས་གནང་བར་ང་ཚོས་བཀའ་དྲིན་ཆེ་ཞུ་གི་ཡོད།
མཐར་དཔལ་ལྡན་སྲིད་སྐྱོང་མཆོག་གིས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གི་ལས་ཡུན་རིང་བྱ་བ་ལམ་ལྷོང་ཡོང་བའི་སྨོན་འདུན་ཞུས་ཡོད་པ་བཅས།།
